Jak budzie vyhladać Akademija KDB, jakuju budujuć na Załatahorskich mohiłkach

U prajektnaj dakumientacyi, jakuju atrymała i vyvučyła «Radyjo Svaboda», za nazvaj «šmatfunkcyjanalnaha budynku» chavajecca režymny navučalna-žyły kompleks z ułasnaj stałoŭkaj i spartovaj infrastrukturaj.

Pavialičyć

Kompleks składajecca z troch asnoŭnych častak: błoka A — navučalnaha korpusu ź internatam, błoka B — stałoŭki i błoka V — basejnu z spartovaj zalaj. Na aharodžanaj terytoryi abjekt praduhledžany kantrolna-prapuskny punkt z boku vulicy Załatoj Horki.

Hałoŭnaja častka kompleksu — BŁOK A. U tłumačalnaj zapiscy jon nazvany «navučalnym korpusam ź internatam». Heta šaścipaviarchovy budynak z padziemnym i techničnym uzroŭniami. Jaho ahulnaja płošča — amal 28,9 tysiačy kvadratnych mietraŭ. Prajektnaja kolkaść navučencaŭ — 1250 čałaviek, ź ich dla 627 praduhledžanyja miescy ŭ internacie.

Nižni, padziemny ŭzrovień błoka A, raźmieščany na hłybini piaci mietraŭ.

Tut zaprajektavanaja strałkovaja halereja płoščaj 597,8 m² i daŭžynioj kala 56 mietraŭ, asobny skład zbroi, dva pakoi dla jaje zachoŭvańnia i adzin dla jaje vydačy, skład RCHBA (radyjacyjnaj, chimičnaj i bijałahičnaj abarony), dva składy z paznakaj NZ (u vajskovaj terminałohii zvyčajna aznačaje niedatykalny zapas na vypadak nadzvyčajnaj situacyi), čatyry składy KES (u vajskovaj terminałohii aznačaje kvaterna-ekspłuatacyjnuju słužbu, jakaja adkazvaje za budynak, inžynernuju i haspadarčuju majomaść).

Pavialičyć

Astatniuju častku padziemnaha ŭzroŭniu zajmajuć techničnyja, składskija i bytavyja pamiaškańni dla piersanału. Siarod ich — składy «materyjalnaj majomaści», mužčynskaja i žanočaja harderobnyja dla 80 čałaviek absłuhovaha piersanału, skład łyžaŭ, a taksama debarkadar dla razhruzki aŭtamabilaŭ typu «Haziel-3302».

Padziemny parkinh u kompleksie, raźličanym na bolš jak tysiaču čałaviek, prajektam nie praduhledžany.

Pavialičyć

Na pieršym paviersie ŭ płanie paznačanyja post achovy, asobnyja pakoi dla zachoŭvańnia zbroi i mabilnych telefonaŭ, harderob, a taksama sistema kantrolu dostupu ŭ viestybiuli. Tut ža zaprajektavanyja kampjutarnyja kłasy, roznaha farmatu aŭdytoryi, trenažornaja zala i zala ahulnaj fizičnaj padrychtoŭki. Jość i ŭłasny miedyčny błok — kabiniety terapieŭta i stamatołaha, pracedurny pakoj.

Druhi pavierch — bolš administracyjny. Tut zapłanavana šmat kabinietaŭ, biblijateka, niekalki aŭdytoryjaŭ, kina-lekcyjnaja/aktavaja zala na 300 miescaŭ, a taksama dźvie kanfierenc-zali.

Asobnaje kryło adviedziena dla kiraŭnictva ŭstanovy. Pavodle prajektnaj dakumientacyi, tut praduhledžanyja dva kabinietnyja błoki płoščaj 104,5 i 93,5 m². Kožny ŭklučaje «kabiniet kiraŭnika», ułasnuju prymalniu, pakoj adpačynku i sanvuzieł z dušam. Zvažajučy na strukturu kiraŭnictva ANB i najaŭnaść tolki dvuch takich pamiaškańniaŭ, možna mierkavać, što hetyja pamiaškańni pryznačajucca dla dvuch kiraŭnikoŭ ustanovy — načalnika akademii Valancina Płatonava i jaho pieršaha namieśnika Hienadzia Krasko. Adnak u prajekcie nie paznačana, chto mienavita budzie karystacca hetymi pamiaškańniami.

