Stała viadoma, kolki ŭ 2024-m zarabili na pieraprodažy BiełAZaŭ u Rasiju kampanii, źviazanyja z synami Łukašenki

Raniej «Naša Niva» ŭskryła sutnaść schiemy, pa jakoj kampanii-dylery raźmiarkoŭvajuć u svaju kišeniu prybytki BiełAZa. 

Na hetaj schiemie siadziać 8 dyleraŭ. 

Pra ŭsie raźliki, padrabiaznaści schiem, abjomy vyvadu srodkaŭ i pierasiačeńni ŭ bijahrafijach kiraŭnikoŭ kampanij-dyleraŭ sa starejšymi Łukašenkami vy možacie pačytać u raniejšych publikacyjach.

Čytajcie: «My adna siamja». Dylery BiełAZa, źviazanyja z synami Łukašenki, zarablajuć, jak sam BiełAZ

Čytajcie: Stała viadoma, kolki zarabili na prodažy BiełAZaŭ pasiaredniki z kołaŭ małodšych Łukašenkaŭ — heta sotni miljonaŭ dalaraŭ na hod

Hramadstvu dobra viadomyja centralnyja fihury tolki dvuch ź ich: «Aŭtatechinmaš» i «B-24». Raniej Biełaruski rasśledavalnicki centr vyčarpalna raskazaŭ pra suviazi zasnavalnikaŭ «B-24» ź siamjoj Dźmitryja Łukašenki. «Naša Niva» taksama znajšła pierasiačeńni ŭ bijahrafijach zasnavalnikaŭ «Aŭtatechinmaša» z kołami Viktara Łukašenki. 

Na hetyja dźvie kampanii prychodzicca amal 60% prybytkaŭ ź pieraprodažu BiełAZaŭ u Rasii. Na astatnija 6 kampanij — tolki 40%.

Vałavy prybytak vaśmi razam uziatych kampanij bolšy, čym vałavy prybytak zavoda za luby hod dziejnaści z apošnich piaci.

Čystyja prybytki najbolšych z hetych dyleraŭ za asobnyja hady navat pa-asobku — bolšyja za prybytki samoha zavoda.

Pakul spynimsia na finansavych spravazdačach «Aŭtatechinšmaša» i «B-24», jakija aśviažyli svaju finansavuju spravazdačnaść u rasijskich bazach.

Minuły hod kampanija «Aŭtatechinmaš» spracavała z vyručkaj $225,8 miljona, vałavy prybytak skłaŭ $76,8 miljona. Rentabielnaść prodažaŭ — 30%. 

Pry takoj rentabielnaści kampanija, jakaja ničym nie vałodaje i ničoha nie vyrablaje, pakidaje sabie bolš za 50% doli ŭ ahulnym prybytku z adnaho ŭmoŭnaha pradadzienaha ŭ Rasiju BiełAZa. Jašče 9-10% asiadaje na «Handlovym domie «BiełAZ», astatniaje — zavodu. 

Kampanija «B-24» pakazała vyručku $384,5 miljona, vałavy prybytak skłaŭ $87,4 miljona. Rentabielnaść prodažaŭ — 22,7%. 

Kudy dalej vyvodziacca hetyja srodki — nieviadoma. 

Jak za minuły hod spravy ŭ samoha BiełAZa? U Biełarusi dakumienty zasakrečany, ale ŭjaŭleńnie možna skłaści pa spravazdačnaści Handlovaha doma «BiełAZ» u Rasii — cieraź jaho idzie ŭvieś handal i dalejšyja adhruzki na pryvielijavanych dyleraŭ. 

U 2024-m zavod BiełAZ adhruziŭ na rasijski «Handlovy dom «BiełAZ» pradukcyi na $862,2 miljona. Pry rentabielnaści ŭ 30% vałavy prybytak zavodu budzie $258,6 miljona. 

Ale źviartaje ŭvahu i inšaje.

Minułyja hady sumy ŭ buchhałtarskaj hrafie «sabiekošt prodažaŭ» kampanij «Aŭtatechinmaš» i «B-24» raśli. A značyć, raśli abjomy adhruzki pradukcyi BiełAZa, jakija cieraź ich išli. 

A voś za 2024 hod u «Aŭtatechinmaša» padzieńnie ŭ «sabiekošcie prodažaŭ» da ŭzroŭniu 2023-ha — na 20,7% u rasijskich rublach i na 27% u dalarach pa siaredniehadavych kursach za 2023 i 2024 hady.

U 2023 hodzie «Aŭtatechinmaš» uziaŭ z zavoda pradukcyi na $244,9 miljona, a ŭ 2024 — na $178,8 miljonaŭ. 

Sam ža BiełAZ staŭ pastaŭlać u Rasiju mienš tolki na 3% da ŭzroŭniu 2023 hoda.

Jakija z hetaha vysnovy? Imavierna, źjaviłasia niejkaja inšaja pryvielijavanaja kampanija-dyler, na karyść jakoj ad «B-24» i «Aŭtatechinmaša» byli adrezany kavałki. Abo sami ŭłaśniki hetych kampanij — naminalnyja i sapraŭdnyja — stali pieravodzić biznes na inšyja, jašče nieviadomyja hramadstvu jurydyčnyja asoby. 

Jak minimum, u «Aŭtatechinmaša» źmianilisia aficyjnyja bienieficyjary ŭ Rasii paśla vychadu rasśledavańnia «Našaj Nivy»: źnikli Ihar Drazdoŭ i Ihar Padhorny, zamiest ich źjavilisia pakul nieviadomyja imiony Alaksieja Łaviniuka (30%) i Michaiła Čučkova (30%). Juryj Chomič (40%) zastaŭsia ŭ akcyjanierach.

• 2
• 0
• 3
• 0
• 1
• 0
• 11
• 0