Ułady Irana schapili sotni čałaviek pa padazreńni ŭ špijanažy na Izrail. Piaciora ŭžo pakaranyja
Za apošnija dva tydni, z pačatku irana-izrailskaj vajny, u Iranie aryštavali bolš za 700 čałaviek, padazravanych u suviaziach ź Izrailem, paviedamlajuć iranskija dziaržaŭnyja ŚMI. Ź minułaj niadzieli paviesili piać čałaviek, troje ź ich — u sieradu ranicaj. Iranskija ŭłady nazyvajuć ich «ahientami «Masada», piša Bi-bi-si.
«Z pačatku ataki Izraila na Iran špijonskaja sietka sijanisckaha režymu ŭ krainie nadzvyčajna aktyvizavałasia», — piša iranskaje ahienctva Fars News.
Inšaje ahienctva, Mizan, što śpiecyjalizujecca na navinach sudovaj sistemy krainy, apublikavała imiony traich pakarannych. Heta Idrys Ali, Azad Šadžai i Rasuł Achmad Rasuł.
Jašče dva čałavieki — Machamad-Amin Machdavi Šajstech i Madžyd Musajbi — byli pakarany adpaviedna ŭ minułuju niadzielu i paniadziełak. Pavodle źviestak ŚMI, usie jany byli asudžany za «supracoŭnictva na karyść sijanisckaha režymu», u pryvatnaści, za kantrabandu abstalavańnia, jakoje paźniej vykarystoŭvałasia dla zabojstva nienazvanych vysokapastaŭlenych asob.
Śmiarotnaje pakarańnie ŭ sieradu stała pieršym vykananym prysudam paśla taho, jak Iran i Izrail abviaścili pra spynieńnie ahniu. Jano adbyłosia ŭ horadzie Urmija na paŭnočnym zachadzie Irana, niedaloka ad miažy z Turcyjaj, paviedamili iranskija sudovyja orhany.
Tehieran rehularna abviaščaje pra aryšt i pakarańnie ahientaŭ, padazravanych u pracy na zamiežnyja raźviedsłužby, u tym liku «Masad».
Paśla taho, jak 13 červienia Izrail nanios pieršy ŭdar pa iranskich jadziernych abjektach, Tehieran paabiacaŭ chutkija sudovyja pracesy nad usimi, chto padazrajecca ŭ supracoŭnictvie z voraham.
Na dumku mnohich ekśpiertaŭ, paśla ŭražalnych pośpiechaŭ «Masada» na terytoryi Irana i poŭnaha pravału iranskich śpiecsłužbaŭ, śviedkam čaho dva tydni tamu staŭ uvieś śviet, iranskamu režymu nie zastajecca ničoha, jak chacia b u niečym prademanstravać svoj kantrol nad situacyjaj.
Nie vyklučana, što mnohija z 700 aryštavanych u bližejšy čas stanuć achviarami raspravy.
Pavodle źviestak roznych pravaabarončych hrup, uklučajučy Amnesty International, Iran zajmaje druhoje miesca ŭ śviecie pa kolkaści śmiarotnych pakarańniaŭ u hod paśla Kitaja.
Jak prachodziać aryšty
Maštab aryštaŭ — kala 700 čałaviek mienš čym za dźvie tydni pa ŭsioj krainie — śviedčyć pra toje, što na pošuk ahientaŭ «Masada» akramia śpiecsłužbaŭ kinuty ŭsie mahčymyja siły, u tym liku dobraachvotnyja vajenizavanyja farmiravańni.
Pavodle źviestak Financial Times, adno z takich farmiravańniaŭ — «Basidž», naprykład, dziejničaje ŭ pryharadach Tehierana.
Bojcy «Basidža» kantralujuć darohi, ustaloŭvajuć časovyja KPP i dahladajuć transpart.
«Ciapier na padjezdach da horada možna ŭbačyć kantrolna-prapusknyja punkty, arhanizavanyja «Basidžam», čaho nie było da hetaj vajny ź Izrailem», — skazaŭ iranski vadziciel u kamientaryi FT.
«U asnoŭnym jany spyniajuć usiodarožniki, furhony i hruzaviki i staranna ahladajuć ich na pradmiet vybuchoŭki abo kampanientaŭ bieśpiłotnikaŭ», — raspavioŭ jon.
Krynicy FT paviedamlajuć, što aryštavanyja — u asnoŭnym hramadzianie Irana i Afhanistana, siarod ich šmat vadzicielaŭ hruzavikoŭ i taksama šmat biespracoŭnych.
Ułady Irana pierakananyja, što ahienturnaja sietka «Masada» padtrymlivała izrailskija avijaŭdary ź ziamli raźvieddanymi pra miescaznachodžańni celaŭ i kantrabandaj kampanientaŭ bieśpiłotnikaŭ, vybuchovych rečyvaŭ i inšych instrumientaŭ dla ažyćciaŭleńnia dyviersij na miescy.
Kamientary
[Zredahavana]