Łancužki pastavak jak instrumient źniščeńnia. Padziei ŭ Livanie pakazali, što luby tavar na płaniecie moža stać zbrojaj

Izrailskaja masavaja ataka na bajevikoŭ livanskaj radykalnaj hrupoŭki «Chiezbała» praz hłabalnyja łancužki pastavak cyvilnych tavaraŭ pakazała zusim novy ŭzrovień viadzieńnia hibrydnaj vajny, i hety vopyt abaviazkova piarojmuć inšyja, adznačajuć surazmoŭcy ahienctva Bloomberg ź liku byłych i dziejnych dziaržsłužboŭcaŭ ZŠA.

«Kali Izrail zdolny praviarnuć takoje, to i Kitaj zmoža. Doŭhija i nieprazrystyja mižnarodnyja łancužki pastavak tavaraŭ pakidajuć prabieły, jakimi možna zanadta lohka skarystacca, i nam razam z sajuźnikami patrebna vypracavać stratehiju ich zakryćcia», — kaža člen pałaty pradstaŭnikoŭ ZŠA Set Moŭłtan.

Padobny punkt hledžańnia padzialaje i Mełani Chart, hałoŭny dyrektar Hłabalnaha analityčnaha centra pa prablematycy Kitaja pry Atłantyčnym saviecie NATA. Na jaje dumku, hłabalnyja łancužki pastavak, jakija dapamahajuć vyrablać tannyja tavary i stymulujuć rost suśvietnaj ekanomiki, mohuć stać zbrojaj u rukach zamiežnych supiernikaŭ z-za technałahičnaj uzajemazaležnaści krain.

«Kali vy zaležycie ad resursaŭ i technałohij inšych dziaržaŭ, vy dajecie im svabodu dziejańniaŭ i dostup da svaich sakretaŭ. Padziei ŭ Livanie — heta demanstracyja taho, jak vyhladaje pieratvareńnie technałahičnaj zaležnaści ŭ zbroju», — adznačaje Mełani Chart.

U toj ža čas byłyja pradstaŭniki amierykanskaj vyviedki i adzin z byłych čynoŭnikaŭ paviedamili Bloomberg, što situacyi ź pierachopami cyvilnych tavaraŭ i ŭmiašańniami ŭ łancužki pastavak va ŭsim śviecie adbyvajucca pastajanna, z bolšaha praź dziejnaść śpiecsłužbaŭ roznych krain. 

«Praniknieńni ŭ łancužki pastavak — davoli standartny instrumient raźviedvalnych słužbaŭ. U apošnija niekalki hadoŭ my bačyli, što padobnaje vykarystoŭvajecca ŭ asnoŭnym dla zboru infarmacyi i špijanažu (Bloomberg dadaje, što padobnym mietadam karystajecca i amierykanskaja vyviedka), ale, jak my niadaŭna bačyli, instrumient taksama možna vykarystoŭvać dla metanakiravanych zabojstvaŭ», — dzielicca adzin z byłych supracoŭnikaŭ Fiederalnaha biuro rasśledavańniaŭ ZŠA.

Pa danych FBR, Kitaj raspracoŭvaje płany pa dystancyjnym paškodžańni amierykanskaj krytyčnaj infrastruktury praz ekspartavanyja ŭ ZŠA kitajskija tavary, kampanienty i technałohii, kab u vypadku ci pry pahrozie vajny «pasprabavać vyklikać paniku siarod amierykanskaha nasielnictva i tym samym parušyć volu krainy da supracivu».

U toj ža čas technałahičnaja zaležnaść ZŠA ad Kitaja ŭ niekatorych krytyčnych i vajennych siektarach tolki ŭzrastaje, a Kitaj u svaju čarhu aktyŭna sprabuje pazbavicca ad zaležnaści ad zachodnich technałohij, piša Bloomberg.

Apytanyja ahienctvam ekśpierty pa biaśpiecy padkreślivajuć, što vialikaje mnostva pryładaŭ u śviecie mahčyma ŭžo majuć ubudavanyja škodasnyja prahramy i što ad mocnaj uzajemazaležnaści krain śvietu vielmi składana ŭciačy, bo heta — nieadjemnaja častka sučasnaj mižnarodnaj realnaści, dzie zaŭsiody isnujuć popyt i prapanova.

Adzinaje, što rajać ekśpierty, heta jašče bolšaje ŭmacavańnie kaardynacyi i siabroŭskich adnosin z krainami-sajuźnikami, kab lepš abaraniać ułasnyja suvierenitety.

• 1
• 0
• 1
• 0
• 1
• 0
• 1
• 0