Byłyja palitviaźni pieraadkryvajuć bar — tyja samyja «Banki-Butyłki», jakija zakryli paśla vykanańnia tam pieśni «Okiean Jelzi»
Minski bar «Banki-butyłki» akazaŭsia pad uvahaj siłavikoŭ paśla kancertu tam u žniŭni 2022 hoda. Na im śpiavačka Meryjem Hierasimienka vykanała pieśniu «Obijmi» hurta «Okiean Elzi», paśla čaho jaje zatrymali, jak i ŭładalnikaŭ bara Andreja i Maryju Žukoŭ. Ciapier stała viadoma, što hety ž bar znoŭ adkryjuć, ale ŭ Varšavie.
«My adradžajem toj samy minski bar», — napisaŭ u svaim instahramie juryst Illa Salej, taksama były palitviazień. Jon staŭ adnym z partnioraŭ u spravie pierazapusku razam z Meryjem i siamjoj Žukoŭ, a taksama inšymi «niepubličnymi asobami».
Novaja-staraja ŭstanova adkryje svaje dźviery ŭžo ŭ hetym miesiacy pad šyldaj «Buns&Bottles». Kamanda zaprašaje padpisvacca na ich instahram, kab nie prapuścić dakładny anons.
Nahadajem, paśla zatrymańnia za vykanańnie pieśni śpiavačku Meryjem dvojčy asudzili na 15 sutak pavodle administracyjnaha artykuła. Potym pierazatrymali ŭ miežach kryminalnaj spravy i źmiaścili ŭ SIZA.
20 studzienia 2023 hoda joj prysudzili try hady «chatniaj chimii». A ŭ studzieni 2024 hoda stała viadoma, što «Bajsoł» evakuiravaŭ dziaŭčynu ź Biełarusi.
Andrej Žuk i jahonaja žonka Maryja tady taksama atrymali «chatniuju chimiju».
Illa Salej, budučy advakatam Maryi Kaleśnikavaj, taksama prajšoŭ praz turmu: jaho zatrymali 9 vieraśnia 2020 hoda. Jon prachodziŭ padazravanym pa č. 3 art. 361 Kryminalnaha kodeksa (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś). U krasaviku 2021 hoda mieru strymańnia Saleja źmianili z chatniaha aryštu na zakład. Paźniej jon vyjechaŭ ź Biełarusi.
Aryštavany 75‑hadovy Źmicier Sańko — vieteran-vydaviec3
Kamientary