Кароль Карл упершыню ўзяў удзел у публічным мерапрыемстве пасля таго, як у яго выявілі рак
Карл III з'явіўся ў царкве разам са сваёй жонкай, каралевай Камілай і іншымі членамі каралеўскай сям'і.
Брытанскі кароль Карл III упершыню ўзяў удзел у публічным мерапрыемстве пасля таго, як у яго было выяўлена анкалагічнае захворванне. У нядзелю манарх наведаў велікодную службу ў Віндзары, дзе размешчана адна з асноўных каралеўскіх рэзідэнцый, піша Бі-бі-сі.
Карл з'явіўся ў царкве разам са сваёй жонкай, каралевай Камілай і іншымі членамі каралеўскай сям'і.
Ён паразмаўляў з людзьмі, якія прыйшлі яго павітаць, і паціснуў ім рукі.
У сувязі з лячэннем, якое 75-гадовы Карл праходзіць пасля выяўлення анкалагічнага захворвання, манарх практычна не бярэ ўдзелу ў публічных мерапрыемствах, хоць працягвае выконваць свае канстытуцыйныя абавязкі.
Нядзельнае наведванне царквы і сустрэча з людзьмі не сведчаць аб тым, што цяпер Карл пачне зноў весці актыўнае публічнае жыццё. Пакуль гэта толькі першы крок да такога вяртання.
Букінгемскі палац распавёў пра анкалагічны дыягназ Карла ў пачатку лютага. Яго хвароба была выяўлена ў студзені, калі ён праходзіў лячэнне ў сувязі з павелічэннем прастаты. Прадстаўнікі каралеўскай сям'і пацвердзілі, што ў Карла не рак прастаты.
У сакавіку таксама стала вядома, што анкалагічнае захворванне выяўлена і ў прынцэсы Уэльскай Кейт. Кенсінгтонскі палац абвясціў, што цяпер яна праходзіць раннія стадыі курсу прафілактычнай хіміятэрапіі.
У сувязі з гэтым яе муж, спадкаемца трона прынц Уэльскі Уільям, імаверна, будзе абмяжоўваць свае паездкі, каб заставацца разам з сям'ёй, але ён працягвае ўдзельнічаць у грамадскім жыцці.
Тым часам на працягу апошніх месяцаў на многіх публічных мерапрыемствах каралеўскую сям'ю прадстаўляла каралева Каміла, у тым ліку яна здзяйсняла паездкі, у якія павінен быў адправіцца яе муж.
Пакуль невядома, калі Карл і Кейт змогуць вярнуцца да актыўнай дзейнасці.
Цяпер чытаюць
За выбух у мінскім метро судзілі не толькі Канавалава і Кавалёва. Як склаўся лёс яшчэ трох фігурантаў справы?7
Каментары