Jak ušanavać pamiać rodnych, kali nie možaš naviedać ich mahiły — rajać śviatary
Sioleta Dziady adznačać u adzin dzień i kataliki, i pravasłaŭnyja. Što rabić tym, chto znachodzicca na emihracyi i daloka ad mohiłak, dzie pachavanyja blizkija?
Dźmitryjeŭskaja baćkoŭskaja subota ŭ pravasłaŭnych u 2024 hodzie prypadaje na tuju ž datu, što i Dzień pamiaci pamierłych u katalikoŭ — 2 listapada. U biełarusaŭ hetaje śviata maje narodnuju nazvu «Dziady» i da 1998 hoda jano było vychodnym, a zatym było admienienaje ŭkazam Łukašenki, piša katolik.life.
U hety dzień (u katalikoŭ taksama — 1 listapada, uračystaść Usich śviatych) pryniata naviedvać mahiły svaich blizkich, kab ušanavać ich pamiać i pamalicca ab viečnym žyćci dla ich.
Napiaredadni hetych dat pryniata navodzić paradak na mahiłach blizkich: rabić uborku, abnaŭlać kvietki. Ale jak pastupić tym, chto pa roznych pryčynach apynuŭsia daloka ad mahił svaich rodnych i nie moža ich naviedać? Paradami padzialilisia katalickija śviatary.
Pa słovach adnaho ź ich, možna pasačyć za luboj čužoj zakinutaj mahiłaj na mohiłkach taho horada, dzie čałaviek žyvie ciapier:
«Heta budzie vielmi dobrym učynkam i vyrazam pamiaci pra našych blizkich, jakija čakajuć Uvaskrašeńnia», — paraiŭ svaim parafijanam probašč u Vilni.
Śviatar, jaki apiakuje adnu ź biełaruskich supołak u Polščy, adznačyŭ, što vyrazam lubovi da bližniaha słužyć taksama kłopat pra inšych biełarusaŭ, mahiły jakich užo niama kamu naviedvać ź ich rodnych, i malitva za ich:
«Tamu, navat kali my žyviem u miescy, dzie niama pachavańniaŭ našych svajakoŭ, my možam naviedać prynamsi mahiły tych ludziej, jakija blizkija nam pa nacyjanalnaj prykmiecie».
U vypadku, kali ŭ akruzie niama mahił suajčyńnikaŭ — histaryčnych asob, to abjektam kłopatu mohuć stać, naprykład, voinskija pachavańni savieckich abo inšych sałdat, albo lubyja mahiły, jakija patrabujuć naviadzieńnia paradku.
Ale samaje hałoŭnaje — malitva. U kłopacie pra svaich blizkich pamierłych varta padać zapisku ŭ tym chramie, jaki vy naviedvajecie, zamović intencyju śviatoj imšy pra ich, achviaravać indulhiencyju.
Ciapier čytajuć
«Kazaŭ, što źniščyć mianie, bo ŭ jaho suviazi i pahony». Byłaja žonka vajuje z padpałkoŭnikam. Taho panizili da ŭčastkovaha16
Kamientary