Rychtavali hučny reliz, ale niešta pajšło nie tak.
Supracoŭniki biełaruskaj studyi Swag Masha paviedamlajuć pra zvalnieńnie prykładna pałovy štatu ŭ mai. Da hetaha kampanija aktyŭna nabirała, piša Dev.by.
Historyja vialikaha skaračeńnia ŭ varšaŭskim ofisie Playtika vyklikała łancuhovuju reakcyju: pra masavyja zvalnieńni vyrašyli raspavieści eks-supracoŭniki studyi Swag Masha.
Swag Masha
Biełaruskaja hiejmdeŭ-studyja. Zasnavanaja ŭ 2018 hodzie biełarusami Dźmitryjem Nikifaravym i Alaksiejem Karniejevym, a taksama Kiryłam Nadzieždzinym z Tatarstana. Ideja stvareńnia studyi pa raspracoŭcy hulniaŭ u žanry interaktyŭnaha kino źjaviłasia jašče raniej, u 2015 hodzie. U Minsku prymalisia klučavyja rašeńni pa pradukcie i markietynhu, a asnoŭny R&D-centr znachodziŭsia ŭ Inapolisie (technachab pad Kazańniu).
Uźlot pačaŭsia z hulni Love Sick: Interactive Stories. Paśla paśpiachovaha relizu ŭ 2019 hodzie kampaniju nabyła rasijskaja Mail.ru Group, adbyłasia kansalidacyja z hulniavym padraździaleńniem (My.Games).
Biełaruskaja jurydyčnaja asoba studyi — «SVEH MAŠA» — rezident PVT.
Pavodle ich słoŭ, minułym letam kampanija aktyŭna najmała ludziej na prajekt Swag Toons — mabilnaja aplikacyja dla čytańnia ličbavych komiksaŭ.
Jak zvolnili
«Hod tamu pad start novaha prajekta išoŭ vielmi aktyŭny najm. Prajekt nabiraŭ abaroty. Kožny miesiac prychodzili novyja ludzi», — raspaviadaje pra hety pieryjad adna z supracoŭnic.
«Kožny tydzień prychodzili pa dva čałavieki, heta ŭžo vyhladała vielmi padazrona, u vyniku art-adździeł staŭ 30+ čałaviek», — dadaje inšaja.
Reliz aplikacyi, pavodle słoŭ supracoŭnikaŭ, adbyŭsia ŭ krasaviku hetaha hoda. A 12 maja studyja zvolniła prykładna pałovu kalektyvu.
Tut dadzienyja niekalki razychodziacca: adny naličyli 27 zvolnienych, inšyja — kala 40 z 80-i čałaviek.
«Pra zvalnieńnie paviedamili dzieści ŭ druhoj pałovie dnia: dasłali paviedamleńnie ŭ Discord i na poštu, što ŭ kampanii dalej niama finansavańnia, i my spyniajem supracoŭnictva. Na nastupny dzień paštovyja skryni zabłakavali i zakryli dostup da ŭsich pracoŭnych akaŭntaŭ», — raspaviadaje eks-supracoŭnica.
«Prosta dasłali listy z paviedamleńniem pra spynieńnie supracoŭnictva, — kaža inšaja. — I ŭ toj ža viečar vydalili ŭsich z pracoŭnych čataŭ. Nijakaha papiaredžańnia pra majučaje adbycca skaračeńnie nie było, nijakich kampiensacyj. Raźličylisia tolki za nievykarystany adpačynak, i ŭsio. Bolšaść prymusili padpisvać pa pahadnieńni bakoŭ».
Pavodle jaje słoŭ, «kali čałaviek nie zhadžaŭsia padpisvać pa pahadnieńni bakoŭ i patrabavaŭ vypłaty kampiensacyi, jamu prapanoŭvali vychodzić u ofis na hadzinu ŭ dzień (navat kali supracoŭnik pracavaŭ dystancyjna ź inšaha horada)». Raźvitalisia nie vielmi pryhoža — reziumuje jana.
Inšyja supracoŭniki paćviardžajuć, što ich prymusili skasavać kantrakty pa pahadnieńni bakoŭ: maŭlaŭ, dumali, što «ŭsio budzie narmalna: navat kali i skarociać, to pavodle Pracoŭnaha kodeksa RB vypłaciać kampiensacyju i vychodnuju dapamohu». Adnak ža «ŭ kampiensacyi ŭsim admovili, matyvujučy tym, što ŭ kampanii niama hrošaj, moža nie chapić navat na zarobki ŭ nastupnym miesiacy».
Taksama supracoŭniki raspaviadajuć, što nie ŭsie byli pracaŭładkavanyja praź biełaruskuju jurydyčnuju asobu, častka pracavała ź jurasobaj u AAE jak samazaniatyja. Kampiensacyj jany taksama nie atrymali i nie vielmi spadziajucca, bo ŭ ich damovach prapisana, što «sprečki rehulujucca zakanadaŭstvam AAE».
Čamu skaracili prajekt
U supracoŭnikaŭ mała infarmacyi pra heta. Im paviedamili pra spynieńnie (ci skaračeńnie) finansavańnia z boku matčynaj kampanii My.Games.
Žurnalisty paprasili prakamientavać situacyju suzasnavalnika Swag Masha Alaksieja Karniejeva, ale nie atrymali adkazu. Taksama napisali ŭ ofis My.Games.
Nad čym pracuje Swag Masha
Raniej Swag Masha była viadomaja jak raspracoŭščyk hulniaŭ u žanry interaktyŭnych historyj. Mienavita paśla pośpiechu Love Sick: Interactive Stories (3 miljony zapampovak za paŭhoda paśla relizu) u 2019 hodzie studyju nabyła Mail.ru Group.
U lipieni 2019 hoda My.Games (hulniavoje padraździaleńnie Mail.ru Group) abviaściła pra «poŭnuju kansalidacyju» ź biełaruskaj hiejmdev-studyjaj Swag Masha.
U kastryčniku 2022 hoda VK (raniej Mail.ru Group) pradała 100 % My.Games Alaksandru Čačavie, mieniedžaru i partnioru vienčurnaha fondu Leta Capital, za $642 młn. Štab-kvatera My.Games ciapier znachodzicca ŭ Niderłandach.
Love Sick
Mabilnaja hulnia ŭ žanry interaktyŭnaj historyi: karystalnik čytaje svojeasablivuju knihu, vybiraje varyjanty praciahu historyi i sam vyznačaje raźvićcio siužetu. Reliz hulni na Android adbyŭsia ŭ studzieni 2019 hoda, na iOS — u sakaviku. Pavodle dadzienych SensorTower, u lipieni karystalniki Android spampavali Love Sick 600 tysiač razoŭ (dachod raspracoŭščykaŭ skłaŭ 600 tysiač dalaraŭ), za toj ža pieryjad karystalniki iOS spampavali hulniu 400 tysiač razoŭ (vyručka — 700 tysiač dalaraŭ).
Na sajcie studyi pa-raniejšamu paznačany try hulni: Dream Zone, Love Sick i Love Sparks. Adnak, pavodle słovaŭ supracoŭnikaŭ, novy kantent dla ich užo daŭno nie raspracoŭvajecca, hulni tolki technična padtrymlivajucca. Hałoŭnym prajektam studyi apošni hod była aplikacyja Swag Toons.
U PlayMarket jano padpisanaje jak pradukt Swag Global, «komiksy na russkom, lubovnyje istorii, roman noviełła, foto komiks», uzrost 16+. Kolkaść zapampovak — 10 tysiač+, vodhukaŭ niama. Razam ź viersijaj u App Store u aplikacyi ŭ sumie krychu bolš za 20 tysiač zapampovak.
Što mahło pajści nie tak
Žurnalisty spytalisia ŭ niezaležnaha raspracoŭščyka hulniaŭ, što mahło pajści nie tak z prajektam. Jon paćvierdziŭ, što 20 tysiač zapampovak — heta vielmi mała.
— Vyhladaje jak minimalny test, — vykazaŭ zdahadku ekśpiert. — Ale cikava navat nie heta, a toje, što byŭ naniaty vialiki kalektyŭ dla pracy nad prajektam, šancy jakoha možna acanić tolki paśla testu. Zvyčajna tyja, chto maje dośvied u hulniach, tak nie robiać. Najvierahodniej, inviestar čakaŭ, što heta budzie kamanda dla bolš maštabnych płanaŭ.
Jašče adna viersija: kali skaracili dyzajnieraŭ, mahčyma, źmianiajucca pracesy z ulikam aktyŭnaha vykarystańnia ŠI?
Heta tearetyčnyja razvažańni. Jak było nasamreč, viedajuć tolki pracadaŭcy.
Kamientary
Žyćcie pracavać prymusit ci naučit ..mabyć i ručkami pryjdziecca