Lada pačała vypuskać siedan «biznes-kłasu». Što za jon i kolki kaštuje
Dniami na AŭtaVAZie pačałasia pramysłovaja vytvorčaść novaj madeli — biznes-siedana Lada Aura. Ale novaha ŭ joj nie šmat.
Novaja daŭžynia — novaja madel?
Novaja madel Lada pabudavanaja na bazie Lada Vesta. Hałoŭnaje adroźnieńnie «novaj» madeli ad staroj — daŭžynia. Kuzaŭ u Aura na 250 mm daŭžejšy, čym u Vesta. Adpaviedna pavialičyłasia i kalosnaja baza. Za košt hetaha sałon staŭ bolš prastornym dla zadnich pasažyraŭ.
Adlehłaść ad piarednich kresłaŭ da zadniaha siadzieńnia składaje 1060 mm. AŭtaVAZ nazyvaje heta najlepšym pakazčykam prastory dla pasažyraŭ u kłasie.
Siarod aryhinalnych elemientaŭ, aproč dachu i dnišča aŭtamabila, u Aura svaje zadnija dźviery, kryły i adpaviednyja elemienty ŭ tylnaj častcy sałona.
Pačynajučy ad centralnaj stojki da šyldzika na piarednim bampiery — heta taja ž samaja Lada Vesta.
Vytvorca robić akcent na tym, što ŭ adroźnieńnie ad Vesta pry vytvorčaści Aura ŭ topavych kamplektacyjach buduć vykarystoŭvać naturalnuju skuru. Aproč hetaha, u aŭtamabili budzie palepšanaja šumaizalacyja i śpiecyjalnyja nałady padvieski, što pavinna pavysić uzrovień kamfortu dla pasažyraŭ. Taksama ŭ Aura buduć ustaloŭvacca dyski z novym dyzajnam.
U techničnym płanie praryvu nie adbyłosia. Pad kapotam u Aura budzie toj ža samy 1,8-litrovy bienzinavy ruchavik mahutnaściu 122 k.s., jaki budzie pracavać z aŭtamatyčnaj karobkaj pieradač.
Nie abyšłosia biez Pucina
Atrymlivajecca, što ŭ płanie dynamiki razhonu Aura budzie sastupać Vesta, bo novaja madel budzie važyć bolš.
Adnak, niahledziačy na toje, što vypusk novaj madeli — heta daloka nie praryŭ, u sieryjnym zapusku Aura ŭdzielničaŭ Uładzimir Pucin. Praŭda, pa videasuviazi.
«Siońnia my pačynajem sieryjnuju vytvorčaść novaj madeli — siedana biznes-kłasa Lada Aura. Uładzimir Uładzimiravič, vy ŭžo mieli mahčymaść asabista, za styrnom, aprabavać hety aŭtamabil u lipieni. I voś, praz dva z pałovaj miesiacy, Aura ŭžo na kanviejery», — adrapartavaŭ pierad Pucinym prezident AŭtaVAZa Maksim Sakałoŭ.
Što pa cenach?
Ceny na Lada Aura buduć ad 2,6 miljona da 2,8 miljona rasijskich rubloŭ (kala 26,7 — 29 tysiač dalaraŭ). Kolki jany buduć kaštavać u Biełarusi i kali źjaviacca ŭ našych dyleraŭ, pakul nieviadoma.
Dla paraŭnańnia, ceny na Vesta z anałahičnym matoram i AKPP, jak u Aura, u Biełarusi pačynajucca z 49 500 rubloŭ (kala 15 200 dalaraŭ). Samaja darahaja Vesta u kuzavie siedan kaštuje 53 900 rubloŭ (kala 16 550 dalaraŭ). Lada Vesta vypuskajuć z 2015 hoda.
U Biełarusi pačali źbirać kitajskija mikraaŭtobusy raniej nieviadomaha nam brendu. Što za jany i kolki kaštujuć
«Za vychadnyja na «Malinaŭcy» pradali ŭsiaho niekalki aŭto». Jak biełaruski aŭtarynak žyvie biez rasijan
Machlary, jakija pradajuć tannyja šyny praz Instagram, rychtujucca da novaha siezona. Jak nie trapić na padman
Kamientary