U Sieniehale apazicyjanier vyjhraŭ prezidenckija vybary praz 10 dzion paśla vychadu z turmy
Bolš za toje, jon byŭ dubloram hałoŭnaha apazicyjaniera krainy.
Novym prezidentam Sieniehała pa vynikach vybaraŭ 24 sakavika staŭ hałoŭny kandydat ad apazicyi Basiru Dyjamaj Faj, jakomu 25 sakavika spoŭniłasia 44 hady, piša RBK.
I choć Hałoŭnaje ŭpraŭleńnie Sieniehała pa vybarach nie publikavała navat pramiežkavyja vyniki (aficyjnyja vyniki jano apublikuje na praciahu tydnia — u piatnicu, 29 sakavika), mižnarodnyja ŚMI ŭžo paviedamili pra pieramohu Faja.
Ź pieramohaj apazicyjaniera pavinšavaŭ jaho hałoŭny kankurent, ź jakim Faju pradkazvali baraćbu ŭ druhim tury, — 62-hadovy kandydat ad kaalicyi ciapierašniaha prezidenta Maki Sala premjer-ministr krainy z 2022 pa 2024 hod Amadu Ba. Pasadu premjera jon pakinuŭ u pačatku sakavika, kab bałatavacca.
«Malu Usiavyšniaha daravać jamu enierhiju i siły, nieabchodnyja dla pracy na hetaj vysokaj pasadzie na čale našaj krainy. Žadaju jamu vialikich pośpiechaŭ i pośpiechaŭ u imia dabra sieniehalskaha naroda», — napisaŭ Ba ŭ sacsietcy X.
Ź pieramohaj Faja pavinšavaŭ i Maki Sal, čyj termin paŭnamoctvaŭ minaje 2 krasavika. «Vitaju hładkaje praviadzieńnie prezidenckich vybaraŭ 24 sakavika 2024 hoda i vinšuju spadara Basira Dyjamaja Faja, jaki, miarkujučy z usiaho, źjaŭlajecca pieramožcam, — napisaŭ jon u sacsietcy X. — Heta pieramoha sieniehalskaj demakratyi»
Były padatkovy inśpiektar Faj — kandydat ad niesistemnaj apazicyi, u svajoj prahramie jon zaklikaŭ da tak zvanaha ačyščeńnia palityčnaha kłasa krainy.
Siarod inšych jaho prapanoŭ — pazbavicca ad franka KFA (hrašovaja adzinka, uviedzienaja ŭ 1945 hodzie ŭ tady jašče francuzskich kałonijach u Zachodniaj i Ekvataryjalnaj Afrycy), uvieści novuju valutu i raspaŭsiudzić vykładańnie na anhlijskaj movie.
Jon ustupiŭ u pieradvybarčuju honku za dziesiać dzion da vybaraŭ, kali 14 sakavika vyjšaŭ z turmy pa amnistyi, jakuju Maki Sal abviaściŭ 7 sakavika dla ŭsich, chto byŭ aryštavany na palityčnych akcyjach u pieryjad z 2021 pa 2024 hod.
Tady ž z turmy vyjšaŭ Usman Sanko, taksama były padatkovy inśpiektar, — hałoŭny apazicyjanier, jaki ŭ 2014 hodzie zasnavaŭ partyju «Afrykanskija patryjoty Sieniehała za pracu, etyku i braterstva».
Pieršapačatkova abiracca pavinien byŭ Sanko.
U 2021 hodzie jaho abvinavacili ŭ zhvałtavańni małaletnich; u 2023-m abvinavačvańnie było źniata, ale nieŭzabavie jaho aryštavali i asudzili za padrychtoŭku buntu, a partyju PASTEF likvidavali.
Faj taksama byŭ uziaty pad vartu ŭ krasaviku — jaho abvinavacili ŭ paklopie i niepavazie da sudu, paśla taho jak jon raskrytykavaŭ kryminalny pieraśled Sanko. Paźniej jaho abvinavacili ŭ padbuchtorvańni da miaciažu i padryvie dziaržbiaśpieki.
Paśla taho jak stała zrazumieła, što lidara PASTEF da vybaraŭ nie dapuściać, apazicyja vyłučyła Faja — Sanko zaklikaŭ hałasavać za jaho.
«Nichto nie moža skazać, što jon niesumlenny. Ja b navat skazaŭ, što jon bolš sumlenny za mianie. Ja daviaraju prajekt u jaho ruki», — skazaŭ Sanko ŭ zvarocie da vybarščykaŭ. Na pieradvybarnych płakatach byli abodva palityki, i słohan na ich byŭ «Dyjamaj — heta Sanko».
Pavodle acenki sieniehalskich ŚMI, mienavita hetaja padtrymka adyhrała vyrašalnuju rolu ŭ abrańni Faja.
Kamientary