Rasijanka Iryna na Land Cruiser pabiłasia z aršanskimi daišnikami i pałochała ich mužam-prakuroram
Žančyna abiacała, što ŭ ich «buduć prablemy» i jany «bolš nie buduć pracavać». Ale z prablemami ŭsio ž sutyknułasia sama.
Čechaŭski haradski sud Maskoŭskaj vobłaści pryznaŭ rasijanku Irynu Smunievu vinavataj u hvałcie nad biełaruskim milicyjantam. Žančyna, jakaja pad Oršaj nie prapuściła piešachoda, a potym trojčy ŭdaryła inśpiektara DAI, atrymała štraf sumaj prykładna $440.
Zdareńnie adbyłosia na trasie M8/Je95 kala vioski Andrejeŭščyna pad Oršaj. Pavodle prysudu, bieły Toyota Land Cruiser z rasijskimi numarami nie prapuściŭ piešachoda na nierehulavanym pierachodzie. Kali čałaviek vyjšaŭ z-za mikraaŭtobusa, jaki spyniŭsia jaho prapuścić, kiroŭca ŭsiedarožnika rezka vykruciła rul i abjechała čałavieka, ledź nie źbiŭšy. Ekipaž aršanskaj DAI, jaki jechaŭ śledam, spyniŭ mašynu.
Za rulom była Iryna Smunieva, hramadzianka Rasii. Vychodzić z mašyny i iści ŭ słužbovuju «Škodu» dla afarmleńnia pratakoła jana kateharyčna admoviłasia, zajaviła, što ničoha nie parušała. Rasijanka papiaredziła biełaruskich inśpiektaraŭ, što jaje muž pracuje ŭ prakuratury, tamu ŭ ich «buduć prablemy» i jany «bolš nie buduć pracavać». Žančyna zapatrabavała pakazać, dzie napisana, što jana abaviazanaja pierasieści ŭ słužbovy aŭtamabil, — inśpiektar prynios joj PIKaAP i daŭ pačytać. Nie dapamahło.
Kali staršy inśpiektar adčyniŭ dźviery i pasprabavaŭ vyvieści kiroŭcu z sałona, taja, jak zafiksavali videarehistratary, trojčy navodmaš udaryła jaho levaj rukoj — celiła ŭ tvar, ale milicyjant uchiliŭsia, i ŭdary pryjšlisia pa formiennym adzieńni. Naručniki na jaje sprabavali nadzieć, ale jany nie zaščoŭknulisia. U vyniku žančynu ŭsio ž dastavili ŭ aršanski adździeł, dzie aformili pratakoły — za niepadparadkavańnie i abrazu milicyjantaŭ. Ałkatest pakazaŭ, što jana była ćviarozaja.
A paśla nadyšoŭ čas i kryminalnaj spravy. Čamu ž jaje sudzili nie ŭ Biełarusi? Smunieva — hramadzianka Rasii, a Rasija svaich hramadzian nie vydaje. Tamu biełaruski bok pieradaŭ kryminalny pieraśled rasijskim orhanam pavodle miechanizmaŭ pravavoj dapamohi pamiž krainami. Spravu rasśledavaŭ rasijski Śledčy kamitet, a razhladaŭ sud u padmaskoŭnym Čechavie. Pakazańni aršanskich daišnikaŭ, dadzienyja śledstvu, u sudzie prosta ahučyli.
Abyšłosia biez pasadki: Smunieva całkam pryznała vinu i raskajałasia, sud uličyŭ dohlad maci-piensijanierki i stanoŭčyja charaktarystyki — i abmiežavaŭsia štrafam prykładna $440. Ci nasamreč pracuje jaje muž u prakuratury, nieviadoma.
Kamientary