Nikoli nie darycie heta na Novy hod! Najhoršyja padarunki na dumku biełarusaŭ
Praviali nievialikaje apytańnie i daviedalisia, jakija padarunki nie varta kłaści pad navahodniuju jalinku. Spadziajemsia, hety śpis dapamoža vam nie pamylicca z vybaram siurpryzu i abrać toje, što nasamreč paraduje vašych blizkich.
Pramachnucca z navahodnim prezientam vielmi lohka, bo, kab jaho abrać, my časta kirujemsia tolki svaim ŭłasnym dośviedam i hustam. Tamu kali ŭ hetaj padborcy apynulisia rečy, jakija vy chacieli kamuści padaryć, nie adčajvajciesia — u vas jašče zastaŭsia čas, kab ich abmianiać.
Siertyfikaty na ekstremalnyja aktyŭnaści. Pieraadolvać svaje strachi — heta dobra, drenna — kidać vyklik čužym. Navat kali vam zdajecca, što skačok na tarzancy z vyški — vydatny padarunak, vaš siabar moža prytrymlivacca inšaha mierkavańnia.
Nabory cukierak ad dziaržaŭnych fabryk. Sałodki nabor stanie ŭdałym padarunkam dla tematyčnaj viečaryny «nazad u časy deficytu». Tradycyjna pałova takoj karobki zabivajecca niasmačnymi ledziancami, dy i škody ad takoj kolkaści cukru bolš, čym karyści.
Bukiety z sadaviny. Narezanaja sadavina chutka abvietryvajecca, tamu časta takija bukiety hublajuć tavarny vyhlad, jašče nie paśpieŭšy patrapić u adpaviednyja ruki. Akramia hetaha, mnohija ludzi hrebujuć jeść prysmaki, pryhatavanyja samatužnym sposabam.
Chatnija žyvioły. Navat kali čałaviek niekalki razoŭ kazaŭ, što choča nabyć hadavanca, abzavieścisia im jon pavinien sam. Žyvaja istota — heta adkaznaść, jakuju nie treba ŭzvalvać na čužyja plečy — navat z najlepšych pamknieńniaŭ.
Nabor šampuniaŭ i hielaŭ dla duša. Parfumiernyja kamplekty, jakija na pieršy pohlad zdajucca ŭniviersalnym prezientam, na spravie časta adpraŭlajucca ŭ śmiećcie navat nie raspakavanymi. Da taho ž, pa takim preziencie adrazu vidać, što čałaviek pastaviŭsia da vybaru padarunka biez entuzijazmu.
Posud dla hatavańnia i bytavaja technika dla kuchni ci ŭborki. Kłopaty pa chacie — dadatkovaja praca, jakuju niaredka žančyny ciahnuć sami. Nie treba nahadvać pra heta ŭ navahodniuju noč: lepš kupicie peŭnyja rečy biez nahody — prosta, kab ablehčyć žyćcio.
Parfuma. Adhadać, jakija duchi padyduć znajomamu — vielmi składana. I reč tut navat nie ŭ hustavych pieravahach. Na toje, jak na ciele raskryjecca parfuma, upłyvaje mnostva faktaraŭ: ad tempieratury ŭ pamiaškańni, dzie buduć nanasić vodar, da harmanalnych asablivaściaŭ čałavieka. Tamu ad takoha padarunka lepš admovicca. Adnak jość vyklučeńnie: kali vam miakka namiaknuli, što žadajuć atrymać kankretny fłakončyk, možacie śmieła kłaści jaho pad jołku.
Dryl abo nabor adviortak u padarunak mužčynam. Śviaty — vydatnaja nahoda prademanstravać, što ŭvieś hod vy byli ŭvažlivyja da taho, što raduje blizkaha čałavieka i hatovy padaryć jamu niešta dla dušy, a nie dla chaty. U dadatak, samastojnaja pakupka techniki i instrumientaŭ moža prynosić mužčynam zadavalnieńnie — nie varta pazbaŭlać ich hetaj radaści.
Adzieńnie i bializna. Pra husty nie spračajucca, ale časta moŭčki ź imi nie pahaždajucca. Kali nie žadajecie, kab abranaja vami reč pyliłasia ŭ šafie, padarycie siertyfikat u kramu abo zrabicie, jak heta pryniata ŭ šmatlikich krainach Jeŭropy — prykładzicie da padarunka ček. Tak čałaviek zmoža viarnuć tavar ci abmianiać jaho na hrošy.
A jakija niaŭdałyja padarunki atrymlivali vy?
Kamientary