Karol Karł upieršyniu ŭziaŭ udzieł u publičnym mierapryjemstvie paśla taho, jak u jaho vyjavili rak
Karł III źjaviŭsia ŭ carkvie razam sa svajoj žonkaj, karalevaj Kamiłaj i inšymi členami karaleŭskaj siamji.
Brytanski karol Karł III upieršyniu ŭziaŭ udzieł u publičnym mierapryjemstvie paśla taho, jak u jaho było vyjaŭlena ankałahičnaje zachvorvańnie. U niadzielu manarch naviedaŭ vielikodnuju słužbu ŭ Vindzary, dzie raźmieščana adna z asnoŭnych karaleŭskich rezidencyj, piša Bi-bi-si.
Karł źjaviŭsia ŭ carkvie razam sa svajoj žonkaj, karalevaj Kamiłaj i inšymi členami karaleŭskaj siamji.
Jon parazmaŭlaŭ ź ludźmi, jakija pryjšli jaho pavitać, i pacisnuŭ im ruki.
U suviazi ź lačeńniem, jakoje 75-hadovy Karł prachodzić paśla vyjaŭleńnia ankałahičnaha zachvorvańnia, manarch praktyčna nie biare ŭdziełu ŭ publičnych mierapryjemstvach, choć praciahvaje vykonvać svaje kanstytucyjnyja abaviazki.
Niadzielnaje naviedvańnie carkvy i sustreča ź ludźmi nie śviedčać ab tym, što ciapier Karł pačnie znoŭ vieści aktyŭnaje publičnaje žyćcio. Pakul heta tolki pieršy krok da takoha viartańnia.
Bukinhiemski pałac raspavioŭ pra ankałahičny dyjahnaz Karła ŭ pačatku lutaha. Jaho chvaroba była vyjaŭlena ŭ studzieni, kali jon prachodziŭ lačeńnie ŭ suviazi z pavieličeńniem prastaty. Pradstaŭniki karaleŭskaj siamji paćvierdzili, što ŭ Karła nie rak prastaty.
U sakaviku taksama stała viadoma, što ankałahičnaje zachvorvańnie vyjaŭlena i ŭ pryncesy Uelskaj Kiejt. Kiensinhtonski pałac abviaściŭ, što ciapier jana prachodzić rannija stadyi kursu prafiłaktyčnaj chimijaterapii.
U suviazi z hetym jaje muž, spadkajemca trona prync Uelski Uiljam, imavierna, budzie abmiažoŭvać svaje pajezdki, kab zastavacca razam ź siamjoj, ale jon praciahvaje ŭdzielničać u hramadskim žyćci.
Tym časam na praciahu apošnich miesiacaŭ na mnohich publičnych mierapryjemstvach karaleŭskuju siamju pradstaŭlała karaleva Kamiła, u tym liku jana ździajśniała pajezdki, u jakija pavinien byŭ adpravicca jaje muž.
Pakul nieviadoma, kali Karł i Kiejt zmohuć viarnucca da aktyŭnaj dziejnaści.
Kamientary