Na «Biełsacie» startavała ranišniaje šou, dziela jakoha Rajeckaja, Dudzinski i Chałatran zahavaryli na biełaruskaj movie
«Ranica ź Biełsatam» budzie vychodzić pa subotach i niadzielach a 9-j ranicy. Pieršy efir praviali Kaciaryna Rajeckaja i Dzianis Dudzinski, ale źjavicca i inšaja para viadučych.
«Prahrama, jakoj vam tak nie chapała i pra jakuju my maryli. Ranica na «Biełsacie!» — napisała ŭ fejsbuku hałoŭnaja redaktarka «Biełsata» Alina Koŭšyk.
Heta ranišniaje šou ŭ jaho kłasičnym farmacie. Atrymaŭsia davoli harmaničny miks z parad pa zdarovym ładzie žyćcia, razmoŭ pra modu, kino, vandroŭki, a taksama abmierkavańnie śmiešnych videa z sacyjalnych sietak.
Składana ŭjavić takuju pieradaču biez pryhatavańnia čaho-niebudź smačnieńkaha. Svaimi varyjantami śniadankaŭ padzialiŭsia Lavon Chałatran. Treba adznačyć, što jon upieršyniu publična staŭ razmaŭlać pa-biełarusku, tamu zahadzia vybačaŭsia za mahčymyja pamyłki.
Fiška «Ranicy z «Biełsatam» — cikavyja histaryčnyja ŭstaŭki. Kaciaryna Vadanosava pakazvaje i raskazvaje pra staradaŭnija biełaruskija stroi. A historyk Cimoch Akudovič, jaki viadzie prahramu «Vusy Skaryny», sprabuje pravodzić paraleli pamiž tym, jak žyli ŭ Biełarusi niekalki stahodździaŭ tamu i jak žyvuć ciapier.
Tradycyjna ŭ ranišnich šou nie havorać pra palityčnyja naviny. U biełaruskich realijach biez palityki abyścisia składana, ale ž kab nie psavać ludziam nastroj z samaha pačatku, abmiarkoŭvajuć (a chutčej vyśmiejvajuć) naviny viadučyja «Chaj tak» Michaś Zuj i Dźmitryj Jesianievič. Na žal, u ich nie vielmi atrymlivajecca vychodzić z vobrazaŭ čynoŭnikaŭ Čynčynaŭ, tamu hledačam prychodzicca słuchać žarty na trasiancy.
Čas ad času Kaciaryna Rajeckaja ź Dzianisam Dudzinskim zaklikajuć hledačoŭ adpraŭlać kamientaryi (kali heta biaśpiečna). I nie zaŭsiody jany pryjemnyja: niechta, naprykład, piša, što ŭ Kaciaryny nievialiki słoŭnikavy zapas. A niechta žartuje, što choča, kab «usio BT stała BČB». Ale ž pazityŭnych vodhukaŭ značna bolš.
Doŭžycca «Ranica ź Biełsatam» kala dźviuch hadzin. Uvohule možna skazać, u kanała atrymałasia zrabić hodnaje ranišniaje šou, jakoje pryjemna słuchać fonam, kali niaśpiešna pačynaješ vychodny dzień.
Kamientary