«Chacieŭ chajpu, a atrymaŭ abvinavačańnie ŭ prapahandzie nacyzmu». Hutarka ź biełarusam, jaki namalavaŭ zihujučaha Maska ŭ centry Varšavy

Epatažnaja asoba

Maksimu 33 hady. U Biełarusi jon skončyŭ kaledž mastactvaŭ imia Achremčyka, potym VNU pa śpiecyjalnaści dyzajnier. Ź listapada 2020 hoda jon žyvie i pracuje ŭ Varšavie. Pahadziŭsia pahavaryć pra svoj hučny ŭčynak z umovaj — nie choča pakazvać tvar i nazyvać proźvišča. Rodnyja chłopca žyvuć u Biełarusi, jamu samomu na radzimie pahražaje palityčny pieraśled.

«Ja dyzajnier i mastak 3D. A hrafici — majo chobi. Hetym ja nie zarablaju. Ja nie chaču nanosić škodu budynkam, majomaści, vybiraju niejkija ścieny i pavierchni, na jakich maluju. Mahu adreahavać na niejkija emacyjnyja rečy abo palityčnyja naviny. Niadaŭna pračytaŭ navinu, što Iłan Mask choča kupić apartamienty ŭ samym darahim domie Varšavy na vulicy Złotaj, 44. Mnie zaŭsiody Mask zdavaŭsia epatažnaj asobaj. A tut jašče na inaŭhuracyi Donalda Trampa jon vyciahnuŭ pravuju ruku i zrabiŭ dziŭny žest. Ščyra kažučy, ja chacieŭ chajpanuć na hetym i nabrać padpisčykaŭ», — tłumačyć Maksim.

Chłopiec raspaviadaje, što pierad vychadam «u horad» zrabiŭ niekalki papiarednich nakidaŭ u płanšecie. U subotu ŭviečary, prykładna ŭ 21 hadzinu, znajšoŭ prydatnaje miesca. Nasuprać chmaračosa na Złotaj, 44, — na vulicy Emilii Plater, 47, pamiž dźviuma dźviaryma, była čystaja ściana.

«Malavaŭ ja chutka, chvilin 15, jašče try chviliny — i skončyŭ by. Vyjavu paśpieŭ zrabić i adzin vyraz napisać — «Make Poland great». Druhi nie paśpieŭ dapisać, bo ŭ hety čas pobač prachodziŭ palicejski patrul, i jany mianie «pryniali». Palicejskija pačali vyśviatlać maju asobu. Biełaruskaha pašparta ŭ mianie z saboj nie było, tolki časovaje paśviedčańnie, jakoje vydajuć na čas razhladu dakumientaŭ na mižnarodnuju abaronu. Ale jano było praterminavanaje», — raspaviadaje Maksim.

Prapahanda nacyzmu ŭ publičnym miescy

Maksim raskazvaje, što 1 listapada 2024 hoda ŭ jaho skončyŭsia termin dziejańnia dazvołu na žycharstva ŭ Polščy, a kantraktu na novuju pracu, jaki b dazvoliŭ jaho padoŭžyć, nie było. Chłopiec šukaje pastajannuju pracu, pakul zarablaje časovymi zakazami. U žniŭni jon padaŭ dakumienty na mižnarodnuju abaronu, ale dziejučych dakumientaŭ jašče nie atrymaŭ. Časovaje paśviedčańnie asoby vydajecca na try miesiacy, ale časam Upraŭleńnie ŭ spravach zamiežnikaŭ nie paśpiavaje za hety čas pryniać rašeńnie.

Pavialičyć

Pakolki dakumient Maksima byŭ praterminavany, palicejskija nadzieli na jaho kajdanki i pavieźli ŭ pastarunak vyśviatlać asobu.

«Adzin palicejski pavodziŭ siabie pa-chamsku, adkryta demanstravaŭ niepavahu da mianie. Skazaŭ, što ja pavinien zapłacić 2 tysiačy złotych, nibyta ja nanios škodu budynku. I jašče, što ja namalavaŭ toje, što jany nazyvajuć «ziha» — «simvał rymskaha salutu». I nibyta hetym ja asensavana prapahanduju idei nacyzmu ŭ publičnaj prastory. Ja aburyŭsia, maŭlaŭ, heta hłupstva! Palicejski patrabavaŭ, kab ja padpisaŭ dakumient, bo była poźniaja subotniaja noč. My doŭha dyskutavali. Mnie było strašna, što mohuć departavać», — pryznajecca Maksim.

Chłopiec dadaje, što ŭ adnu hadzinu nočy jaho pieraviali ŭ pastarunak, abšukali, zabrali šnurki. Adnak abychodzilisia vietliva. Navat knihu Stendala na polskaj movie dali pačytać, ranicaj pakarmili śniadankam.

«U niadzielu dniom mianie znoŭ pryvieźli ŭ pastarunak. Sa mnoj razmaŭlaŭ užo inšy aficer. Jon taksama kazaŭ, što moj malunak — prapahanda nacyzmu ŭ publičnym miescy. Ja tłumačyŭ, što ŭ mianie nie było takoha namieru, heta art-postar. U vyniku ja ŭ statusie padazravanaha. Palicejski skazaŭ čakać na praciahu 14 dzion pozvy ŭ sud. Paraiŭ taksama šukać advakata, bo tolki advakat moža aznajomicca z dakumientami», — raspavioŭ Maksim.

• 0
• 0
• 2
• 13
• 0
• 1
• 0
• 0