Dyrektar Ejfielevaj viežy pajšoŭ u adstaŭku paśla relihijnaha skandału
Jaho kampanija zahadała žančynam pakinuć pracoŭnyja miescy dziela sustrečy ź induisckaj hrupaj.
Kiraŭnik kampanii SETE, jakaja kiruje paryžskaj Ejfielevaj viežaj, zajaviŭ, što pakidaje svaju pasadu. Patryk Branka Ruvijo pryniaŭ takoje rašeńnie na fonie abureńnia z-za rasparadžeńnia prybrać žančyn z pracoŭnych miescaŭ padčas sustrečy z členami induisckaj relihijnaj hrupy, piša Bi-bi-si.
SETE zajaviła, što Branka Ruvijo, jaki ŭznačalvaŭ kampaniju z 2018 hoda, pakinie pasadu ŭ kancy hetaha hoda.
Jak paviedamlaje kampanija, u vyniku ŭnutranaha rasśledavańnia vyśvietliłasia, što pry arhanizacyi sustrečy byli dapuščanyja «pamyłki ŭ pracy», jakija pryviali da adchileńnia žančyn ad absłuhoŭvańnia naviedvalnikaŭ. Hety krok SETE nazvała niedapuščalnym.
Padčas vizitu, jaki adbyŭsia ŭ pačatku vieraśnia, na Ejfielevu viežu padnialisia kala 100 členaŭ induisckaj hrupy «Bačasanvasi Akšar Purušoam Svaminarajan Sanstcha» (BAPS).
Relihijny ruch BAPS byŭ zasnavany ŭ pačatku XX stahodździa. Padčas jaho mierapryjemstvaŭ žančyny i mužčyny zaŭsiody pavinny znachodzicca asobna adzin ad adnaho, dla hetaha taksama isnujuć asobnyja ŭvachody ŭ chramy.
Jak tłumačyła SETE, delehacyja členaŭ BAPS paprasiła arhanizavać vizit takim čynam, kab źvieści da minimumu «kantakty z žančynami». Pry hetym kampanija zajaviła, što «na takija ŭmovy zhadžacca było nielha».
Strajk i ŭsieahulnaje abureńnie
Pradstaŭniki prafsajuza rabotnikaŭ Ejfielevaj viežy zajavili, što «žančyn paprasili pakinuć svaje pracoŭnyja miescy», u vyniku čaho jany adčuli siabie prynižanymi. Pavodle słoŭ supracoŭnikaŭ, žančynam, jakija pracujuć na viežy, «taksama zahadali nie prachodzić praz peŭnyja miescy, kali tam znachodziłasia delehacyja».
Vizit členaŭ BAPS pryvioŭ da zakryćcia Ejfielevaj viežy, pakolki jaje supracoŭniki abviaścili strajk u znak pratestu suprać rašeńnia kiraŭnictva.
Staršynia Nacyjanalnaha schodu Francyi Jael Braŭn-Pivie paśla vizitu zajaviła: «Nie mahu pahadzicca z tym, što žančyn prymušajuć adyści, kab zadavolić patrabavańni zamiežnych naviedvalnikaŭ».
Mer Paryža, sacyjalist Emaniuel Hrehuar, nazvaŭ rašeńnie SETE «absurdnym, niespraviadlivym i niedapuščalnym» i zahadaŭ pravieści dva asobnyja rasśledavańni.
Staršynia rady dyrektaraŭ SETE Aryel Viejl u aŭtorak zajaviŭ, što zapatrabavaŭ pravieści ŭ kampanii dadatkovyja prahramy navučańnia pa hiendarnaj roŭnaści.
«Nastupnyja niekalki miesiacaŭ dazvolać nam najlepšym čynam padrychtavać źmienu kiraŭnictva», — rastłumačyŭ jon, čamu dyrektar kampanii nie sychodzić nieadkładna.
BAPS raniej pryniesła prabačeńni za «pryčynienyja pieražyvańni i niazručnaści». Jana dadała, što «vieryć va ŭniviersalnyja kaštoŭnaści ŭzajemnaj pavahi i słužeńnia hramadstvu».
Na svaim sajcie arhanizacyja apisvaje siabie jak «duchoŭnaje tavarystva, ruchalnaj siłaj jakoha źjaŭlajucca vałanciory i jakoje nakiravana na ŭdaskanaleńnie hramadstva» praź induisckija kaštoŭnaści.
Chramy BAPS isnujuć pa ŭsim śviecie, u tym liku ŭ Łondanie, Łos-Andželesie i Sidnei.
Jaje vieravańni zasnavanyja na vučeńni łorda Svaminarajana — duchoŭnaha nastaŭnika, jaki žyŭ u kancy XVIII stahodździa i daŭ abiet biasšlubnaści. Paśladoŭniki BAPS ličać jaho reinkarnacyjaj Višnu — induisckaha boha-zachavalnika.
BAPS nastojvaje, što padzieł mužčyn i žančyn u ruchu isnuje dziela dabrabytu samich žančyn.
Adnak krytyki ličać, što vieravańni XVIII stahodździa nie pavinny być kiraŭnictvam da dziejańnia ŭ sučasnym śviecie, a vydaleńnie žančyn dziela toj ci inšaj relihijnaj praktyki — heta dyskryminacyja.
Kamientary