Прэзідэнт Украіны Уладзімір Зяленскі выклаў падрабязную справаздачу пра сваю сённяшнюю размову з Трампам. У сваю чаргу, прэс-служба Белага дома дапоўніла яе іншымі важнымі падрабязнасцямі.
«У мяне была пазітыўная, вельмі змястоўная і адкрытая размова з прэзідэнтам ЗША Дональдам Трампам Я падзякаваў яму за добры і прадуктыўны пачатак працы ўкраінскай і амерыканскай каманд у Джыдзе 11 сакавіка — гэтая сустрэча камандаў істотна дапамагла ў прасоўванні да спынення вайны.
Мы пагадзіліся, што Украіна і ЗША павінны працягваць працаваць разам, каб дамагчыся рэальнага спынення вайны і трывалага міру. Мы верым, што разам з Амерыкай, з прэзідэнтам Трампам і пад амерыканскім кіраўніцтвам трывалы мір можа быць дасягнуты ў гэтым годзе.
Прэзідэнт Трамп падзяліўся падрабязнасцямі сваёй размовы з Пуціным і ключавымі пытаннямі, якія абмяркоўваюцца. Адным з першых крокаў да поўнага спынення вайны можа стаць спыненне ўдараў па энергетычнай і іншай грамадзянскай інфраструктуры. Я падтрымаў гэты крок, і Украіна пацвердзіла, што мы гатовыя яго рэалізаваць. Нашы каманды абмеркавалі гэты крок у Джыдзе.
Амерыканскі бок таксама прапанаваў безумоўнае спыненне агню на лініі фронту, і Украіна таксама прыняла гэтую прапанову. Мы працягнем працаваць над тым, каб гэта адбылося. Мы лічым, што такія крокі неабходныя для стварэння магчымасці для падрыхтоўкі ўсёахопнага мірнага пагаднення ў перыяд спынення агню.
Я таксама прадставіў абноўленую інфармацыю пра сітуацыю на полі бою і наступствы расійскіх удараў. Мы гаварылі пра сітуацыю ў Курскай вобласці, закранулі пытанне вызвалення ваеннапалонных і вяртання ўкраінскіх дзяцей, якія былі захопленыя расійскімі войскамі.
Мы таксама абмеркавалі стан супрацьпаветранай абароны Украіны і магчымасць яе ўзмацнення для абароны жыццяў.
Мы даручылі нашым камандам вырашыць тэхнічныя пытанні, звязаныя з рэалізацыяй і пашырэннем частковага спынення агню.
Украінская і амерыканская каманды гатовыя сустрэцца ў Саудаўскай Аравіі ў найбліжэйшыя дні для працягу каардынацыі крокаў па дасягненню міру. Мы даручылі нашым дарадцам і прадстаўнікам правесці гэтую працу як мага хутчэй.
Мы адзначылі пазітыўную працу нашых дарадцаў і прадстаўнікоў — Рубіа, Уолца, Келага, Ермака, Сибиги, Умерава і Палісы. На наступных сустрэчах каманды могуць дамовіцца пра ўсе неабходныя аспекты прасоўвання да трывалага міру і гарантый бяспекі.
Я падзякаваў прэзідэнту Трампу і амерыканскаму народу за падтрымку. Я падкрэсліў, што ўкраінцы хочуць міру, таму Украіна прыняла прапанову аб безумоўным спыненні агню.
Я падкрэсліў важнасць канцэпцыі міру праз сілу прэзідэнта Трампа. Мы дамовіліся падтрымліваць пастаянны кантакт, у тым ліку на самым высокім узроўні і праз нашы каманды», — напісаў Зяленскі ў сацсетцы X.
У той жа час прэс-служба Белага дома паведаміла, што падчас тэлефоннай размовы Уладзімір Зяленскі папрасіў у Трампа дадатковыя сістэмы СПА, у тым ліку комплексы Patriot. Амерыканскі прэзідэнт нібыта паабяцаў папрацаваць над гэтым і знайсці неабходныя ўзбраенні, у тым ліку ў Еўропе.
Акрамя таго, пасля размовы прэзідэнтаў прэс-служба Белага дома заявіла, што Вашынгтон працягне перадаваць Украіне разведвальную інфармацыю абарончага характару. Раней Уладзімір Пуцін у гутарцы з амерыканскім лідарам настойваў на спыненні заходняй вайсковай падтрымкі Кіева, уключаючы перадачу разведданых.
«Мы яшчэ ніколі не былі так блізка да міру, як сёння», — двойчы сказала прэс-сакратарка Трампа Кэралайн Левіт на прэс-канферэнцыі ў Вашынгтоне.
Белы дом: валоданне ЗША атамнымі электрастанцыямі Украіны будзе іх найлепшай абаронай
Сталі вядомыя новыя дэталі перамоў Трампа і Зяленскага
Трамп паведаміў, што размова з Зяленскім прайшла «вельмі добра»
Украіна і Расія правялі анансаваны ўчора абмен палоннымі
Зяленскі: Пуцін адкінуў прапанову спынення агню і атакаваў цывільную інфраструктуру
«Месячны плацеж пацягне на 340 рублёў». Што будзе ў Беларусі з мабільным інтэрнэтам?15
Каментары