Što mienavita adbyvajecca ŭ mozhu mužčyny padčas seksu?

Daśledavać mužčynskuju seksualnaść u łabaratornych umovach praściej, čym žanočuju. U samcoŭ — ludziej, myšej, pacukoŭ i prymataŭ — fizijałahičnyja stadyi ŭzbudžeńnia, praniknieńnia i ejakulacyi vyrazna adroźnivajucca, kožnaja maje svaje markiery. A voś žanočaja reakcyja na seks značna bolš varyjatyŭnaja i drenna paddajecca standartyzacyi. Tamu navukovyja daśledavańni, u tym liku i novaje, apisanaje na Fitbook.de, čaściej za ŭsio zasiarodžvajucca mienavita na mužčynskim boku.

Što ŭžo było viadoma

Bolšaść daśledavańniaŭ raniej vyvučali pačatkovyja etapy pałavoha aktu i fazu paśla jaho. Naprykład, viadoma, što ŭ mužčyn pierad ejakulacyjaj aktyvujecca sistema ŭznaharodžańnia ŭ mozhu, dzie klučavuju rolu adyhryvaje dafamin (harmon ščaścia, jaki vypracoŭvajecca ŭ prylehłym jadry i adyhryvaje rolu matyvataru ŭ imknieńni da ŭznaharodžańnia i farmavańni zadavalnieńnia). Paśla arhazmu ŭ spravu ŭstupaje sieratanin — jon «hasić» uzbudžeńnie i vyklikaje adčuvańnie rassłablenaści.

U žančyn, u svaju čarhu, važnuju rolu adyhryvajuć aksitacyn (harmon prychilnaści i emacyjnaj blizkaści, jaki aktyvizujecca padčas intymnaj blizkaści i spryjaje adčuvańniu suviazi) i sieratanin, a padčas arhazmu nazirajecca pryhniečańnie prefrantalnaj kary hałaŭnoha mozhu — toj samaj, što adkazvaje za samakantrol, razvažańni i vykonvaje rolu «ŭnutranaha krytyka».

Što vyśvietlili ciapier

Kamanda daśledčykaŭ z Univiersiteta Cukuby (Japonija) i Nacyjanalnaha instytuta bijałahičnych navuk u Piekinie vyrašyła pajści dalej — zrazumieć, što adbyvajecca padčas samoha pałavoha aktu, pamiž uzbudžeńniem i ejakulacyjaj.

Jany praviali daśledavańnie na myšach, vyniki jakoha apublikavaŭ časopis Neuron. Navukoŭcy vyjavili niezvyčajnuju kaardynacyju dvuch niejramiedyjataraŭ — acetyłchalinu i dafaminu. Akazałasia, jany pracujuć u stroha rytmičnym uzajemadziejańni i kirujuć usimi fazami akta.

Voś što adbyvajecca krok za krokam:

Pierad praniknieńniem u mozhu aktyvujecca acetyłchalin — jon nibyta daje ciełu «startavy sihnał».

Kali pačynajecca praniknieńnie, u pracu ŭklučajecca dafamin. Jaho impulsy supadajuć pa častacie z rytmam ruchaŭ taza.

Kali zabłakavać adzin z hetych niejramiedyjataraŭ, vierahodnaść praniknieńnia abo ejakulacyi źnižajecca.

Kali ŭzmacnić acetyłchalin padčas praniknieńnia, ejakulacyja nadychodzić amal imhnienna, a častata dafaminavych impulsaŭ rezka padaje — heta, vidać, i jość sihnał zaviaršeńnia.

Kampjutarnaje madelavańnie paćvierdziła: usia sistema pracuje dziakujučy tonkamu bałansu i ŭzajemnaj rehulacyi hetych dvuch rečyvaŭ.

Praściej kažučy: acetyłchalin zapuskaje praces, dafamin zadaje rytm, a razam jany vyznačajuć finał. Biez uzhodnienaj pracy hetych elemientaŭ ničoha nie adbyvajecca.

A pry čym tut čałaviek?

Zrazumieła, nie ŭsio, što pracuje ŭ myšej, možna aŭtamatyčna pieranieści na ludziej. Ale niejrabijałahičnyja miechanizmy, źviazanyja z dafaminam i acetyłchalinam, u sysunoŭ šmat u čym padobnyja.

Pakolki acetyłchalin, jak miarkujecca, adyhryvaje klučavuju rolu ŭ zapusku ejakulacyi, farmakałahičnaje ŭździejańnie na hety niejramiedyjatar moža stać asnovaj novych preparataŭ dla mužčyn, jakija cierpiać ad zaŭčasnaj abo, naadvarot, nadta zapavolenaj ejakulacyi.

Ale mahčymyja i inšyja miedycynskija prymianieńni. Naprykład, pry chvarobie Parkinsana, kali ŭzrovień dafaminu parušany, časta nazirajucca seksualnyja dysfunkcyi. Novyja viedy mohuć dapamahčy palepšyć terapiju hetych spadarožnych simptomaŭ.

Taksama adkryćcio moža być karysnym pry psichijatryčnych stanach, dzie dafamin adyhryvaje važnuju rolu — u pryvatnaści, pry anhiedanii (stracie zdolnaści adčuvać radaść) abo inšych rasstrojstvach, źviazanych z adsutnaściu žadańnia i zadavalnieńnia.

• 14
• 0
• 0
• 2
• 1
• 0
• 0
• 0