Blue Origin Džefa Biezasa ŭpieršyniu zapuściła rakietu na arbitu. U SpaceX źjaviŭsia surjozny kankurent

Rakieta New Glenn startavała z kasmadroma na mysie Kanavierał u Fłarydzie a 02:02 pa miascovym časie.

New Glenn, nazvanaja ŭ honar Džona Hlena (pieršaha amierykanskaha astranaŭta, jaki vyjšaŭ na arbitu Ziamli bolš za 60 hadoŭ tamu), prajšła liniju Karmana, mižnarodna pryznanuju miažu kaśmičnaj prastory, paviedamili ŭ kampanii.

Jak i kankurenty z SpaceX Iłana Maska, Blue Origin chacieła pasadzić rakietu-nośbit, jakaja vyvieła New Glenn u kosmas, na pasadačnuju płatformu ŭ akijanie, ale hetaja častka misii nie ŭdałasia. Razhonny błok byŭ stračany paśla adździaleńnia ad rakiety.

Blue Origin kidaje vyklik Iłanu Masku ŭ baraćbie za panavańnie ŭ kosmasie. Abiedźvie kampanii raspracoŭvajuć samyja mahutnyja na siońniašni dzień rakiety-nośbity. Biezas u hetaj honcy apynuŭsia ŭ stanoviščy dahaniataha, i paśpiachovy zapusk New Glenn dla jaho — vialiki krok napierad. «Usio tolki pačynajecca», — skazała pradstaŭnica Blue Origin paśla zapusku.

Iłan Mask užo vitaŭ pośpiech Blue Origin u svajoj sacsietcy X. « Vinšuju z dasiahnieńniem arbity ź pieršaj sproby!»— napisaŭ jon. Biezas zasnavaŭ kampaniju Blue Origin 25 hadoŭ tamu, zajaviŭšy, što choča, kab «miljony ludziej pracavali i žyli ŭ kosmasie».

Na praciahu mnohich hadoŭ kampanija adpraŭlała da miažy ziamnoj atmaśfiery nievialikuju rakietu New Shepard. Na joj adpraŭlalisia pasažyry i karysnyja hruzy, u tym liku i sam Biezas u 2021 hodzie.

Biezas pakinuŭ pasadu hienieralnaha dyrektara Amazon u 2021 hodzie, kab zasiarodzicca na pracy ŭ Blue Origin. Upłyŭ Biezasa i jaho pryznačeńnie novaha kiraŭnictva Blue Origin, padobna, źmianiła kulturu kampanii i paskoryła raspracoŭku New Glenn, ličyć karespandent Bi-bi-si pa pytańniach navuki Pałab Hoš. Padychod SpaceX da raspracoŭki kaśmičnych aparataŭ prykmietna adroźnivajecca ad NASA abo luboj inšaj pryvatnaj kampanii.

Normaj u industryi ličycca dakładnaja raspracoŭka i testavańnie, inžyniery taksama imknucca minimizavać ryzyki pry stvareńni sistem. SpaceX, naadvarot, chutka ŭkaraniała inavacyi, chutka ciarpieła niaŭdačy i chutka na ich vučyłasia: tolki ŭ minułym hodzie jana ździejśniła 134 zapusku.

Pry raspracoŭcy sistem SpaceX pad nazvaj Falcon i Starship rakiety rehularna vybuchali, ale kožny vyprabavalny palot prachodziŭ lepš papiaredniaha. U vyniku kampanija imklivymi tempami raspracoŭvała novyja, bolš tannyja sposaby vyvadu aparataŭ u kosmas. Rakieta New Glenn mahutniej samaha papularnaha stvareńnia SpaceX, Falcon 9.

Jana taksama moža nieści bolš spadarožnikaŭ, i Biezos choča vykarystoŭvać jaje ŭ ramkach svajho prajekta Kuiper, metaj jakoha źjaŭlajecca razhortvańnie tysiač nizkalotnych spadarožnikaŭ dla šyrokapałosnaj internet-suviazi. Hety prajekt budzie naŭprost kankuravać z servisam Starlink Maska.

Adnak Starship — novaja rakieta kampanii Maska — pieraŭzychodzić New Glenn pa mahutnaści i karysnaj nahruzcy. U čaćvier čakajecca jaje siomy vyprabavalny palot.

Niekatoryja ekśpierty śćviardžajuć, što paśpiachovaja rakieta New Glenn stvoryć realnuju kankurencyju pamiž dźviuma kampanijami i moža źnizić košt kaśmičnych apieracyj. Histaryčna zasvajeńnie kosmasu viadziecca ŭ asnoŭnym na dziaržaŭnyja srodki. Ale amierykanskaje kaśmičnaje ahienctva NASA ŭsio čaściej zaklučaje kantrakty z pryvatnymi kampanijami na pastaŭku rakiet i inšych kaśmičnych pasłuh.

SpaceX Iłana Maska ŭžo atrymała kantrakty na miljardy dalaraŭ, a jahonyja ciesnyja stasunki z abranym prezidentam ZŠA Donaldam Trampam mohuć dapamahčy jašče bolš umacavać kampaniju.

• 4
• 0
• 0
• 0
• 0
• 0
• 0
• 0