Treci pavierch paznačany ŭ dakumientach jak techničny i amal nie maje voknaŭ. Tut znachodzicca nižni ŭzrovień dźviuch lekcyjnych aŭdytoryjaŭ na 150 čałaviek i techničnyja pamiaškańni.

Z čaćviortaha pavierchu pa šosty značnuju častku płoščy zajmaje internat, jaki sumiaščajecca z vyniesienymi ŭ asobnaje kryło navučalnymi kłasami i lekcyjnymi aŭdytoryjami. Na kožnym z troch pavierchaŭ pa 209 spalnych pakojaŭ — ahułam 627. Pakoi pieravažna čatyrochmiascovyja, jość i trochmiascovyja. Vynik padliku supadaje z prajektnaj jomistaściu internatu, paznačanaj u tłumačalnaj zapiscy.

Pavialičyć

BŁOK B — asobny adnapaviarchovy korpus stałoŭki z padvałam i dacham, jon taksama ŭklučaje spartovy kompleks.

Ahulnaja płošča 4,3 tysiačy kvadratnych metraŭ. Na pieršym paviersie zapłanavanyja try abiednyja zali — na 240, 88 i 12 miescaŭ, ahułam na 340 čałaviek. Pavodle dakumientaŭ, stałoŭka budzie mieć poŭny cykł pryhatavańnia ježy: haračy, chałodny, rybny, miasnyja cechi, cech harodniny, składy dla roznaha kštałtu praduktaŭ i śpiecyjaŭ, asobnaje pamiaškańnie dla raźbirańnia miasa, chaładzilnyja kamiery i techničnaje abstalavańnie.

Na «ekspłuatavanym dachu» budynku prajekt praduhledžvaje spartovy stadyjon ź biehavymi darožkami i placoŭkami dla mini-futbołu, baskietbołu, valejbołu, badmintonu i tenisu. Asobnuju častku dachu advodziać pad vuličnyja trenažery.

BŁOK V — dvuchpaviarchovy spartovy korpus z padziemnym techničnym uzroŭniem, ahulnaj płoščaj kala 2,8 tysiačy kvadratnych metraŭ. Na pieršym paviersie zaplanavany 25‑metrovy basejn, raździavalni, dušavyja i dźvie saŭny. Na druhim — spartovaja zala płoščaj 634 kvadratnyja metry z dapamožnymi pamiaškańniami.

Razam ahulnaja płošča tolki troch asnoŭnych błokaŭ składaje kala 36 tysiač kvadratnych metraŭ. Zvonku kompleks płanujuć vykanać pieravažna ŭ šerych, śvietła-šerych tanach ź biełymi karnizami. Ścieny ź vientylavanymi fasadami z kieramahranitu. Tolki dla błoka A zakupnaja dakumientacyja praduhledžvaje kala 7,9 tysiačy m² kieramahranitnaha pakryćcia, za jakoje addaduć amal 3,11 miljona rubloŭ (prykładna 1,04 miljona dalaraŭ).

Budujuć navučalnuju ŭstanovu KDB za biudžetnyja srodki. Jak vynikaje z dadzienych dziaržaŭnych inviestycyjnych prahramaŭ, suma vyłučanych na budaŭnictva hrošaj składaje nie mienš za 25,7 miljona rubloŭ.

Architekturny prajekt navučalnaha korpusu ź internatam raspracavaŭ «Instytut Biełdziaržprajekt». Hałoŭnaja inžynierka prajektu — Julija Sierada. Prajekty basiejnu i kantrolna-prapusknoha punktu vykanała pryvatnaje pradpryjemstva «Homieljinterprajekt». Hałoŭnym architektaram prajektu navučalnaha korpusu ź internatam paznačany architektar «Instytutu Biełdziaržprajekt» Valery Kucko. U 2012 hod jon atrymaŭ Dziaržaŭnuju premiju Biełarusi za stvareńnie «Miensk-Areny», a siarod jahonych prajektaŭ — śpiecyjalizavany licej MUS na vulicy Stachanaŭskaj, 13 i siaredniaja škoła milicyi na 500 navučencaŭ na vulicy Filimonava.

• 0
• 0
• 0
• 1
• 0
• 1
• 12
• 0