«Naš horad užo druhi tydzień prosta źniščajuć. Nidzie pra heta ni słova. Jak tak žyć?» — napisała adna z žycharak.
Siarod paciarpiełych — dvoje dziaciej. Adnoj z paciarpiełych miedycynskuju dapamohu akazali na miescy, astatnich dastavili ŭ balnicy. Pavodle infarmacyi ŭładaŭ, u horadzie paškodžany niekalki šmatkvaternych damoŭ, bolš za 15 aŭtamabilaŭ, a taksama častkova razburany pryvatny dom.
Telehram-kanał «Piepieł. Biełharad» spačatku paviedamlaŭ, što, pavodle papiarednich źviestak, niekalki bieśpiłotnikaŭ nanieśli ŭdar pa terytoryi miascovaha ŭpraŭleńnia FSB, dzie adbyŭsia pažar. Adnak paźniej kanał udakładniŭ, što adzin ź bieśpiłotnikaŭ upaŭ u dvor doma na Hramadzianskim praśpiekcie ŭ centry horada.
Jašče adzin bieśpiłotnik vybuchnuŭ u dvary šmatpaviarchovaha doma na vulicy Bahdana Chmialnickaha, dzie zaharelisia aŭtamabili. Taksama paviedamlałasia pra ŭdar pa šmatkvaternym domie na Charkaŭskaj hary i padzieńnie bieśpiłotnika ŭ rajonie pryvatnaj zabudovy Uschodniaj akruhi, dzie ŭźnik mocny pažar.
«Naš horad užo druhi tydzień prosta źniščajuć. Nidzie pra heta ni słova. Jak tak žyć? U nas bolš niama sił, strašna za dziaciej. Zaraz 1:20 nočy, u nas harać damy i mašyny, ludzi vybirajucca z kvater praz vokny. Heta centr horada. Strašna za dziaciej, sił bolš niama», — raspaviała adna ź miascovych žycharak vydańniu «Ostorožno, Novosti».
Kamientary