Kryścina Cimanoŭskaja prakamientavała zajavu Śledčaha kamiteta i «pierapisku» ź Iharam Turam

Nahadajem: niadaŭna spartoŭka Kryścina Cimanoŭskaja daviedałasia, što jaje były muž Arsienij Zdanievič źnianacku viarnuŭsia na radzimu.

Lohkaatletka śćviardžaje, što mužčyna prysvoiŭ sabie čužyja hrošy — i jaje, i inšych ludziej. Reč u tym, što niekatory čas tamu ŭ Arsienija była ŭ Polščy firma, jakaja zajmałasia pryhonam aŭtamabilaŭ z ZŠA na zamovu. Ale «Trybuna» znajšła niekalki čałaviek, jakija addali Arsieniju hrošy, ale mašyny tak i nie pabačyli.

Raspaviadajučy pra pryhody svajho byłoha muža, jakoha Kryścina pabačyła ŭ videa ŭ instahramie minskaj aŭtamyjki, spartoŭka tehnuła ŭ storys akaŭnty MUS Biełarusi, a taksama pamiežnaj słužby.

Učora Śledčy kamitet paabiacaŭ pravieryć «na ekstremizm» Arsienija Zdanieviča.

Kryścina ličyć, što Arsienij pajechaŭ u Biełaruś, kab schavacca ad prablem.

«Nakolki ja viedaju, jamu pahražaŭ termin za machlarstva i ŭ Polščy, i ŭ Hruzii. Jon źnik u Polščy, kali ludzi napisali na jaho zajavu [u palicyju]. Potym tak źnik u Hruzii. Ciapier voś źnik u Biełarusi. Čałaviek, jaki sumlenna pracuje, nie padmanvaje i nie kradzie, nie budzie źnikać i chavacca», — skazała jana ŭ kamientary «Našaj Nivie».

Lohkaatletka kaža, što i jana, i inšyja paciarpiełyja sprabavali vyjści ź im na suviaź, kab daviedacca, kali jon viernie hrošy. Ale mužčyna ŭsich ihnaruje.

«Sa mnoj na suviaź vyjšli niekalki paciarpiełych. Ich suma ahulnaja niedzie ad 30 da 40 tysiač dalaraŭ. Ale paźniej vyśvietliłasia, što jon jašče kamuści pa drobiazi vinny, heta niedzie ad tysiačy da troch tysiač dalaraŭ. Plus nie ŭsie, kaho jon padmanuŭ, vychodzili na suviaź. Niekatoryja dziejničali samastojna i prosta padavali zajavu ŭ palicyju», — kaža spartoŭka.

Kryścina adznačaje, što adnamu čałavieku Arsienij viarnuŭ hrošy, kali byŭ u Hruzii. «Tamu što ŭ chłopcaŭ akazalisia dobryja suviazi. Tamu tam Arsienij napisaŭ raśpisku ŭ nataryusa i adnamu z paciarpiełych viarnuŭ 10 tysiač dalaraŭ. I paśla hetaha znoŭ pierastaŭ vychodzić na suviaź».

Na pytańnie, što jana adčuła, kali pabačyła navinu ad Śledčaha kamitetu, spartoŭka adkazała maksimalna łakanična: «Ničoha».

«Naša Niva» taksama paprasiła prakamientavać lohkaatletku pierapisku ź Iharam Turam. Prapahandyst učora vykłaŭ u svaim telehram-kanale skrynšot, na jakim jon byccam by adreahavaŭ na storys Kryściny ahieńčykam, a jana napisała jamu: «Pieradajcie ŭ navinach, što złačyniec pa Minsku chodzić. Jon jak u Polščy ludziej na hrošy kidaŭ, i ŭ Hruzii, i ŭ Biełarusi budzie taksama rabić».

Pavialičyć

Kryścina hetuju pierapisku nazvała fotašopam i adkazała, što nie viedaje, chto taki Ihar Tur. Jana taksama dadała:

«Kali niechta raptam napiša, što ja vyjšła na anłajn-sazvon i dała pakazańni, dyk ja adrazu vam adkažu, što ničoha takoha rabić nie budu i lubaja takaja infarmacyja — chłuśnia».

• 19
• 0
• 6
• 29
• 0
• 1
• 4
• 0