«Psichałahičny stan vielmi składany». Źjavilisia naviny pra palitźniavolenuju Šarendu-Panasiuk
Palitźniavolenaja Palina Šarenda-Panasiuk, jakuju dva tydni tamu źmiaścili ŭ SIZA zamiest vyzvaleńnia z kałonii, znachodzicca «ŭ vielmi ciažkim psichałahičnym stanie». Pra heta piša «Radyjo Svaboda» sa słoŭ jaje muža Andreja Šarendy.
Pavodle słoŭ Šarendy, niejkaja nienazvanaja im krynica bačyłasia z Palinaj u Homielskim SIZA i pieradała jamu śviežuju infarmacyju pra jaje stan:
«Z dobrych navinaŭ, što Palina žyvaja, z drennych — što jaje stan u psichałahičnym sensie vielmi i vielmi składany, ciažki. Jaje praciahvajuć mučyć, faktyčna katavać. Jak jašče heta nazvać, kali znoŭ nie vyzvalili, choć termin zakončyŭsia, a zakinuli ŭ śledčy izalatar i buduć znoŭ sudzić? Tolki katavańniem. I na svajakoŭ taksama maralna cisnuć».
Pavodle źviestak Andreja Šarendy, svajaki Paliny sprabavali pieradać joj charčovuju pieradaču, ale jaje nie pryniali.
«Znoŭ pryčyna, što nibyta joj užo niechta pieradaŭ 30 kiłahramaŭ praduktaŭ — normu na miesiac. Hetym razam nieviadomyja «dobrazyčliŭcy» prynieśli joj miech staroj morkvy. Jabłyk jašče niama, jak rabili letaś, dyk ciapier «dorać» morkvu. Ździekujucca z Paliny i jaje svajakoŭ. Heta jaŭna spłanavanaja, zakazanaja naviersie pravakacyja, jakoj jany metanakiravana dabivajuć nievinavataha čałavieka», — miarkuje Šarenda.
Maci dvaich dziaciej Palina Šarenda-Panasiuk była pieršapačatkova asudžanaja na dva hady pazbaŭleńnia voli. Potym jaje jašče dvojčy pakarali pa artykule 411 KK RB za «niepadparadkavańnie administracyi». Takim čynam, ahulny termin skłaŭ užo 4 całkam adbytyja hady pazbaŭleńnia voli.
Uvieś hety čas žančyna padviarhałasia mocnamu psichałahičnamu cisku i spahnańniam u kałonijach PK-4 i PK-24. Taksama źjaŭlalisia paviedamleńni, što jaje źbivali ŭ kałonii.
Peŭny čas tamu praŭładnyja kanały apublikavali «intervju» z Palinaj. U im jana skazała, što napisała prašeńnie ab pamiłavańni i spadziajecca na stanoŭčy vynik. Ale spadziavańni nie spraŭdzilisia: u dzień zakančeńnia terminu jaje znoŭ zatrymali, zavioŭšy novuju kryminalnuju spravu.
35 maładych biełarusaŭ i biełarusak, za jakimi varta sačyć: apublikavany pieršy śpis Next 3532
Kamientary