Anhlikanski śviatar natchniŭsia prykładam Maska i zrabiŭ padobny žest. Carkva adreahavała imhnienna i stroha

Anhlikanski śviatar, pradstaŭnik pravaj Partyi niezaležnaści Vialikabrytanii (UKIP) Kiełvin Robinsan paŭtaryŭ žest Iłona Maska, jaki toj zrabiŭ padčas inaŭhuracyi prezidenta ZŠA Donalda Trampa 20 studzienia.

Žestam, jaki karystalniki sacsietak interpretavali jak «nacysckaje pryvitańnie», śviatar zaviaršyŭ svaju pramovu na nacyjanalnym samicie za žyćcio ŭ Vašynhtonie. Videa vystupu jon apublikavaŭ na svajoj staroncy ŭ sacsietcy X.

«Kožnaja kraina ŭ Jeŭropie prymaje śmierć. Amieryka, nakolki ja baču, źjaŭlajecca adzinaj krainaj, jakaja praciahvaje zmahacca za žyćcio. I heta zaležyć ad vas. Niachaj Boh dabrasłavić vas za toje, što vy robicie. Kali łaska, praciahvajcie heta rabić», — havoryć Robinsan na videa.

Paśla hetaha jon paŭtaryŭ padobny da «nacysckaha pryvitańnia» žest amierykanskaha miljardera sa słovami: «Ja spadziajusia, što zmahu vas padbadzioryć, i majo serca z vami». Zała adkazała jamu avacyjami.

U kamientary da videa na svajoj staroncy anhlikaniec paskardziŭsia, što atrymaŭ sotni zvankoŭ, kamientaroŭ i paviedamleńniaŭ ad «vielmi ŭzłavanych, złych, brydkich levych».

«Jany časta robiać mienavita toje, u čym vas abvinavačvajuć. Ja nie nacyst. Ale ja daruju vam vaša nievuctva. Majo serca źviartajecca da vas!» — napisaŭ Robinsan.

Anhlikanskaja katalickaja carkva adreahavała na skandalny videazapis i paviedamiła, što licenzija Robinsana była anulavanaja i jon bolš nie źjaŭlajecca śviatarom AKC. Členy Kalehii biskupaŭ zajavili, što sproby Kiełvina Robinsana zasłužyć dobrazyčlivaść amierykanskich paśladoŭnikaŭ pravaj ideałohii niesumiaščalnyja sa śviatarskim paklikańniem.

«My razumiejem, što heta nie prosta administracyjnaja sprava. Chałakost byŭ epizodam nieapisalnaha žachu, raźviazanym režymam złych ludziej. My asudžajem nacysckuju ideałohiju i antysiemityzm va ŭsich jaho formach. I my vierym, što tyja, chto imituje nacysckaje pryvitańnie, navat jak žart ci sprobu «patrolić» svaich apanientaŭ, prymianšajuć žach Chałakostu i prymianšajuć achviary tych, chto zmahaŭsia ź vinavatymi ŭ im. Takija dziejańni škodnyja, raźjadnoŭvajuć i supiarečać pryncypam chryścijanskaj miłasernaści», — zajavili ŭ carkvie.

Raniej viadomy pradprymalnik, multymiljarder Iłan Mask u dzień inaŭhuracyi Donalda Trampa 20 studzienia vystupiŭ z pramovaj, u zaviaršeńni jakoj dvojčy prykłaŭ pravuju ruku da hrudziej i rezkim žestam vykinuŭ jaje ŭvierch. Pry hetym Mask skazaŭ: «Majo serca z vami».

Paśla taho, jak žest biznesmiena paraŭnali z nacysckim pryvitańniem, Mask zajaviŭ: «Napadki ŭ styli «Vy ŭsie Hitlery» ŭžo tak nadakučyli».

U adroźnieńnie ad anhlikanskaha śviatara Kiełvina Robinsana, dla Maska nijakich niehatyŭnych nastupstvaŭ jahony ŭčynak pakul nie mieŭ.

• 10
• 1
• 3
• 8
• 0
• 1
• 0
• 1