Abvinavačanaha ŭ zamachu na Zachara Prylepina asudzili da pažyćciovaha źniavoleńnia
Vajskovy sud u Rasii prysudziŭ da pažyćciovaha termina Alaksandra Piermiakova, abvinavačanaha pavodle spravy ab zamachu na rasijskaha piśmieńnika i ŭdzielnika vajny suprać Ukrainy Zachara Prylepina. Pryznačyć takoje pakarańnie Piermiakovu prasiła prakuror, piša Bi-bi-si.
6 maja 2023 hoda ŭ Nižaharodskaj vobłaści vybuchnuŭ aŭtamabil Prylepina. Jaho achoŭnik Alaksandr Šubin zahinuŭ na miescy, a sam piśmieńnik atrymaŭ surjoznyja ranieńni. Śledčy kamitet Rasii raspačaŭ tady spravu ab terakcie.
Piermiakoŭ byŭ adzinym abvinavačanym. Pavodle viersii śledstva, u 2022 hodzie jon, znachodziačysia va Ukrainie, atrymaŭ ukazańni ab padryvie aŭtamabila Prylepina i zajechaŭ u Rasiju praz Łatviju.
Sam Prylepin admoviŭsia ŭdzielničać u sprečkach i paprasiŭ pryznačyć Piermiakovu pakarańnie zhodna z zakanadaŭstvam.
Abvinavačany ŭ sprečkach vykazvacca nie staŭ, padčas sudovaha śledstva jon taksama admoviŭsia ad dačy pakazańniaŭ. Śledstva zajaŭlała, što paśla zatrymańnia jon pryznaŭsia, što ździejśniŭ złačynstva pa zadańni ŭkrainskich śpiecsłužbaŭ.
Siastra Piermiakova na dopycie raspaviadała, što jašče ŭ školnyja hady jon byŭ asudžany va Ukrainie pavodle artykułaŭ ab chulihanstvie i razboi, a ŭ 2015 hodzie vajavaŭ na baku samaabvieščanaj DNR.
Uviesnu 2022 hoda, sa słoŭ siastry, jon pierajechaŭ u Chmialnickuju vobłaść Ukrainy «jak pierasialeniec». Svaju pajezdku ŭ Rasiju jon patłumačyŭ svajačcy tym, što chacieŭ «zarabić i być dalej ad vajny».
Słužba biaśpieki Ukrainy admaŭlałasia kazać pra dačynieńnie abo niedatyčnaść da zamachu na Prylepina — jak heta amal zaŭsiody robiać śpiecsłužby ŭ padobnych vypadkach.
Ciapier čytajuć
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak7
Kamientary