Daviedka ad doktara: Tramp u vydatnym fizičnym i kahnityŭnym stanie

Prezident ZŠA Donald Tramp znachodzicca ŭ «cudoŭnym kahnityŭnym i fizičnym stanie», napisaŭ u daviedcy jaho doktar u Biełym domie, piša Bi-bi-si.

U piatnicu Tramp prajšoŭ svoj pieršy z pačatku druhoha prezidenckaha terminu štohadovy miedycynski ahlad. Jon pravodziŭsia, jak zvyčajna, u vajskovym špitali «Uołter Red» u Bietesdzie, štat Merylend, i doŭžyŭsia piać hadzin.

U Trampa byŭ vyjaŭleny «rubiec na pravym vuchu ad ahniastrelnaha ranieńnia» paśla zamachu ŭ lipieni minułaha hoda.

«Prezident Tramp zachoŭvaje cudoŭnaje zdaroŭje, demanstrujučy mocnyja sardečnyja, nieŭrałahičnyja i ahulnyja fizičnyja funkcyi», — havorycca ŭ daviedcy jaho doktara, kapitana Šona Barbabieły, apublikavanaj Biełym domam u niadzielu. U svaje 78 hadoŭ Tramp staŭ samym starym prezidentam na momant ustupleńnia na pasadu. Jaho papiarednik Džo Bajden na momant sychodu byŭ starejšy — jamu było 82 hady.

Pavodle słoŭ doktara, Tramp zdaŭ niekalki analizaŭ kryvi, prajšoŭ abśledavańnie serca i UHD.

«Jaho aktyŭny ład žyćcia praciahvaje ŭnosić značny ŭkład u jaho samaadčuvańnie, — napisaŭ doktar Barbabieła. — Prezident Tramp demanstruje vydatnaje kahnityŭnaje i fizičnaje zdaroŭje i całkam hatovy da vykanańnia abaviazkaŭ hałoŭnakamandujučaha i kiraŭnika dziaržavy».

Prezident prajšoŭ nieŭrałahičnyja testy na psichičny stan, pracu niervaŭ, matornyja i siensornyja funkcyi i refleksy.

Pavodle Manrealskaj kahnityŭnaj škały (šyroka prymianiajemy test dla vyjaŭleńnia kahnityŭnych parušeńniaŭ, asabliva niaciažkich) prezident atrymaŭ 30 bałaŭ z 30, havorycca ŭ dakumiencie.

Barbabieła taksama adznačyŭ, što ŭ Trampa jość «niaznačnyja paškodžańni ad sonca» i niekalki «dabrajakasnych paškodžańniaŭ skury».

Prezident prymaje niekalki lekaŭ dla kantrolu ŭzroŭniu chalesterynu, a taksama aśpiryn dla prafiłaktyki sardečnych zachvorvańniaŭ i krem dla lačeńnia skurnych zachvorvańniaŭ, ukazvaje ŭrač.

Kardyjałahičnaje abśledavańnie Trampa pakazała «adsutnaść adchileńniaŭ»: u historyi chvaroby prezidenta jość «pad kantrolem hipierchalesteryniemija» — stan, jakoje moža pavysić ryzyku sardečnaha prystupu. Siarod inšych zachvorvańniaŭ, adznačanych u jaho historyi chvaroby, — pieraniesieny kavid, ružaceja (skurnaje zachvorvańnie, jakoje časta vyklikaje pačyrvanieńnie tvaru), i dabrajakasny palep kišečnika.

Prezident važyć 101 kh pry roście 189 sm. Tramp skinuŭ paru kiłahramaŭ ź lutaha 2019 hoda, i pavodle indeksu masy cieła ciapier adnosicca da katehoryi ludziej z zališniaj vahoj, ale nie z atłuścieńniem.

U zapiscy adznačajecca, što «sustavy i myšcy prezidenta majuć poŭny dyjapazon ruchu», a jaho dobraje zdaroŭje prypisvajecca aktyŭnamu ładu žyćcia, uklučajučy «častyja pieramohi ŭ hulniach u holf».

Heta pieršaje miedycynskaje zaklučeńnie ab stanie zdaroŭja Trampa, abnarodavanaje paśla zamachu na jaho ŭ lipieni minułaha hoda na pieradvybarčym mitynhu ŭ Batlery (Piensilvanija).

Padčas pieršaha terminu kiravańnia Trampa doktar Biełaha doma skazaŭ, što ŭ jaho dobraje zdaroŭje, ale jamu treba skinuć vahu i zaniacca sportam.

• 1
• 0
• 2
• 2
• 0
• 0
• 0
• 0