Duda: Hibrydnaja ataka na miažy ź Biełaruśsiu pieraškadžaje partniorstvu Polščy z Kitajem
Prezident Polščy ŭ Šanchai pa vynikach pieramovaŭ sa staršynioj KNR Si Czińpinam zajaviŭ, što biełaruskaja hibrydnaja ataka na miažy niehatyŭna adbivajecca na handlovym abmienie z Kitajem i pieraškadžaje realizacyi idei «Adzin pojas, adzin šlach».
Prezident Polščy Andžej Duda z 22 pa 26 červienia znachodzicca ź vizitam u Kitai. Tam jon, siarod inšaha, abmierkavaŭ sa staršyniom KNR Si Czińpiniem mihracyjny kryzis na miažy ź Biełaruśsiu i raskazaŭ pra hibiel polskaha žaŭniera paśla ataki mihranta, piša Radyjo Svaboda.
«Ja havaryŭ pra heta ŭ kantekście dvuchbakovych adnosin, jakija majem z Kitajem, toj palityki, jakuju my razam realizujem hadami, u pryvatnaści z pačatku majho prezidenctva, z 2015 hodu, heta realizacyja idei «Adzin pojas, adzin šlach», u jakoj Polšča mieła być partnioram Kitaja, takim aknom dla Kitaja ŭ Jeŭropu, nie tolki ŭ našu častku Jeŭropy, Centralnuju Jeŭropu, ale i ŭ ceły Jeŭraźviaz.
Tamu što ŭ naš bok iduć pramyja čyhunačnyja linii z Čendu, adzin z hetych čyhunačnych šlachoŭ idzie praz Ukrainu, i jon nie dziejničaje praz vajnu, a druhi idzie praź Biełaruś. Viadoma, biełaruskaja hibrydnaja ataka na našu miažu, na žal, mocna ŭpłyvaje na mahčymaści handlovaha abmienu i pieraškadžaje idei «Adzin pojas, adzin šlach». Ja padzialiŭsia hetymi faktami sa spadarom staršynioj Si Czińpinam», — skazaŭ Andžej Duda.
Raniej stała viadoma, što aficyjnaja Varšava razhladaje mahčymaść poŭnaha zakryćcia miažy ź Biełaruśsiu. Pra heta vykazaŭsia ministr zamiežnych spraŭ Polščy Radasłaŭ Sikorski.
«Uličvajučy dziejańni Biełarusi, my razhladajem mahčymaść zakryćcia ŭsich pamiežnych pierachodaŭ. Ciapier my vyśviatlajem, ci škodna heta dla ekanomiki. Finy zakryli pamiežnyja pierachody z Rasiejaj — i prablemy spynilisia», — zajaviŭ Sikorski.
Na siońnia na biełaruska-polskaj miažy dziejničaje adzin aŭtadarožny punkt propusku dla hruzavikoŭ i adzin dla lehkavikoŭ.
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary
Tak i ty zakroj pieriechody s rosijej, niedalekij. Tiebia žie FSB košmarit čieriez nielehałov. U nich u vsiech rosijskije vizy v pasportach stojat. Boišsia błokirovať kalininhradskuju obłasť, śvistun?