Zialenski paprasiŭ u Trampa bolš Patriot, i toj abiacaŭ pašukać

«U mianie była pazityŭnaja, vielmi źmiastoŭnaja i adkrytaja razmova z prezidentam ZŠA Donaldam Trampam Ja padziakavaŭ jamu za dobry i praduktyŭny pačatak pracy ŭkrainskaj i amierykanskaj kamand u Džydzie 11 sakavika — hetaja sustreča kamandaŭ istotna dapamahła ŭ prasoŭvańni da spynieńnia vajny.

My pahadzilisia, što Ukraina i ZŠA pavinny praciahvać pracavać razam, kab damahčysia realnaha spynieńnia vajny i tryvałaha miru. My vierym, što razam z Amierykaj, z prezidentam Trampam i pad amierykanskim kiraŭnictvam tryvały mir moža być dasiahnuty ŭ hetym hodzie.

Prezident Tramp padzialiŭsia padrabiaznaściami svajoj razmovy z Pucinym i klučavymi pytańniami, jakija abmiarkoŭvajucca. Adnym ź pieršych krokaŭ da poŭnaha spynieńnia vajny moža stać spynieńnie ŭdaraŭ pa enierhietyčnaj i inšaj hramadzianskaj infrastruktury. Ja padtrymaŭ hety krok, i Ukraina paćvierdziła, što my hatovyja jaho realizavać. Našy kamandy abmierkavali hety krok u Džydzie.

Amierykanski bok taksama prapanavaŭ biezumoŭnaje spynieńnie ahniu na linii frontu, i Ukraina taksama pryniała hetuju prapanovu. My praciahniem pracavać nad tym, kab heta adbyłosia. My ličym, što takija kroki nieabchodnyja dla stvareńnia mahčymaści dla padrychtoŭki ŭsioachopnaha mirnaha pahadnieńnia ŭ pieryjad spynieńnia ahniu.

Ja taksama pradstaviŭ abnoŭlenuju infarmacyju pra situacyju na poli boju i nastupstvy rasijskich udaraŭ. My havaryli pra situacyju ŭ Kurskaj vobłaści, zakranuli pytańnie vyzvaleńnia vajennapałonnych i viartańnia ŭkrainskich dziaciej, jakija byli zachoplenyja rasijskimi vojskami.

My taksama abmierkavali stan supraćpavietranaj abarony Ukrainy i mahčymaść jaje ŭzmacnieńnia dla abarony žyćciaŭ.

My daručyli našym kamandam vyrašyć techničnyja pytańni, źviazanyja z realizacyjaj i pašyreńniem častkovaha spynieńnia ahniu.

Ukrainskaja i amierykanskaja kamandy hatovyja sustrecca ŭ Saudaŭskaj Aravii ŭ najbližejšyja dni dla praciahu kaardynacyi krokaŭ pa dasiahnieńniu miru. My daručyli našym daradcam i pradstaŭnikam pravieści hetuju pracu jak maha chutčej.

My adznačyli pazityŭnuju pracu našych daradcaŭ i pradstaŭnikoŭ — Rubia, Uołca, Kiełaha, Jermaka, Sibihi, Umierava i Palisy. Na nastupnych sustrečach kamandy mohuć damovicca pra ŭsie nieabchodnyja aśpiekty prasoŭvańnia da tryvałaha miru i harantyj biaśpieki.

Ja padziakavaŭ prezidentu Trampu i amierykanskamu narodu za padtrymku. Ja padkreśliŭ, što ŭkraincy chočuć miru, tamu Ukraina pryniała prapanovu ab biezumoŭnym spynieńni ahniu.

Ja padkreśliŭ važnaść kancepcyi miru praź siłu prezidenta Trampa. My damovilisia padtrymlivać pastajanny kantakt, u tym liku na samym vysokim uzroŭni i praz našy kamandy», — napisaŭ Zialenski ŭ sacsietcy X. 

U toj ža čas pres-słužba Biełaha doma paviedamiła, što padčas telefonnaj razmovy Uładzimir Zialenski paprasiŭ u Trampa dadatkovyja sistemy SPA, u tym liku kompleksy Patriot. Amierykanski prezident nibyta paabiacaŭ papracavać nad hetym i znajści nieabchodnyja ŭzbrajeńni, u tym liku ŭ Jeŭropie.

Akramia taho, paśla razmovy prezidentaŭ pres-słužba Biełaha doma zajaviła, što Vašynhton praciahnie pieradavać Ukrainie raźviedvalnuju infarmacyju abarončaha charaktaru. Raniej Uładzimir Pucin u hutarcy z amierykanskim lidaram nastojvaŭ na spynieńni zachodniaj vajskovaj padtrymki Kijeva, uklučajučy pieradaču raźvieddanych.

«My jašče nikoli nie byli tak blizka da miru, jak siońnia», — dvojčy skazała pres-sakratarka Trampa Kerałajn Levit na pres-kanfierencyi ŭ Vašynhtonie.

• 6
• 0
• 1
• 2
• 0
• 0
• 0
• 0