«Vusy Mulavina» i «Krynž Jeŭfrasińni»: błohier AjCiBarada zrabiŭ Alias pa-biełarusku
Biełarus Alaksiej Kartyńnik, jaki ŭ siecivie viadomy jak błohier AjCiBarada, «navajbkodziŭ» biełaruskuju viersiju viadomaj hulni «Alijas», dzie treba tłumačyć zahadanyja słovy, nie nazyvajučy ich, piša vydańnie Spravy.io.
«Siadzieli niadaŭna ź siabrami, zachacieli pahulać u «Alijas». Palez šukać biełaruskamoŭnuju viersiju — i nie znajšoŭ. Daviałosia hulać u rasiejskamoŭnuju, što zusim nie hud», — uzhadvaje Alaksiej.
Pakul išła hulnia, błohier adkryŭ kampjutar, zapuściŭ Claude Code i daŭ zadańnie «zrabi Alias pa-našanskamu». U vyniku da kanca partyi ŭžo byŭ hatovy pratatyp, a na nastupny dzień Alaksiej razam z Claude i Junie za niekalki hadzin davioŭ hulniu da prezientabielnaha stanu. Ciapier jana dastupnaja na sajcie alias.itbeard.com.
Praviły hulni:
Adzin čałaviek tłumačyć słova, astatnija ŭ kamandzie adhadvajuć. Samo słova i adnakarennyja nazyvać nielha, pierakładać na inšuju movu taksama. Čas abmiežavany, tamu navat prostaje słova robicca vielmi niaprostym.
Unutry hulni 886 biełaruskich słoŭ, jakija prydumaŭ štučny intelekt, try ŭzroŭni składanaści i mahčymaść hulać adnoj kamandaj ci sabrać da piaci kamandaŭ dla spabornictva. Hulać možna prosta ŭ braŭziery na telefonie, biez spampoŭvańnia i rehistracyi, a kod hulni — adkryty.
Taksama Alaksiej Kartyńnik dadaŭ krychu pryjemnaj drobiazi:
«Jość režym dla biełaruskaj łacinki, možna vybrać śvietłuju abo ciomnuju temu. A nazvy kamandaŭ tutaka kštałtu «Vusy Mulavina» i «Krynž Jeŭfrasińni» — kali zrazumieli, pra što havorka, to haračaje vam vitańnie!»
Paźniej błohier dadaŭ u «Alijas pa-biełarusku» režym 18+, u jakim jość dadatkovyja 106 słoŭ.
Pra pamyłki ŭ słovach abo ŭ pracy servisu błohier prosić pisać jamu asabista abo paviedamlać na GitHub.
Ale heta nie pieršaja viersija hulni ŭ słovy, jakuju «navajbkodzili» biełarusy — jak pisali «Spravy» jašče ŭ žniŭni, biełarus Aleś, jaki pracuje mieniedžaram u IT-startapie, taksama sutyknuŭsia z tym, što niama jak pahulać u Alias pa-biełarusku. I ŭ vyniku z dapamohaj ŠI-servisaŭ stvaryŭ svaju hulniu tlumach.app.
35 maładych biełarusaŭ i biełarusak, za jakimi varta sačyć: apublikavany pieršy śpis Next 35
U postapakaliptyčnym viesternie Guns of Eschaton budzie biełaruskaja mova. Łakalizacyju prafinansavali dva biełarusy
Ad Baldur's Gate 3 da Minecraft: źjaviŭsia sajt-katałoh, dzie sabrany 180 videahulniaŭ pa-biełarusku
Kamientary