«Za vychadnyja na «Malinaŭcy» pradali ŭsiaho niekalki aŭto». Jak biełaruski aŭtarynak žyvie biez rasijan
Praź źmieny ŭ rasijskim zakanadaŭstvie rasijanie bolš nie mohuć jeździć u Biełaruś pa śviežapryhnanyja aŭto ź Jeŭropy i ZŠA, jak heta było raniej. «Naša Niva» pacikaviłasia, jak takija novaŭviadzieńni paŭpłyvali na biełaruski aŭtamabilny rynak.
Za subotu na rynku pradałosia ŭsiaho niekalki mašyn
Čałaviek, jaki zajmajecca pierahonam aŭto ź Jeŭropy, kaža, što na minułym i pazaminułym tydni na ŭsim rynku «Malinaŭka» za subotu pradalisia ŭsiaho dźvie-try mašyny.
Paśla apošniaj chvali rostu popytu z boku rasijan na biełaruskim rynku nastupiła zacišša.
«Kali źjavilisia naviny pra toje, što z 1 kastryčnika ŭtylzbor u RF buduć naličvać pa novych praviłach, to rasijanie znoŭ masava łamanuli da nas pa mašyny. Pryčym nie tolki pierakupščyki, ale i zvyčajnyja pakupniki. Ale heta, vidać, byŭ apošni taki skačok popytu», — miarkuje pierahonščyk.
Ź jaho słoŭ, užo bližej da kanca vieraśnia ažyjataž z boku rasijan źnik.
«Apošnija dva tydni, možna skazać, cišynia, bo ciapier śviežapryhnanyja aŭto mohuć kuplać tolki biełarusy, ale i jany nie takija aktyŭnyja, jak raniej. Sankcyi nie dazvalajuć pryhaniać mašyny z abjomam ruchavika, bolšym za 1,9 litra. Raznastajnaści na rynku stała mienš, tamu i z boku biełarusaŭ popyt krychu źniziŭsia», — adznačaje surazmoŭca.
Sankcyi? Niekatoryja i nie čuli
Mužčyna kaža, što, choć sankcyi dziejničajuć užo nie pieršy miesiac, da jaho dahetul źviartajucca ludzi, jakija chočuć pryhnać aŭto z ruchavikami 2.0-3.0 pad kapotam.
«Niekatoryja, jak vynikaje z razmovy, zusim nie čuli, što takija mašyny bolš nielha pryhaniać u Biełaruś. Jość i tyja, chto dumaje, što sankcyi — heta ŭsio fihnia. Što, nibyta, možna dać paru sotniaŭ chabaru mytniku, i ciabie prapuściać. Ale ž viadoma, što heta tak nie pracuje.
Dastavić padsankcyjnyja mašyny možna tolki praz Turcyju. Sam takim nikoli nie zajmaŭsia, ale viedaju, što heta dadaje kala 5-7 tysiač jeŭra da koštu aŭto. I kali nazyvaješ takija ličby, to žadańnie pryhnać 2-litrovuju Audi ci BMW u ludziej adrazu źnikaje».
«Rasijan nie bačyli ŭžo tydni dva»
Ciapierašniuju situacyju ŭ aŭtapierahonnym biznesie surazmoŭca nazyvaje horšaj za tuju, što była ŭ davajennym 2021 hodzie.
«Reč u tym, što tyja ž rasijanie da nas patrochu jeździli pa mašyny i da vajny, bo ŭ nas isnavaŭ 140-y ŭkaz, jaki dazvalaŭ ekanomić na mycie. Biezumoŭna, heta nie było nastolki masavaj źjavaj, jak u 2022-2024 hadach, ale tyja pakupniki byli. Ciapier ža my možam raźličvać tolki na pakupnikoŭ ź Biełarusi».
Ułaśnik aŭtakamisa taksama adznačaje, što ŭ apošnija tydni popyt na aŭto pamienšaŭ, bo advalilisia rasijskija pakupniki.
«Rasijan na našaj placoŭcy my nie bačyli ŭžo tydni dva, choć da hetaha jany časta pryjazdžali pa śviežyja mašyny. Ciapier pracujem vyklučna ź miascovymi klijentami. Tamu miarkujem, što abarot zaraz budzie na 20-30 pracentaŭ mienšy, čym raniej».
Biznesmien zhadvaje, što samymi prybytkovymi byli druhaja pałova 2022 hoda i ŭvieś 2023 hod. Ź jaho słoŭ, u pikavyja miesiacy na pakupnikoŭ z RF prychodziłasia bolš za 50% pakupak.
«Sioleta takoha ŭžo nie było. Byli tolki dva ŭsploski popytu. Pieršy — kali stała viadoma, što praź Biełaruś bolš nielha budzie haniać padsankcyjnyja aŭto (z abjomam ruchavika bolš za 1,9 litra, hibrydy, elektramabili), a druhi — voś niadaŭna pierad pavyšeńniem utylzboru».
Chto źbiare viarški z rynku
Mužčyna ličyć, što ciapier lepš za ŭsio zarablać na pierahonie aŭto buduć tolki tyja, chto zmoža pieraklučycca na pryhon aŭto pad zamovu dla rasijskich klijentaŭ, bo tady pakupnik płacić lhotny ŭtylzbor.
«Dla aŭtakamisaŭ i tych, chto pryvyk pryhaniać mašyny ŭ Biełaruś i ŭžo tut ich pierapradavać, tłustyja časy skončylisia. Biez reekspartu ŭ Rasiju pierahonny biznes budzie vymušany ścisnucca, bo ŭnutrany biełaruski rynak nie taki vialiki i zamožny».
Ź jaho słoŭ, biełaruskich pakupnikoŭ, kali i cikaviać śviežapryhnanyja aŭto, to koštam da 15-20 tysiač dalaraŭ. A bolš za pałovu pakupak adbyvajecca pry dapamozie lizinhu abo kredytu.
Raźviedka ZŠA: Biełaruś stała pieradavym vajskovym płacdarmam Rasii24
Kamientary
Eto, možno skazať, biełorusskaja diviersija dla russkoho mira...)))