Pra mahčymy terakt na kancercie Tejłar Śvift u Vienie papiaredziła CRU. Takoje ž papiaredžańnie atrymlivała Rasija pierad «Krokusam»
CRU pieradało ŭładam Aŭstryi raźvieddanyja ab čatyroch padazravanych u padrychtoŭcy teraktu na kancercie Tejłar Śvift u Vienie, źviazanych z «Isłamskaj dziaržavaj», piša «Mieduza» sa spasyłkaju na The New York Times.
«Jany płanavali zabić vialikuju kolkaść ludziej, dziasiatki tysiač na hetym kancercie, i ja ŭpeŭnieny, mnohich amierykancaŭ», — skazaŭ namieśnik dyrektara CRU Devid Koen.
U niekatorych z zatrymanych byli znojdzienyja materyjały dla vyrabu bombaŭ, i jany mieli dostup da kancertnaj placoŭki ŭ Vienie. Pa słovach Koena, metaj napadu byŭ mienavita kancert Tejłar Śvift. Jon nie ŭdakładniŭ, adkul CRU atrymała danyja pra padazravanych.
Padobnyja papiaredžańni ab padrychtoŭcy teraktaŭ z boku jačejki IDIŁ pad nazvaj «Viłajat Charasan» atrymlivali ad CRU taksama ŭłady Irana i Rasii (pierad kancertam u «Krokus Sici Chole»). Adnak praduchilić hetyja ataki ŭłady nie zmahli.
Pa słovach Koena, takija papiaredžańni «nie zaŭsiody pryciahvajuć šmat uvahi». Ale dziejańni aŭstryjskich uładaŭ «byli inšymi».
Kancerty Tejłar Śvift u Vienie pavinny byli prajści 8, 9 i 10 žniŭnia na stadyjonie «Ernst Chapiel». Za dzień da pačatku palicyja paviedamiła ab zatrymańni dvuch padazravanych u padrychtoŭcy teraktu, paśla čaho tur byŭ admienieny.
Adzin z zatrymanych, 19-hadovy hramadzianin Aŭstryi, pavodle kiraŭnika hramadskaj biaśpieki MUS, «prysiahnuŭ na viernaść» IDIŁ. U nastupnyja dni byli zatrymanyja jašče dvoje padazravanych.
Tejłar Śvift, zaviaršyŭšy tur (paśla admieny ŭ Vienie ŭ jaje prajšli kancerty ŭ Łondanie), zajaviła , što nie kamientavała pahrozu da kanca svajho jeŭrapiejskaha šou, kab paźbiehnuć pravakacyj.
Kamientary