«Zabojstvy ŭ adnym budynku», «Rypli», «Siohun». Top sieryjałaŭ, jakija vyjšli ŭ hetym hodzie

Režym (The Regime)

Roza z «Tytanika» ŭžo nie taja. Viasnoj my pabačyli sieryjał «Režym», dzie Kiejt Uinślet źniałasia ŭ roli paranaidalnaha kanclera vydumanaj jeŭrapiejskaj krainy. Žanr prajekta — čornaja kamiedyja, i Uinślet vydatna padtrymlivaje jaho svajoj hulnioj.

Jaje hierainia kiruje krainaj i pry hetym baicca navat źmienaŭ u vilhotnaści ŭ svaim pałacy. Akramia hetaha, jana zachoŭvaje trup svajho baćki ŭ šklanoj skryni i razmaŭlaje ź im u kryzisny čas — jak bačycie, biez varjactva tut nie abyšłosia.

Zabojstvy ŭ adnym budynku (Only Murders in the Building)

U vieraśni vyjšaŭ čaćviorty siezon hetaha niezvyčajnaha detektyva. U im umieła kambinujuć kryminał i daścipny humar, a potym ščodra azdablajuć heta niečakanymi pavarotami siužetu. Hałoŭnyja roli vykonvajuć Styŭ Marcin, Sielena Homies i Marcin Šort.

Atrymlivajecca dušeŭny detektyŭ, jaki spadabajecca i tym, chto nie lubić kroŭ dy saśpiens. Asobnaja razynka — uzrost hierojaŭ: sieryjał paćviardžaje dumku, što i ŭ 70 možna być aktyŭnym, znachodzić svajo kachańnie i navat ratavać siabroŭ ad złačyncaŭ.

Asudžanyja na słavu (Those About to Die)

Spadabaŭsia «Hładyjatar-2»? Mahčyma, vam budzie pa dušy i hety sieryjał. Heta ekranizacyja knihi pra hładyjatarskija bai ŭ staražytnym Rymie, dzie rymskaha impieratara hraje lehiendarny Entani Chopkins.

«Asudžanyja na słavu» — jarki sieryjał z bahatymi dekaracyjami i kaściumami. Što da siužetu, jon moža nahadać suśviet «Hulni tronaŭ»: čakajcie šmat intryh dy fizičnaha hvałtu.

Dzień Šakała (The Day of the Jackal)

Biez trylera hetaja padborka była b niapoŭnaj. Abirajem «Dzień Šakała» — historyju pra najomnaha zabojcu, za jakim pa ŭsioj Jeŭropie haniajecca brytanskaja ahientka. Darečy, u pošukach Šakała jana traplaje navat u Smarhoń, voś tolki takoj Smarhoni vy dakładna nie bačyli.

Hałoŭnaja zorka — łaŭreat «Oskara» Edzi Redmejn, jaki cudoŭna adpracoŭvaje svaju rolu. Stralanina i ekšn, viadoma, taksama buduć.

Dom Cmoka (The House of the Dragon)

Razam z hetym sieryjałam adznačym i inšyja fentezi-prajekty 2024-ha — druhi siezon «Vaładara piarścionkaŭ» i «Dziunu: Praroctva». Što da samoha «Doma Cmoka», prykvieła «Hulni tronaŭ», to heta ŭžo druhi siezon sieryjała, i pieršy mieŭ vialiki pośpiech.

Čakajcie ŭ druhim siezonie epičnyja batalnyja sceny i praciah pałacavych intryh. Dy i prosta budzie pryhoža, choć i zaciahnuta pa siužecie.

Spahadliviec (Sympathiser)

Sieryjał «Prychilnik» vyjšaŭ na amierykanskim servisie HBO, jon pryśviečany vajnie ŭ Vjetnamie.

Na pieršy pohlad, heta špijonski tryler pra padvojnaha ahienta, jaki pracuje i na Zachad, i na vjetnamskich kamunistaŭ. Ale taksama heta sieryjał pra emihracyju dy pošuki siabie ŭ novaj krainie — biełarusy adčujuć mocnaje dežaviu.

Zadača troch ciełaŭ (3 Body Problem)

Sakavik padaryŭ nam jakasnuju fantastyku, źniatuju pa biestsielery kitajskaha piśmieńnika Lu Cysinia.

Sieryjał pačynajecca z taho, što ŭ 1960-ch dziaŭčyna stanovicca śviedkam zabojstva svajho baćki — prafiesara-fiziki — chunvejbinami. Jaje adpraŭlajuć u pracoŭny łahier, a paśla — na sakretnuju radyjołakacyjnuju bazu. Paralelna razvaročvajucca dziejańni ŭ naš čas — zahadkava pamirajuć navukoŭcy.

U siužecie jość miesca kitajskaj kulturnaj revalucyi 60-ch, astrafizicy, virtualnaj realnaści. Karaciej, historyja składanaja. Ale kali ŭ vas chopić na jaje advahi, budziecie ŭznaharodžanyja intelektualnym vidoviščam.

Aleniania (Baby Reindeer)

Chit ad Netflix. Komik Ryčard Hed napisaŭ historyju pra toje, jak jon padčas pracy ŭ pabie sustrakaje žančynu, i paźniej jana pačynaje nastojliva damahacca jaho ŭvahi. Pavodle słoŭ Heda, jaki jašče i sam źniaŭsia ŭ «Alenianiaci», Marta dasłała jamu tysiačy paviedamleńniaŭ praz roznyja kanały, u tym liku i sotni hadzin hałasavych paviedamleńniaŭ. Ale historyja komika, jakaja pačynajecca jak kamiedyja, akazvajecca dramatyčnaj.

Chutka paśla premjery ŭ publičnaść vyjšła Fijona Charvi — mierkavana, Hed ekranizavaŭ jakraz historyju znajomstva ź joj. Charvi abvinavaciła Heda ŭ chłuśni i zapatrabavała ź jaho $170 miljonaŭ.

Rypli (Ripley)

2024-ty — hod detektyvaŭ u sieryjalnym śviecie, i čamu b nie adznačyć samy pryhožy ź ich? «Rypli» — čarhovaja ekranizacyja ledź nie kłasičnaha siužetu pra abajalnaha machlara Toma Rypli, vy možacie jaho pamiatać u paŭnamietražkach z Metam Dejmanam.

Ciapier Toma Rypli hraje irłandziec Endru Skot (Maryjarci ź sieryjała «Šerłak»). A jašče «Rypli» — heta prosta vielmi pryhoža: prajekt źniaty ŭ čorna-biełych kolerach pad stylovy saŭndtrek, i vas dakładna začaruje apieratarskaja praca.

Siohun (Shōgun)

Jašče adna azijackaja historyja ŭ našaj padborcy. «Siohun» — ekranizacyja knihi pra vydumanaha anhličanina Džona Błektarna, jaki trapiŭ u Japoniju ŭ pačatku 17 stahodździa, kali kraina była achutanaja mižusobnymi vojnami.

Błektarn zdoleŭ adaptavacca ŭ japonskim hramadstvie, ale razam z hetym akazaŭsia ŭ centry pałacavych intryh. Sieryjał atrymaŭsia takim udałym, što pieramoh ažno ŭ 18 naminacyjach premii «Emi», to-bok sieryjalnaha «Oskara».

• 2
• 1
• 0
• 1
• 0
• 0
• 0
• 0