Źjaviŭsia novy top-100 paśpiachovych biznesmienaŭ Biełarusi. U im źmiena lidara
U topie-100 paśpiachovych biznesmienaŭ Biełarusi, składzienym sioleta sajtam «Biełarusy i rynak», źmiena lidara. Viktara Kisłaha, jaki žyvie na Kipry, ź pieršaha radka zrynuŭ hramadzianin Biełarusi, jaki niekalki hadoŭ tamu asieŭ u Rasii, Alaksandr Łucenka. Uładalnik hrupy kampanij «Sadružnaść» Alaksandr Łucenka źjaŭlaŭsia ŭ niekalkich papiarednich viersijach topa-100, a jaho lidarstva na hety momant — adlustravańnie novaj struktury biełaruskaha biznesu, piša vydańnie.
Chto lidar
Vypusknik Minskaha vyšejšaha vajenna-palityčnaha ahulnavajskovaha vučylišča Alaksandr Łucenka i jaho žonka Natalla zasnavali svoj biznes pa handli karmami ŭ 1994 hodzie ŭ Biełarusi. Da kanca 1990-ch kampanija «Sadružnaść» u svajoj halinie stała najbujniejšaj u rehijonie.
Ale biznesmien nie spyniŭsia na hetym i inviestavaŭ prybytak u vytvorčaść, stvaryŭšy bazu ŭ Kalininhradskaj vobłaści. Hrupa kampanij «Sadružnaść» adnoj ź pieršych u byłym SSSR razhledzieła patencyjał soi, zasiarodziŭšy hałoŭnuju ŭvahu na jaje pierapracoŭcy i atrymańni karmavych praduktaŭ. Z pačatku 2000-ch Alaksandr Łucenka skuplaŭ aktyvy ŭ Jeŭropie i Łacinskaj Amierycy, maštabavaŭšy svoj biznes da mižnarodnaha ŭzroŭniu.
U kancy 2010-ch jon viarnuŭsia na rynak Biełarusi, pabudavaŭšy bujny pierapracoŭčy kompleks u Smarhoni i inviestavaŭšy niekalki miljonaŭ dołaraŭ va ŭłasny park vahonaŭ na miascovaj čyhuncy. U kancy 2023 hoda źjaviłasia infarmacyja, što «Sadružnaść» razhladaje mahčymaść pieranosu ŭ Biełaruś častki mahutnaściaŭ z Kalininhradskaj vobłaści.
Biznes Alaksandra Łucenki ni ŭ Rasii, ni ŭ Biełarusi praktyčna nie zakranuli mižnarodnyja sankcyi. Jon zapuściŭ zavod u Kurskaj vobłaści i praciahvaje realizoŭvać šerah inšych prajektaŭ u Rasii, uklučajučy budaŭnictva zbožžavaha terminała va Uść-Łuzie.
Chto jašče
Z tych biznesmienaŭ, jakija najbolš prykmietna pryraśli ŭ rejtynhu, vyłučylisia braty Uładzimir i Maksim Stajeckija.
Taksama istotna palepšyli svaje pazicyi ŭ rejtynhu dystrybjutar BiełAZaŭ Viktar Kułujeŭ, farmaceŭt Ivan Łahavy i saŭładalnica Mark Formelle Śviatłana Siparava. Apošniaja, jak i Alaksandr Łucenka, pradstaŭlaje siamiejny biznes — u jaje pakazčykach uličana dola muža Andreja Sierykava.
Jarkija navički — heta, pierš za ŭsio, uładalniki najbujniejšaha dystrybjutara aŭtazapčastak na postsavieckaj prastory Armtek braty Vadzim i Aleh Hrynkievičy, zasnavalniki adnaho z najbujniejšych suśvietnych raspracoŭščykaŭ softu dla iGaming Ivan Moncik i Dźmitryj Jajkaŭ, jakija ŭvajšli ŭ top-100 dziakujučy ździełcy z Publicis biełaruskija «irłandcy» Kanstancin Čarnyš i Dźmitryj Vysocki i akumulatarščyki Viktar Lemiašeŭski i Alaksandr Papok, jakija viarnulisia ŭ rejtynh.
Z tych, chto straciŭ u kapitale, ale zastaŭsia ŭ topie-100, adznačym zaniataha šlubarazvodnym pracesam Siarhieja Hvardziejcava i straciŭšych značnyja sumy z-za abvału kaštoŭnych papier akcyjanieraŭ šviedskaj Embracer Group Maćvieja Cimašenka,Aleha Hruševiča i Piatra Skromnaha.
Jakija trendy
Zjaŭleńnie na pieršym miescy topa-100 biznesmiena ź biełaruskim pašpartam, jaki, adnak, pražyvaje ŭ Rasii, adlustroŭvaje niekalki tendencyj u raźvićci biełaruskaha biznesu ŭ apošnija dva-try hady.
Pieršaja ź ich — heta ciapierašniaje rassłajeńnie hetaj sacyjalnaj hrupy: na tuju, jakaja z-za zachodnich sankcyj abo ŭłasnych intaresaŭ usio bolš zaviazvajecca na rynak Biełarusi i Rasii, i na tuju, jakaja adbudavałasia abo adbudoŭvajecca ad jaho.
Druhaja tendencyja — rost u kolkaści biznesmienaŭ, intehravanych u rasijski rynak. Faktyčna — heta ŭsie jaho ŭdzielniki z asabistymi łakacyjami ŭ Biełarusi i Rasii.
Pavieličeńnie hetaj doli — heta, pa-pieršaje, śledstva rostu ekanomiki Rasii i zajmańnie niš, jakija vyzvalilisia z-za sychodu zachodnich biznesaŭ. U pieravažnaj bolšaści biełaruskich biznesaŭ (pa vynikach asabliva 2022 hoda) adbyŭsia istotny rost jak pa vyručcy, tak i pa prybytku. U 80% ź ich hetyja pakazčyki ŭ dołaravym ekvivalencie pavialičylisia bolš jak u 2 razy.
Pa-druhoje, adbivajucca sankcyi, jakija dla mnohich biznesaŭ, prynamsi aficyjna, zakryli dostup na rynki «niedružalubnych krain». I ŭ jakaści alternatyvy jany pieranosiać apieracyi ŭ Rasiju i inšyja alternatyŭnyja rehijony.
Asobnaja ad «rasijskaha pytańnia» tendencyja — heta niaznačnaja kolkaść novych maładych biznesmienaŭ u rejtynhu. Faktyčna ŭ jaho viersii za 2023 ich tolki čatyry — uładalniki chołdynhu SoftSwiss i zasnavalniki irłandskaha startapa Profitero.
Jakija źmieny
Chacia ŭ topie-100 zjaviłasia niekalki novych imionaŭ sa śvietu IT, pradstaŭnictva hetaj haliny ŭ paraŭnańni z papiaredniaj viersijaj rejtynhu zachavałasia praktyčna na raniejšym uzroŭni.
Mienš stała dyviełapieraŭ i retejleraŭ — biahučaja situacyja ŭ hetych śfierach nie samaja spryjalnaja dla biełaruskaha biznesu.
Nie ŭvajšli ŭ rejtynh z-za spadčynnych pytańniaŭ novyja ŭładalniki takich bujnych biznesaŭ jak «Jukoła-Nafta» i Yukon Optics Advanced Worlwide.
U paraŭnańni z papiaredniaj viersijaj topa-100 paśpiachovych biznesmienaŭ 2023 abnaviŭsia prykładna na 35%.
Kamientary