Prync Hary prapanavaŭ baćku pamirycca, ale karol «razdražnieny i zły» nie adkazaŭ

Hary ŭ intervju BBC upieršyniu za šmat hadoŭ publična prapanavaŭ svajoj siamji pajadnańnie: «Ja chacieŭ by pajadnacca sa svajoj siamjoj. Niama sensu praciahvać zmahacca», — skazaŭ jon. 

Prync Hary zajaviŭ, što chacieŭ by pamirycca z brytanskaj karaleŭskaj siamjoj, pakolki nie viedaje, jak doŭha pražyvie jaho baćka, karol Karł III, u jakoha dyjahnastavali ankałahičnaje zachvorvańnie.

«Viadoma, jany nikoli nie darujuć mnie za mnohija rečy, ale… niama sensu praciahvać baraćbu. Žyćcio kaštoŭnaje. Ja nie viedaju, kolki jašče zastałosia majmu baćku, jon nie choča sa mnoj razmaŭlać praz hetuju historyju ź biaśpiekaj. Było b vydatna pamirycca», — skazaŭ Hary.

Paśla paražeńnia ŭ apielacyjnym sudzie ŭ spravie dziaržaŭnaj achovy Hary admoviŭsia ad dalejšaha abskardžańnia. Jon nazvaŭ situacyju prynižalnaj i zajaviŭ, što nie moža viarnuć svaju siamju ŭ Vialikabrytaniju.

Z 2020 hoda, kali Hary i Miehan Markł admovilisia ad karaleŭskich abaviazkaŭ, jany byli pazbaŭlenyja pastajannaj achovy i ciapier musiać zahadzia paviedamlać pra svaje vizity.

Karol, adnak, na prapanovu syna dahetul nie adreahavaŭ.

Jak viadoma, razychodžańni pamiž Hary i jaho siamjoj stali nastolki hłybokimi, što jon i jahonaja žonka Miehan u 2020 hodzie razarvali suviazi z brytanskaj karonaj i pierajechali ŭ Kaliforniju.

Jaho ciapierašnija vykazvańni, vierahodna, źviazanyja ź niadaŭniaj sudovaj parazaj u Vialikabrytanii, miarkuje redaktar BILD Tobijas Render: łondanski sud pastanaviŭ, što Hary, Miehan i ich dvoje dziaciej padčas pajezdak u Vialikabrytaniju nie buduć aŭtamatyčna atrymlivać toj ža ŭzrovień achovy, što i astatnija čalcy karaleŭskaj siamji.

U intervju 2 traŭnia Hary skazaŭ: «Ja nie mahu ŭjavić sabie śviet, u jakim ja pry takich umovach pryvioz by svaju žonku i dziaciej nazad u Vialikabrytaniju».

Karol bolš nie razmaŭlaje ź im «z-za ŭsioj hetaj achoŭnaj łuchty», zajaviŭ Hary žurnalistam. Pry hetym, pavodle jaho słoŭ, u baćki «šmat ułady» ŭ tym, što datyčycca vyniku takoha pracesu. Faktyčna heta ŭskosnaje abvinavačańnie va ŭmiašańni — abraźlivaje dla Karła.

Siabar karaleŭskaj siamji raspavioŭ haziecie The Sun, što karol «razdražnieny i zły» z-za farmulovak syna. Umiašańnie Karła ŭ sudovy praces było b «supiarečlivym kanstytucyi», patłumačyŭ insajdar. «Toje, što jaho razdražniaje i złuje na bolš asabistym uzroŭni, — heta niedachop pavahi da hetaha pryncypu», — dadała krynica.

Čalcy brytanskaj karaleŭskaj siamji abaviazalisia «słužyć karonie», heta značyć padparadkoŭvać svaje asabistyja intaresy ahulnamu abaviazku, pieradaje insajdar pazicyju Čarlza; Hary ž, zychodziačy ź jaho vykazvańniaŭ, choča najpierš słužyć samomu sabie, piša BILD. 

• 1
• 0
• 0
• 2
• 0
• 2
• 0
• 0