Vytvorca papularnaj haziroŭki pajšoŭ z Rasii paśla pačatku poŭnamaštabnaj vajny. Ale Coca-Cola viartajecca na pryłaŭki kram.
Rasija pačała zakuplać napoi Coca-Cola, Fanta i Sprite, a taksama enerhietyki ŭ režymu talibaŭ u Afhanistanie.
Pasoł Rasii ŭ Kabule Dźmitryj Žyrnoŭ raskazaŭ pra ekanamičnaje supracoŭnictva z Talibanam.
«Rasija kuplaje afhanskija śpiecyi, hazavanyja i enerhietyčnyja napoi, lekavyja travy — łavandu, čabor, sałodku. Nu i kazany, viadoma, dla płovu», — raskazaŭ Žyrnoŭ RIA «Novosti».
Hałoŭnymi artykułami ekspartu Afhanistana ŭ Rasiju źjaŭlajucca suchafrukty i razynki. Taliby taksama naładzili vyvaz u Rasiju chromavych rudaŭ i kancentrataŭ, minierałaŭ, rubinaŭ i izumrudaŭ. Pavodle słoŭ pasła, heta šostaja častka impartu.
Na rasijskich markietpłejsach užo možna znajści aryhinalnuju pradukcyju Coca-Cola z Afhanistana. Pieršy zavod Coca-Cola ŭ krainie pačaŭ pracavać jašče ŭ 2006 hodzie. Jaho adkryŭ eks-prezident Afhanistana Chamid Karzaj. Pradpryjemstvam, na jakim vyrablałasia da 120 młn butelek hazavanych napojaŭ u hod, vałodała miascovaja kampanija Habib Gulzar Non-Alcoholic Beverages Ltd.
Paśla pačatku poŭnamaštabnaj vajny Rasii suprać Ukrainy The Coca-Cola Company zharnuła biznes u Rasii i prypyniła prodaž svajoj pradukcyi ŭ krainie. Rasijskaje padraździaleńnie źmianiła nazvu i zapuściła vytvorčaść napoju «Dobryj Cola». Jaho receptura i smak adroźnivajucca ad aryhinała.
Taliban, jaki zachapiŭ uładu ŭ Afhanistanie paśla sychodu adtul amierykanskich vojskaŭ u 2021 hodzie, u Rasii dahetul ličycca terarystyčnaj arhanizacyjaj. Pry hetym Kreml naroščvaje supracoŭnictva z režymam talibaŭ.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary