Hiryn, Bury i navat Knyrovič adreahavali na artykuł pra samuju modnuju paru biełaruskaj apazicyi
Jarkija vobrazy zasnavalnikaŭ biznes-asacyjacyi ABBA nie pakinuli abyjakavymi šmat kaho ź biełarusaŭ. Artykuł pra modnaje adzieńnie Maryny Hiryn i Jaŭhiena Buraha sabraŭ bolš za 100 kamientaroŭ na sajcie «Našaj Nivy», abmierkavańnie praciahnułasia ŭ sacsietkach.
Spačatku na jaho adhuknułasia sama hierainia materyjału — Maryna Hiryn. Jana aburyłasia zhadkaj jaje pracy ŭ Ministerstvie pa padatkach i zborach Biełarusi:
«U artykule hałoŭnaj linijaj idzie adsyłka da majoj pieršaj pracy. Ja zvolniłasia ź jaje, kali mnie było hadoŭ 27. Paśla hetaha ŭ maim žyćci było šmat roznych etapaŭ: doŭhi čas praca ŭ nieruchomaści, dobryja pazicyi, inviestycyi ŭ Biełarusi, Polščy i Ispanii. A paśla pierajezdu ŭ Polšču ŭ 2020 było šmat siłaŭ, enierhii i ŭłasnych hrošaŭ układziena ŭ prajekt AVVA Association of Belarusian Business Abroad».
Na pohlad žančyny, zhadka pra jaje jak byłuju čynoŭnicu — «sproba spravakavać varožaść» u biełaruskim hramadstvie, jakoje niehatyŭna ŭsprymaje dziaržsłužačych.
Maryna Hiryn nahadvaje, što jany z mužam zrabili svoj vybar asensavana jašče da padziej 2020 hoda i mnohaje stracili z-za svajoj pazicyi, u tym liku i finansava, atrymali kryminalnyja spravy i znachodziacca ŭ vyšuku.
«Tamu mnie vielmi chaciełasia, kab takija zahałoŭki vykarystoŭvalisia mienavita dla tych čynoŭnikaŭ, jakija byli imi na momant padziej 2020 hodu i pierakinulisia na druhi bok paśla», — rekamienduje Maryna Hiryn.
«Adčuvańnie kantekstu — vielmi važna» — Knyrovič
Biznesmien Alaksandr Knyrovič paličyŭ materyjał pra samuju modnuju paru biełaruskaj apazicyi «trolinham nie 80-ha, a 180-ha ŭzroŭniu», a kamientaryj Maryny Hiryn nazvaŭ napisanym u duchu «dy ja ŭvohule ŭ dušy dyzajnier! I hrošy ŭ mianie sumlennyja — ja ich sama zarabiła, jašče ŭ Biełarusi».
Knyrovič zaŭvažaje, što fotazdymki Hiryn i Buraha demanstrujuć raskošu i stvarajuć pytańni pra pachodžańnie ich dachodaŭ. Na jaho pohlad, afarmleńnie publičnaha vobrazu maje značeńnie, asabliva ŭ kantekście biełaruskaj apazicyi i biznes-emihracyi.
Knyrovič adznačaje, što hramadskaja reakcyja na publičnuju demanstracyju bahaćcia zaležyć ad kantekstu. I ŭ hetym vypadku kantekst vyhladaje vielmi niaŭdała dla hałoŭnych hierojaŭ artykuła:
«Kali b takija fota byli apublikavanyja da 2019 hoda dzie-niebudź u biełaruskich «Fešn Kallekš», «Dabiermanie» ci «Bolšom», mahčyma da Jaŭhiena ŭźnikli b pytańni ŭ profilnych śpiecsłužbaŭ, ale narod by tolki paradavaŭsia (…)
Ale tut razmova idzie mienavita pra ŚMI, nakiravanyja na demakratyčna aryjentavanych biełarusaŭ, jakija častkova pražyvajuć vymušanuju emihracyju i dobra razumiejuć košt svaich rašeńniaŭ… i što ž bačać jany na hetych pryhožych fota?
Nu, mienavita toje, što i napisała «Naša Niva» — siamja byłych čynoŭnikaŭ, pierajšoŭšy na bok demakratyi, pakinuła Radzimu i vielmi dobra siabie adčuvajuć. Nastolki dobra, što dazvalajuć sabie publična demanstravać nie mienš za 200 000 dalaraŭ, apranutych na siabie. (Acenka nie maja — a profilnaj ekśpiertki, jakaja daŭno zadajecca pytańniem — «a jak heta tak atrymlivajecca?»). I pytańnie «adkul hrošy?» uźnikaje samo saboj».
Aŭtar pryznaje prezumpcyju nievinavataści, ale ličyć łahičnym, što paśla takoj publikacyi ŭźnikajuć pytańni. Asabliva z ulikam taho, što aficyjna nijakich bujnych paśpiachovych biźnies-prajektaŭ u hierojaŭ artykuła nie zaŭvažana. Adsiul, na jaho pohlad, dźvie mahčymyja viersii: jany vyvieli bujnyja sumy ź Biełarusi da 2020 hoda ci heta vynik «paśpiachovaha» kiravańnia biznes-asacyjacyjaj.
«Adčuvańnie KANTEKSTU — vielmi važna, adčuvańnie stylu, nie tolki ŭ dyzajnie adzieńnia, a — całkam, u žyćci», — davodzić Knyrovič i akcentuje ŭvahu, što hieroi artykuła ŭdzielničajuć u aficyjnych forumach ad imia «biełaruskaha biznesu (apazicyi) i niasuć hetuju kulturu «publičnaj demanstracyi» z saboju. Pa ich, pa ich pavodzinach i vonkavym vyhladzie źniešnija partniory robiać vysnovu ab biełaruskim biznesie za miažoj», — davodzić Knyrovič.
Na pohlad biznesmiena, pakaznoje bahaćcie nie adpaviadaje biełaruskamu nacyjanalnamu charaktaru.
U kancy svajho dopisu Knyrovič raźmiaściŭ zdymak pary Hiryn-Bury i fota Styva Džobsa, zaŭvažyŭšy, što pradprymalnik-vizijanier addavaŭ pieravahu džynsam Livajs i krasoŭkam ŃjuBełans, hadzińniku Siejko. «Naŭrad ci na im było adzieta bolš za $1000».
«U nas samyja pryhožyja narkahandlary ŭ śviecie!»— Biekiš
Pad pastom Knyroviča hramadski dziejač Jarasłaŭ Biekiš pakinuŭ poŭny sarkazmu i ironii kamientaryj.
«Ja b ščyra chacieŭ, kab usie biełaruskija čynoŭniki — dziejnyja i byłyja — tak vyhladali, i tak padarožničali. I nie čynoŭniki tolki, a daktary, nastaŭniki, sacrabotniki — usie, chto pracuje na karyść dziaržavy i naroda našaj krainy», — piša Biekiš i zaŭvažaje, što Hiryn z Burym — «prykład taho, jak moh by žyć kožny aktyŭny i adukavany biełarus, jaki ŭmieje i ŭ čynoŭniki, i ŭ padatkovuju, i ŭ hranty, i ŭ apazicyju. Moh by, ale nie ŭmieje. I sprava nie ŭ huście».
Mužčyna pryznaje, što «na čynoŭnickuju zarpłatu tak nie raskrucišsia» i što «na hrantach taksama nichto tak sumlenna nie žyŭ nikoli i nie budzie». A toj fakt, što ni Hiryn, ni Bury nie nazyvajuć krynicu svaich dachodaŭ, vyklikaje šmat insinuacyj:
«heta mahła być spadčyna, udałaje ŭkładańnie ŭ kryptu, narkahandal, onlifans, łatareja. (…) P.S. Kali ja vypadkova adhadaŭ i heta sapraŭdy narkahandal, to ja jak biełarus vielmi i vielmi hanarusia — u nas samyja pryhožyja narkahandlary ŭ śviecie!»
«Nielha ličyć čužyja hrošy» — Libier
«Musić, samaje niapravilnaje, da čaho možna zaklikać — ličyć i asudžać čužyja hrošy», — zaŭvažaje ŭ svaim kamientary pad pastom Krynoviča prahramist Pavieł Libier. Jon padkreślivaje, što «imknucca mieć šmat hrošaj sumlennym sposabam — dobra», a voś što drenna, dyk heta «raspalvać nianaviść da tych, u kaho jany jość».
Na pohlad Libiera, jak artykuł, tak i post Knyroviča z etyčnaha punktu hledžańnia «vyhladajuć vielmi drenna», bo nie pryvodziać nijakich dokazaŭ, ale majuć asudžeńnie ŭ styli «nu, zrazumieła, skrali, a jak jašče».
Na pohlad prahramista, kali čałaviek choča pracavać u vadałazcy, jak Styŭ Džobs, — heta jaho vybar. Kali kamuści kamfortna ŭ darahim brendavym adzieńni — heta taksama nie prablema: «Asabistaja svaboda zaŭsiody pačynajecca z pavahi da čužoj svabody».
«My robim usio mahčymaje, kab biełarusy vyhladali hodnymi, adukavanymi, prahresiŭnymi i pierśpiektyŭnymi ludźmi» — Bury
Hieroj našaha artykuła Jaŭhien Bury taksama adhuknuŭsia na artykuł i krytyku ŭ svoj adras vialikim pastom na svajoj staroncy ŭ fejsbuku.
Aŭtar pryznaje, što pracavaŭ u dziaržaŭnaj sistemie, i śćviardžaje, što jaho dziejnaść spryjała raźvićciu biznesu, a heta, u svaju čarhu, padrychtavała hlebu dla pratestaŭ 2020 hoda, jakuju jon nazyvaje «buržuaznaj revalucyjaj».
Jon padkreślivaje, što paśla zvalnieńnia ź dziaržsłužby praciahnuŭ zajmacca biznesam i padtrymkaj biełaruskich pradprymalnikaŭ za miažoj. Pa jaho słovach, z usioj dapamohi biełarusam z 2020 hoda jaho arhanizacyja atrymała ŭsiaho 0,2-0,3% srodkaŭ.
«My robim usio mahčymaje, kab biełarusy vyhladali i byli dla našych partnioraŭ, u vačach jeŭrapiejskaha biznesu, hodnymi, adukavanymi, prahresiŭnymi i pierśpiektyŭnymi ludźmi. Tymi, z kim možna i treba mieć spravu. Z kim možna i treba vieści biznes», —
davodzić Bury.
«Naša Niva» — bastyjon biełaruščyny
PADTRYMAĆCiapier čytajuć
Dačka Nadziei Jermakovaj pastaŭlaje rybu ŭ kałonii, balnicy i siłavikam1
Kamientary