Niadaŭna kamanda Volhi Harbunovaj paviedamiła, što marafonu salidarnaści ŭ padtrymku palitźniavolenych «Nam nie ŭsio adno» ŭ hetym hodzie nie budzie. Pry hetym adbudziecca estafieta salidarnaści Voices Across Borders — «Hołas cieraź miežy», jakuju ŭ tym liku ładziać BYSOL, ByHelp, Dissidentby, Narodnyja Ambasady i «Kraina dla žyćcia». Z-za hetaha pačali hučać roznyja teoryi pra ŭnutrany kanflikt i kankurencyju, jakaja źniesła z dystancyi «słabiejšaha». «Naša Niva» raspytała pradstaŭnikoŭ abodvuch bakoŭ pra situacyju.
Siarod pryčyn admieny marafonu ŭ hetym hodzie Harbunova z kamandaj «21 maja» ahučyli «niedaacenku ŭździejańnia na ich apošnich padziej i siłavikoŭ, jakija zabrali i biez taho abmiežavanyja vałanciorskija siły», a taksama «adsutnaść resursaŭ (maralnych, časavych) dla praviadzieńnia takoj pracy».
Zdavałasia b, pry najaŭnaści žadańnia, ale niedachopie resursaŭ možna abjadnacca z kalehami. Takija sproby byli, ale nie skłałasia.
«U dadzienaj situacyi kaalicyja admoviłasia supracoŭničać z našaj kamandaj u adkaz na naša zaprašeńnie partniorstva ŭ marafonie, jak i letaś», — padzialilisia ŭ kamandzie «21 maja».
Pry hetym pradstaŭniki estafiety salidarnaści Voices Across Borders kažuć, što ź ich boku nieadnarazova byli prapanovy pa tym, kab abjadnać abodva farmaty, ale namahańni «byli marnymi»:
«My papracavali ŭ składzie marafonu ŭ minułym hodzie, pabačyli što heta nie toj uzrovień arhanizacyi i kaardynacyi, da jakoha my pryzvyčajenyja, i pajšli šukać inšych partnioraŭ. Tak źjaviłasia estafieta.
Było šmat pytańniaŭ paśla pieršaha marafona. I pracedurnych, i arhanizacyjnych. Jany nie raźviazalisia z toj kamandaj. Ja tak razumieju, što i ŭnutry tam było ŭsio niaprosta. Pra što śviedčyć toje, što jany admovilisia ad praviadzieńnia svajho farmatu».
Kankurencyja jak hałoŭny faktar prablem aktyvistami adnaznačna asprečvajecca.
«Abodva iventy byli važnymi, mieli padobnuju metu, mieli absalutna roznuju metavuju aŭdytoryju, praciahłaść i farmat. Tak što składana skazać, što hetyja padziei kankurentami», — adznačajuć u «21 maja».
Tak ci inakš, ich kamanda rychtuje ciapier novy prajekt pa marafonie, jaki moža być prezientavany ŭžo paśla Novaha hoda.
Nahadajem, marafon salidarnaści ŭ padtrymku palitviaźniaŭ i ich siemjaŭ «Nam nie ŭsio adno» prajšoŭ z 29 pa 30 lipienia 2023 hoda. Jon byŭ inicyjavany Volhaj Harbunovaj, jakaja na toj momant zajmała pasadu pradstaŭnicy pa sacyjalnaj palitycy Abjadnanaha pierachodnaha kabinieta. Dziakujučy marafonu, atrymałasia sabrać 574 tysiačy jeŭra. Nieŭzabavie na ŭdzielnikaŭ inicyjatyvy zaviali kryminalnuju spravu za finansavańnie «ekstremisckaj dziejnaści» — paśla taho, jak sud Centralnaha rajona Minska pryznaŭ videakantent anłajn-marafona tak zvanymi «ekstremisckimi materyjałami».
Kamientary