Astranomy adkryli novy asteroid. A paśla akazałasia, što heta aŭtamabil, jaki lataje ŭ kosmasie
Novamu niabiesnamu ciełu ŭžo paśpieli dać imia i ŭnieści ŭ aficyjny katałoh, ale potym znachodku terminova prybrali, što źbiła z pantałyku astranamičnuju supolnaść.
U pačatku studzienia turecki astranom vyjaviŭ pablizu Ziamli novaje niabiesnaje cieła, jakoje było pryniata za asteroid i potym aficyjna ŭniesiena ŭ katałoh aŭtarytetnaha Harvard-Śmitsanaŭskaha centra astrafiziki ŭ Kiembrydžy. Abjekt na adlehłaści 240 tysiač km ad Ziamli — što bližej da nas, čym Miesiac — atrymaŭ nazvu 2018 CN41.
Adnak praz usiaho niekalki hadzin paśla zaniasieńnia ŭ katałoh było abvieščana ab vydaleńni zapisu, piša vydańnie Newsweek.
«Asteroidam» akazaŭsia asabisty čyrvony kabryjalet miljardera Iłana Maska, madel Tesla Roadster, jaki razam z maniekienam u skafandry byŭ zapuščany na rakiecie Falcon Heavy u kosmas u pačatku 2018 hoda.
Sam kabryjalet, pa padlikach navukoŭcaŭ, naŭrad ci ŭpadzie na Ziamlu (šaniec — 6%), ale kali i ŭpadzie, to tolki praź niekalki miljonaŭ hadoŭ, a pry padzieńni z vysokaj vierahodnaściu całkam zharyć u atmaśfiery.
Pryniaćcie aŭtamabila Iłana Maska za realny asteroid choć i pazabaŭlała astranomaŭ, ale iznoŭ uzdymaje prablemu vysokaj zabrudžanaści arbity Ziamli roznymi štučnymi abjektami (frahmienty kaśmičnych rakiet, staryja ci źniščanyja spadarožniki, aščepki ad sutyknieńniaŭ pamiž usimi imi i hetak dalej).
Heta moža źbivać z pantałyku astranamičnuju supolnaść pry vyznačeńni realnych ci patencyjnych pahroz płaniecie, asabliva ŭličvajučy toje, što na Ziamli dahetul nie isnuje adzinaha centra infarmavańnia pra ŭsie štučnyja abjekty ŭ kosmasie, adznačajuć navukoŭcy.
Ciapier čytajuć
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary