Prezidentka Jeŭrakamisii abviaściła ab zaviaršeńni ery rasijskich nafty i hazu ŭ Jeŭropie
Era rasijskich vykapniovych enierhanośbitaŭ u Jeŭropie «padychodzić da kanca», zajaviła prezidentka Jeŭrapiejskaj kamisii Ursuła fon der Lajen, adkryvajučy debaty adnosna spraviadlivaha miru dla Ukrainy ŭ Jeŭraparłamiencie 7 traŭnia. Pra heta paviedamlaje Ukrainskaja słužba «Radyjo Svaboda».
Admovu ad rasijskaha vykapniovaha paliva kiraŭnica Jeŭrakamisii nazvała adnym z troch važnych momantaŭ dla dasiahnieńnia praciahłaha miru va Ukrainie.
Jana adznačyła, što da poŭnamaštabnaha ŭvarvańnia krainy ES płacili Rasii za enierhanośbity 12 miljardaŭ jeŭra ŭ miesiac. Ciapier hetaja suma składaje 1,8 miljarda. Dola impartu hazu z Rasii źniziłasia z 45% da 13%. Impart nafty skaraciŭsia ŭ dziesiać razoŭ.
«Niekatoryja dahetul kažuć, što nam varta znoŭ «adkryć kran» dla rasijskich hazu i nafty», — adznačyła prezidentka Jeŭrakamisii, vidavočna, majučy na ŭvazie Słavakiju i Vienhryju, jakija supraciŭlajucca admovie ad rasijskich enierhanośbitaŭ. Jana vykazała pierakanańnie, što takoje rašeńnie było b histaryčnaj pamyłkaj, i ES nie dazvolić hetamu zdarycca:
«Rasija nieadnarazova dakazvała, što nie źjaŭlajecca nadziejnym pastaŭščykom. Pucin užo spyniaŭ pastaŭki hazu ŭ Jeŭropu ŭ 2006, 2009, 2014, 2021 hadach i na praciahu vajny. Kolki jašče treba razoŭ, kab zrabić vysnovy? Zaležnaść ad Rasii škodzić nie tolki našaj biaśpiecy, ale i našaj ekanomicy. Našy enierhietyčnyja ceny nie mohuć vyznačacca varožym susiedam».
Fon der Lajen taksama padziakavała ZŠA za dapamohu z zakupkaj zvadkavanaha pryrodnaha hazu ŭ pačatku poŭnamaštabnaha rasijskaha ŭvarvańnia va Ukrainu.
«Dziakujučy partnioram my pamienšyli zaležnaść ad Rasii. Uspomnim: my pamiatajem, jak ZŠA nieadkładna pryjšli na dapamohu sa zvadkavanym pryrodnym hazam padčas kryzisu», — skazała jana.
U toj ža čas siarod słužbovych asob Jeŭrasajuza ciapier jość peŭnaja zaniepakojenaść tym, što ŭžo bolš za pałovu zvadkavanaha hazu błok kuplaje mienavita ŭ ZŠA, što nie vielmi adpaviadaje palitycy dyviersifikacyi pastaŭščykoŭ.
Napiaredadni Jeŭrakamisija pradstaviła płan, jaki dazvolić razryvać užo padpisanyja z Rasijaj hazavyja kantrakty, kab pazbavicca zaležnaści ad rasijskaha vykapniovaha paliva da 2027 hoda. Zhodna z novym płanam, pastanova ab zabaronie kupli rasijskaha hazu i nafty moža prymacca ŭ ramkach palityki handlu, dla zaćviardžeńnia jakoj dastatkova hałasoŭ bolšaści krain-členaŭ. Heta značyć, što ich nie zmohuć vietavać Vienhryja i Słavakija.
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja90
Kamientary
A to ŭ druha Vovy dachody imknucca da nula, VUP užo padaje, pakupnickaja zdolnaść taksama. Samaja para druhu Hrihoŕjeviču i kapiejku zarabić, i druha Vovu vyručyć.