Kadebešnik adpraŭlaŭ prastytutak u Finlandyju, a ciapier arystakrat. Jak siamja rasijskich špijonaŭ pieratvaryłasia ŭ jeŭrapiejskich mahnataŭ

Jak piša The Insider, Uładzimir Stržałkoŭski pačaŭ karjeru ŭ leninhradskim upraŭleńni KDB, dzie zbliziŭsia z dvuma budučymi ciažkavahavikami rasijskaj palityki — Patrušavym i Pucinym. Hetaje siabroŭstva stała klučom da nievierahodnaha ŭźlotu.

Paśla raspadu SSSR Stržałkoŭski nie zhubiŭsia. U 1991 hodzie, kali Pucin uznačaliŭ kamitet pa źniešnich suviaziach meryi Pieciarburha, Stržałkoŭski staŭ dyrektaram turystyčnaj firmy «Niava». Turyzm byŭ tolki šyldaj: pa dakumientach finskaha suda, firma arhanizoŭvała masavyja pajezdki seks-rabotnic z Rasii ŭ Finlandyju. Sud pryznaŭ fakt prastytucyi, ale pakarańnia nichto nie panios.

Jak zarabić miljony

Praz hod paśla taho, jak Pucin staŭ premjeram, jaho były kaleha pa KDB apynuŭsia ŭ kreśle namieśnika ministra sportu i turyzmu. Bolš za toje, jaho staraja paplečnica Natalla Oksa stała pradstaŭnikom ministerstva ŭ Finlandyi — i znoŭ arhanizoŭvała bardeli, ciapier užo vykarystoŭvajučy dziaržaŭnuju majomaść. Finskaja presa pisała ab kvaterach, jakija naležali ministerstvu i pracavali jak publičnyja damy.

U 2008 hodzie Stržałkoŭski pierajšoŭ u biznes — jaho pastavili na čale praŭleńnia «Narnikiela». Heta byŭ čysta palityčny pryznačeniec: kiravańniem jon amal nie zajmaŭsia, žyŭ u Maskvie, pradpryjemstvy nie naviedvaŭ. Zatoje atrymlivaŭ sotni tysiač dalaraŭ za miesiac, a taksama hadavyja bonusy da 25 miljonaŭ dalaraŭ. U 2012 hodzie jon zvolniŭsia z rekordnym «załatym parašutam» — 100 miljonaŭ dalaraŭ.

Sotni miljonaŭ dalaraŭ, atrymanyja ŭ «Narnikieli», jon pieravioŭ na Kipr. Tam u 2013 hodzie zdaryŭsia bankaŭski kryzis, i častka fundataraŭ, uklučajučy Stržałkoŭskaha, atrymali doli ŭ Bank of Cyprus.

Jak adznačajuć aŭtary rasśledavańnia, navat paśla adychodu ad dziaržsłužby Uładzimir Stržałkoŭski zastavaŭsia hłyboka ŭplecieny ŭ koły rasijskaj siłavoj elity. U 2015 hodzie jon uvajšoŭ u naziralnuju radu Raśsielhasbanka, dzie klučavyja pazicyi zajmali ludzi z akružeńnia Patrušava, jaho daŭniaha znajomaha pa KDB. Taksama Stržałkoŭski pradstaŭlaŭ «Rasatam» u Afrycy jak śpiecpradstaŭnik.

Siamiejnyja suviazi ŭmacoŭvalisia — dzieci Patrušava i Stržałkoŭskaha stali susiedziami ŭ elitnym pasiołku pad Hielendžykam. A ŭ 2016-2019 hadach Stržałkoŭski ŭznačalvaŭ «Dynama» — hałoŭnaje spartyŭnaje abjadnańnie rasijskich siłavikoŭ, tradycyjna ciesna źviazanaje z FSB i MUS.

Syn-špijon

Syn Stržałkoŭskaha, Jaŭhien, pajšoŭ pa šlachu baćki — skončyŭ Akademiju Słužby źniešniaj raźviedki i pracavaŭ pad prykryćciom Źniešekanombanka. Paralelna Jaŭhien uznačalvaŭ ahresiŭnuju hrupu vajenna-histaryčnaj rekanstrukcyi «Morhil», jakaja spałučała nieanacysckuju ideałohiju i chulihanstva.

Ideałohija kłuba dzialiła ludziej na «narmalnych» i «halimcaŭ» (naprykład, tałkijenistaŭ), jakich dazvalałasia bić. Hrupa ładziła napady na inšych ralevikoŭ, treniravałasia jak vajenizavanaje farmavańnie — ź fiechtavańniem, rukapašnym bojem i ahresiŭnaj taktykaj.

Pavialičyć

Samy viadomy epizod — napad u 2002 hodzie na ŭdzielnikaŭ rolevaha fiestyvalu «Blinkom-3» u Pieciarburhu: dvaich źbili, adnamu niekalki razoŭ strelili ŭ hałavu ź pnieŭmatyčnaj strelby. MUS admoviłasia zavodzić spravu — jaje adkryli tolki paśla zvarotu rabotnikaŭ sacsłužbaŭ u prakuraturu.

Ałkaholnaja impieryja ŭ Jeŭropie

Paźniej siamja stvaryła sapraŭdnuju ałkaholnuju impieryju ŭ Jeŭropie. Jaŭhien staŭ hramadzianinam Manaka, uznačaliŭ afšornuju strukturu Thesauro Praetor i skupiŭ vinakurni ŭ Francyi i Italii, brovary ŭ Čechii.

