Novaja tkanina moža sama nahravacca bolš čym na 30 hradusaŭ, kab ratavać u ekstremalna chałodnaje nadvorje
Razumnaja tkanina, raspracavanaja kanadskimi vučonymi, pieraŭtvaraje soniečnaje śviatło ŭ ciapło i za 10 chvilin pavyšaje tempieraturu na 30 hradusaŭ. Materyjał lohki i tryvały, moža raściahvacca ŭ piać razoŭ i vytrymlivaje da dvaccaci prańniaŭ.
Na praciahu mnohich hadoŭ vučonyja raspracoŭvajuć adzieńnie z padahrevam, kab dapamahčy zachoŭvać kamfortnuju tempieraturu ŭ chałodnych umovach. Adnak isnujučyja rašeńni zvyčajna praduhledžvajuć vykarystańnie nahravalnych elemientaŭ, jakija pracujuć ad źniešniaj krynicy siłkavańnia.
Jak piša Live Science, vučonyja z Univiersiteta Vaterłoŭ (Kanada) raspracavali inavacyjnuju razumnuju tkaninu, jakaja sama moža nahravacca i efiektyŭna zachoŭvać ciapło ŭ chałodnuju paru hoda. Dla nahrevu dastatkova tolki soniečnaha śviatła.
Vučonyja źviarnuli ŭvahu na fotatermalnyja palimiery — materyjały, padobnyja da płastyku, jakija pieraŭtvarajuć śviatło ŭ ciapło. Svajo vynachodnictva jany apisali ŭ časopisie Advanced Composites and Hybrid Materials.
Aŭtary ŭplali nanačaścicy dvuch palimieraŭ — polianilinu (PANI) i polidapaminu (PDA) — u matrycu vałoknaŭ z termapłastyčnaha poliŭretanu (PTU), jaki šyroka vykarystoŭvajecca ŭ vytvorčaści vodaniepranikalnaj i spartyŭnaj vopratki. U pracesie stvareńnia vałoknaŭ kamanda taksama dadała ŭ materyjał termachromnyja farbavalniki, jakija źmianiajuć koler pry źmienie tempieratury.
Kab pratestavać materyjał, vučonyja źviazali ź jaho minijaciurny śvitar dla plušavaha miedźviedzianiaci. Čyrvony džempier na soncy nahreŭsia da ŭražlivych 53,5 °C usiaho za 10 chvilin. Pry pavyšeńni tempieratury malekuły čyrvonaha farbavalnika źmianiali svaju chimičnuju strukturu i stanavilisia biełymi.
Pavodle słoŭ aŭtaraŭ, ubudavanyja nanačaścicy efiektyŭna pahłynajuć enierhiju soniečnaha śviatła ŭ šyrokim dyjapazonie daŭžyń chval i vydzialajuć jaje ŭ vyhladzie ciapła praz praces, jaki nazyvajecca fotatermičnym pieraŭtvareńniem.
Jak paviedamlajecca, razumnaja tkanina vałodaje miakkaj i ełastyčnaj teksturaj, moža raściahvacca ŭ piać razoŭ u paraŭnańni ź pieršapačatkovym pamieram i zachoŭvaje svaje ŭłaścivaści navat paśla 25 prańniaŭ.
Ciapier kamanda pracuje nad padrychtoŭkaj materyjału da kamiercyjnaj vytvorčaści, ale pierad šyrokim užyvańniem nieabchodna pravieści dadatkovyja vyprabavańni. Vučonyja zasiarodzili ŭvahu na źnižeńni vydatkaŭ na vytvorčaść, maštabavańni pracesu stvareńnia i praviercy biaśpieki vałoknaŭ pry praciahłym kantakcie sa skuraj.
Ciapier čytajuć
Ułady Hrodna paviedamili pra vychad z ładu liŭnioŭki pad udaram stychii1
Kamientary