Kubrakoŭ davodziŭ, što milicyjant Zhirski nie datyčny da bandy nalotčykaŭ. Ciapier taho sudziać — pahražaje da 20 hadoŭ

Vychodzić na finišnuju pramuju adna z samych hučnych kryminalnych spraŭ hoda — historyja bandy nalotčykaŭ u bałakłavach, jakija rabavali dalnabojnikaŭ pa ŭsioj Biełarusi. Bolšaść udzielnikaŭ atrymali minimalnaje pakarańnie, a voś ich kiraŭniku, milicyjanieru Michaiłu Zhirskamu, najchutčej, daduć ahromnisty termin.

U mai 2024 hoda siłaviki adrapartavali ab zatrymańni piaci čałaviek, jakija abkradali pryparkavanyja fury. Pakul kiroŭca spaŭ u kabinie, złačyncy ŭzłomvali zamok hruzavoha adsieka, zahružali svoj mikraaŭtobus kradzienym tavaram i źjazdžali ź miesca złačynstva.

«Jany dziejničali ŭ Bresckaj, Mahiloŭskaj, Minskaj i Homielskaj abłaściach», — paviedamlała tady pres-słužba MUS.

«Naša Niva» tady nazvała imia kiraŭnika bandy — 27-hadovaha supracoŭnika kryminalnaha vyšuku Dokšyckaha RAUS Michaiła Zhirskaha.

Jon nie tolki davodziŭ udzielnikam bandy infarmacyju pra chod rasśledavańniaŭ kryminalnych spraŭ pa ździejśnienych epizodach i prymaŭ udzieł u płanavańni rabavańniaŭ, ale i sam udzielničaŭ u hetych nalotach. U kvatery Zhirskaha znajšli inšuju, adroznuju ad tabielnaj, zbroju, jakaja fihuravała ŭ zajavach paciarpiełych. A taksama adzieńnie z aryjencirovak i bałakłavu.

Paśla hetaha ŭ Dokšycach źmianili milicejskaje kiraŭnictva — jak dapuścili situacyju?

Ale publična kiraŭnictva MUS tady rašuča abvierhła infarmacyju ŭ niezaležnych ŚMI. Ministr Ivan Kubrakoŭ tady vystupiŭ ź videazvarotam: maŭlaŭ, banda była, ale nijaki milicyjanier u jaje nie ŭvachodziŭ. Pra los Michaiła Zhirskaha jon, naturalna, pramaŭčaŭ.

Jak vyśvietliłasia, siłaviki vyrašyli vydzielić spravu Zhirskaha ŭ asobnuju vytvorčaść — kab nie plamić viedamstva.

Tym časam astatnich nalotčykaŭ paśpieli asudzić. Prysud atrymaŭsia šakavalna humannym. Pakul internet-kamientataram dajuć realnyja terminy ŭ kałonii, čatyrom rabaŭnikam fur dali… chatniuju chimiju. I tolki adzin ź ich, recydyvist, atrymaŭ 4 hady kałonii.

Admietna, što ŭ ich prysudzie fihurujuć kradziažy tolki ŭ Homielskaj i Minskaj abłaściach — choć startava im inkryminavali pryhody i ŭ Bresckaj, i ŭ Mahiloŭskaj abłaściach.

A 22 listapada pačali sudzić Michaiła Zhirskaha. U adnoj kletcy ź im siadzić siabar dziacinstva — Alaksandr Pierapiečka.

Pra 27-hadovaha Alaksandra Pierapiečku viadoma mieniej. Adsłužyŭ u vojsku, žyŭ u ahraharadku Biarozki pad Dokšycami. Naprykancy 2022 hoda jaho asudzili za kradziež da hramadskich rabot. Pa našych źviestkach, jon płanavaŭ naloty razam sa Zhirskim i vykonvaŭ rolu kiroŭcy, jaki zabiraŭ i vyvoziŭ na prodaž narabavanaje.

Pavialičyć

Zhirskamu i Pierapiečku inkryminujuć nie prosta kradziažy, a značna bolš surjoznaje abvinavačvańnie.

Heta «vymahalnictva, ździejśnienaje hrupaj asobaŭ, abo z pahrozaj zabojstvam ci pryčynieńniem ciažkich cialesnych paškodžańniaŭ, abo z metaj atrymańnia vyhady ŭ bujnym pamiery» (č. 3 art. 208 KK) — ad 5 da 15 hadoŭ kałonii.

Taksama ŭ abvinavačańni (mahčyma, tolki ŭ Zhirskaha) jość «złoŭžyvańnie ŭładaj abo słužbovymi paŭnamoctvami» (č. 2 art. 424 KK) — ad 2 da 6 hadoŭ kałonii.

Mietadam składańnia pakarańnia Zhirski moža atrymać da 20 hadoŭ źniavoleńnia.

Admietna, što Zhirskaha i Pierapiečku — nahadajem, abodva žyli i pracavali ŭ Dokšyckim rajonie, — sudziać u Niaśvižskim rajonie.

Što ž jany mahli rabić pad Niaśvižam? Najchutčej, ich źviazvaje z hetym rehijonam tolki toje, što praź jaho terytoryju prachodzić trasa M1 i jość stajanka dla fur, jakija i rabavali pad kantrolem milicyjaniera Zhirskaha.

• 6
• 0
• 4
• 5
• 1
• 3
• 10
• 0