Jeŭrasajuz da kanca 2027 hoda źbirajecca całkam admovicca ad zakupak rasijskaha hazu
Jeŭrakamisija abviaściła, što da kanca 2027 hoda ŭsie krainy Jeŭrasajuza pavinny całkam spynić zakupki rasijskaha hazu, uklučajučy zvadkavany pryrodny haz. Choć haz pakul nie padpadaje pad sankcyi, hety krok źjaŭlajecca častkaj šyrokaj stratehii ES pa vychadzie z zaležnaści ad rasijskich enierharesursaŭ na fonie praciahłaj vajny va Ukrainie, piša Euronews.
Płan Jeŭrasajuza praduhledžvaje paetapnuju admovu ad rasijskaha hazu. Spačatku zabaroniać zaklučeńnie novych hazavych kantraktaŭ, a karotkaterminovyja pastaŭki pavinny spynicca da kanca 2025 hoda.
Doŭhaterminovyja kantrakty, jakija składajuć asnoŭnuju častku pastavak, buduć skasavanyja da 2027 hoda. Kožnaja kraina pavinna raspracavać nacyjanalny płan, u jakim vyznačyć, jak budzie vykonvać hetyja mety.
ES taksama płanuje ŭvieści abmiežavańni suprać «cieniavoha fłotu», jaki Rasija vykarystoŭvaje dla abychodu naftavych sankcyj, a taksama imkniecca spynić impart rasijskaha uranu i inšych jadziernych materyjałaŭ.
Słavakija i Vienhryja prahnazavana vystupili suprać inicyjatyvy, śćviardžajučy, što jana niehatyŭna paŭpłyvaje na ceny enierhii dla nasielnictva i ŭdaryć pa ekanomicy. U toj ža čas inšyja krainy, takija jak Polšča, Litva, Šviecyja i jašče šeść dziaržaŭ, zaklikali całkam zabaranić rasijski haz.
Niahledziačy na skaračeńnie pastavak pa trubapravodach, impart rasijskaha ZPH u 2024 hodzie vyras na 9%, asabliva ŭ Francyi, Ispanii i Bielhii. Heta vyklikaje palityčnuju krytyku, bo Rasija praz heta atrymlivaje značnyja dachody, jakija mohuć padtrymlivać jaje vajennyja dziejańni.
Jeŭrakamisija prapanuje pravavy miechanizm, jaki dazvolić jeŭrapiejskim kampanijam skasavać kantrakty biez štrafaŭ, spasyłajučysia na «fors-mažor». Ale heta moža pryvieści da darahich sudovych razborak, bo rasijskija kantrakty časta majuć umovy «biary abo płaci».
ES spadziajecca, što navat biez sankcyj krainy buduć abaviazanyja vykonvać hetaje rašeńnie bolšaściu hałasoŭ. Heta pavinna ŭmacavać enierhietyčnuju biaśpieku Jeŭropy i pazbavicca ad ryzyki palityčnaj zaležnaści ad Rasii.
Ciapier čytajuć
Minski školnik praspaŭ prypynak. Ale kiroŭca aŭtobusa davioz jaho dadomu!3
Minski školnik praspaŭ prypynak. Ale kiroŭca aŭtobusa davioz jaho dadomu!
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2424
Kamientary