Siońnia zbornaja Biełarusi biare start u dosyć ekzatyčnym dla našych krajoŭ vidzie sportu

U Dubai (AAE) startavaŭ čempijanat śvietu pa plažnym futbole. 16 kamandaŭ raźbityja na čatyry hrupy. 

Mužčynskaja zbornaja Biełarusi trapiła ŭ hrupu S ź Sieniehałam, Kałumbijaj i Japonijaj. Pieršy matč ź Sieniehałam užo siońnia ŭ 18:30.

U płej-of vychodziać dźvie kamandy z hrupy.

Zbornaja Ukrainy admoviłasia ŭdzielničać u spabornictvach mienavita tamu, što arhanizatary dapuścili biełarusaŭ.

Plažny futboł źjaviŭsia na plažach Rya-de-Žaniejra, a čempijanaty śvietu pravodziacca z 1995 hoda. Spačatku jany prachodzili štohod pad ehidaj Beach Soccer Worldwide, a z 2005 hoda pravodziacca pad apiekaj FIFA (Mižnarodnaj fiederacyi futboła).

Pryčym z 2009 hoda — raz na dva hady. Brazilija 14 razoŭ stanaviłasia pieramožcam, Partuhalija i Rasija pa try razy, Francyja adzin raz.

Zbornaja Biełarusi brała ŭdzieł u čempijanatach dvojčy: u 2019 i 2021 hadach. Tady jana zajmała treciaje miesca ŭ hrupie, i, naturalna, nie prabivałasia ŭ płej-of.

Cikava, što mundyjali časam pravodziacca ŭ ekzatyčnych dla nas miescach. Spačatku jany pravodzilisia vyklučna ŭ Brazilii (ažno 13 razoŭ), ale taksama na Bahamach i Taici, a nastupny čempijanat projdzie na Sejšełach.

Asnoŭnyja praviły:

Pa stanie na 2023 hod u suśvietnym rejtynhu plažnaha futboła ŭdzielničajuć 103 mužčynskija komandy (u zvyčajnym vialikim futbole — 210 zbornych), a taksama 218 mužčynskich kłubaŭ (u vialikim futbole — kamandaŭ proćma).

Hulnia pavinna prachodzić vyklučna na piasku, hłybinia jakoha pavinna składać nie mienš za 40 santymietraŭ. Pole pavinna być pamieram 35-37 mietraŭ u daŭžyniu i 26-28 mietraŭ u šyryniu.

Hulniavaja zona paznačajecca 10-santymietrovaj linijaj. Sama placoŭka składajecca z dzvviuch roŭnych zon dla kožnaj kamandy. Vyšynia varot pavinna składać 2,2 mietra pry šyryni 5,5 mietra.

U hulni ŭdzielničajuć dźvie kamandy pa piać čałaviek: adnaho varatara i čatyroch palavych hulcoŭ. U kamand jość nie bolš za siem zapasnych hulcoŭ. Abmiežavańniaŭ pa kolkaści zamien niama: ich možna ažyćciaŭlać u luby čas biez čakańnia spynieńnia hulni.

Matč składajecca z troch pieryjadaŭ pa 12 chvilin, pamiž jakimi jość trochchvilinnyja tajm-aŭty. Hulniavy čas spyniajecca paśla zabitaha hoła, pryznačeńnia pienalci, prabićcia štrafnoha ŭdaru abo traŭmy hulca.

Ničyjny vynik paśla asnoŭnaha času nie dapuskajecca. Kali lik zastajecca roŭnym, praduhledžany dadatkovy trochchvilinny pieryjad. Kali i paśla hetaha niama pieramožcy, los sustrečy vyśviatlajecca ŭ sieryi pienalci. Kožnaja kamanda maje try sproby. Kali paśla hetaha lik roŭny, to pienalci praciahvajucca da tak zvanaha «załatoha hoła».

Paśla aŭtu miač u hulniu možna ŭvodzić jak rukami tak i nahami.

Vyjšaŭšy za miežy zony ź miačom, hałkipier nie moža ŭ jaje viartacca i zabirać miač u ruki.

Zabaroniena pieraškadžać hulcu, jaki vykonvaje ŭdar «nažnicy» abo ŭdar praź siabie.

Matčy zbornaj Biełarusi možna budzie hladzieć na sajcie Biełaruskaj fiederacyi futboła.

• 5
• 0
• 1
• 2
• 0
• 0
• 2
• 0