Biełaruski dalnabojščyk skraŭ z šviedskaha porta kantejnier z bananami. A ŭ im paŭtary tony kakainu na $156 miljonaŭ
Kiroŭcu fury na litoŭskich numarach zatrymali na paromie, jaki išoŭ u Kłajpiedu. Razam ź im pierad sudom stali jašče piać čałaviek.
U Šviecyi 35‑hadovamu hramadzianinu Biełarusi vystavili abvinavačańnie ŭ asabliva ciažkim narkazłačynstvie. Pavodle materyjałaŭ śledstva, u mai 2025 hoda jon biez dazvołu zabraŭ z porta Chielsinhborha refryžeratarny kantejnier z bananami, u jakim było schavana kala 1,5 tony kakainu. Pra heta paviedamiła Mytnaja słužba Šviecyi (Tullverket).
14 maja 2025 hoda supracoŭniki porta Chielsinhborha paviedamili mytnikam, što ŭ ich skrali refryžeratarny kantejnier. Pavodle partovych sistem, napiaredadni ciahač z paŭpryčepam na litoŭskich numarach pahruziŭ kantejnier i biez dazvołu pajechaŭ ź im. Mytniki vyśvietlili imia kiroŭcy.
U toj ža čas imparcior sadaviny znajšoŭ kantejnier kala svajho terminała ŭ Chielsinhborhu. Płomba była sarvanaja. Unutry zastalisia banany, ale, pavodle mytnikaŭ, miesca tam było značna bolš, i častka hruzu źnikła. Paźniej na stajancy ŭ Łandskrunie znajšli dva jeŭrapalety i dźvie płomby.
«My razumieli, što treba chutka zatrymać biełaruskaha kiroŭcu, pakul jon nie pakinuŭ krainy. My daviedalisia, što ciahač na litoŭskich numarach znachodzicca na paromie Nils Dacke, jaki vyjšaŭ z Treleborha ŭ Karłschamn. Pierad tym jak parom pakinuŭ havań Styleryd, kab iści dalej u Kłajpiedu, hrupa mytnikaŭ padniałasia na bort i zatrymała 35‑hadovaha kiroŭcu ŭ restaranie», — raskazaŭ kiraŭnik hrupy kryminalnaha adździeła mytni «Poŭdzień» Robin Šostad.
Pavodle śledstva, furu pierahaniali na stajanku ŭ Łandskrunie, dzie jaje sustreli dźvie mašyny i pierahruzili narkotyki. Na zapisie kamiery vidać, jak bolš za 100 čornych miaškoŭ pieranosiać u bieły arandavany furhon. Mytniki padličyli, što ŭ kožnym miašku było 15 kiłahramaŭ kakainu — ahułam kala 1500 kiłahramaŭ. Kakain zavieźli ŭ kvateru ŭ Malmio.
Praź niekalki dzion u kvateru ŭłamalisia i skrali častku kakainu. Paśla ŭzłomu tam znajšli amal 232 kiłahramy narkotykaŭ i takija ž pustyja čornyja miaški, jak na videa z Łandskruny.
Pavodle acenki mytnikaŭ, ahulny košt kakainu ŭ roźničnym prodažy — bolš za $156 miljonaŭ.
«Heta žachliva vialikaja kolkaść kakainu. Pry hetym treba ŭličvać i ŭsiu škodu, jakuju heta nanosić našamu hramadstvu: ciažkaja arhanizavanaja złačynnaść i vydatki na achovu zdaroŭja», — skazaŭ Robin Šostad.
Abvinavačańni ŭ sudzie Malmio vystavili 12 lutaha 2026 hoda. Pa słovach prakurorki Karyn Łundstrem Krun, akramia biełarusa, u asabliva ciažkim narkazłačynstvie abvinavačvajuć troch hramadzian Narviehii 30, 33 i 18 hadoŭ, jakich źviazali ź pierahruzkaj kakainu ŭ Łandskrunie, i 32‑hadovaha hramadzianina Ałbanii, u kvatery jakoha, pavodle abvinavačańnia, zachoŭvali kakain. Prakurorka patrabuje, kab paśla adbyćcia pakarańnia ŭsich piaciarych vysłali sa Šviecyi i zabaranili im viartacca.
Šostaha abvinavačanaha, 32‑hadovaha mužčynu, padazrajuć u tym, što jon razam ź inšymi ŭłamaŭsia ŭ kvateru ŭ Malmio i skraŭ nie mienš za 270 kiłahramaŭ kakainu.
Kamientary