Ich klučavyja aktyvy — vinakurnia La Scarpa u Pjemoncie (ahulnaja płošča vinahradnikaŭ — 5 ha, košt hiektara moža dasiahać 3 miljonaŭ jeŭra), vytvorca viermutu Monte Carlo i češski brovar Svabin. Struktura ŭłasnaści — składanaja, z afšorami, padstaŭnymi asobami i kampanijami-pasrednikami.

U Vialikabrytanii Jaŭhien vałodaje dźviuma ałkaholnymi firmami. U Šatłandyi jon nabyŭ 12-pakajovy asabniak z sadam i 250 akrami lesu za 4 miljony funtaŭ sterlinhaŭ. Zamak znachodzicca pobač sa stratehična važnaj dla brytanskaha i amierykanskaha fłotaŭ zapravačnaj stancyjaj Łoch-Stryvien.

Taksama na syna aformleny bar u Vienie, a ŭ Maskvie restaranami i pabami kiruje jaho maci i byłaja žonka Uładzimira — Natalla Stržałkoŭskaja. Siarod jaje aktyvaŭ — piŭny restaran, bary na Kuźnieckim moście, Mikolskaj, Miaśnickaj i Małoj Bronnaj, a taksama bistro Fiorentini.

Dziŭnyja hateli

Druhuju žonku Uładzimira Stržałkoŭskaha, Irynu, byłuju supracoŭnicu Upraŭleńnia spravami prezidenta Rasii, siońnia možna nazvać haspadyniaj jeŭrapiejskaj mini-impieryi hatelaŭ. Jana vałodaje sietkaj V-Hotels Group, zarehistravanaj na Kipry, z raskošnymi SPA-hatelami ŭ Italii (Abana-Terme) i Hrecyi (Korfu), aformlenymi praz składanuju sietku afšoraŭ.

Va ŭłasnaści — jak minimum šeść bujnych hatelaŭ, acenienych u dziasiatki miljonaŭ jeŭra, a sama Iryna — hramadzianka Kipra i ŭładalnica «załatoha pašparta» Čarnahoryi.

Niahledziačy na ​​maštab i ŭzrovień hatelaŭ, ich aficyjnyja finansy vyhladajuć padazrona: firmy pakazvajuć mizerny prybytak abo straty, pry hetym rehularna atrymlivajuć šmatmiljonnyja pazyki ad źviazanych ź Irynaj struktur i afšoraŭ z Brytanskich Virhinskich vyspaŭ.

Ahulnaja suma takich ulivańniaŭ — zvyš 66 miljonaŭ jeŭra. Usie rachunki adkryty ŭ Bank of Cyprus, dzie raniej zasiadaŭ sam Uładzimir Stržałkoŭski. Usio heta pakazvaje na mahčymaje vykarystańnie sietki hatelaŭ dla admyvańnia i lehalizacyi cieniavych kapitałaŭ.

Čekisty ŭ dvaranstvie

Jak adznačajecca ŭ rasśledavańni, Uładzimiru i Jaŭhienu Stržałkoŭskim nie skłała vialikaj ciažkaści ŭvajści ŭ koły sapraŭdnaj jeŭrapiejskaj arystakratyi.

Jaŭhien uvajšoŭ u arystakratyčnyja koły Manaka praz sport: jon uznačaliŭ miascovaje adździaleńnie fiederacyi histaryčnych bajoŭ HMBIA i zbliziŭsia z kniaziem Albieram II, jaki asabista ŭručaŭ pryzy na turnirach. Udzieł u hetym anturažy, jak dapuskajuć aŭtary, dapamoh atrymać hramadzianstva Manaka i lehalizavać ałkaholny brend Monte Carlo.

Uładzimir Stržałkoŭski ž zaniaŭsia adnaŭleńniem «histaryčnaj spraviadlivaści» i aficyjna aformiŭ dla siabie dvaranski tytuł. Ich rod naležaŭ da polskaj šlachty i zhadvaŭsia ŭ śpisie rodaŭ «Najvysoka zaćvierdžanaha Hierboŭnika» Carstva Polskaha.

Uładzimir navat spansiravaŭ vypusk knihi «Stržałkaŭskija hierbu Pułkazic. Dziesiać stahodździaŭ rycarskaha rodu», jakuju dla jaho napisaŭ prafiesar Maskoŭskaha dziaržaŭnaha abłasnoha ŭniviersiteta Aleh Navumaŭ.

U 2005 hodzie niadaŭni supracoŭnik KDB atrymaŭ «patomnaje dvaranstva» ad Maryi Ramanavaj (ź linii Hahiencolern-Ramanavych), a ŭ 2009 hodzie staŭ kavaleram Ordena Śviatoj Hanny.

Jak adznačaje vydańnie, ni Uładzimir, ni Jaŭhien, ni Iryna nie trapili pad zachodnija sankcyi. Jany svabodna rasparadžajucca aktyvami, handlujuć ałkaholem, kirujuć hatelami, udzielničajuć u mižnarodnych turnirach i padarožničajuć na šykoŭnych jachtach.

Zališnie tłumačyć, piša The Insider, jak rasijskim śpiecsłužbam mohuć spatrebicca sietka jeŭrapiejskich hatelaŭ, suviazi ŭ kołach jeŭrapiejskaj arystakratyi, hatovaja infrastruktura dla admyvańnia hrošaj i daśviedčany arhanizatar eskortnaha biznesu. Ale niahledziačy na ​​raznastajnyja «čyrvonyja ściahi», siamja rasijskich špijonaŭ pačuvajecca ŭ Jeŭropie maksimalna kamfortna.

• 3
• 0
• 5
• 14
• 4
• 1
• 17
• 0