Stralba ŭ adnym z najstarejšych univiersitetaŭ ZŠA — zahinuli dvoje studentaŭ

Strałka zatrymać pakul nie ŭdałosia, jaho apisvajuć jak mužčynu ŭ čornym adzieńni, padrabiaznaściej pra padazravanaha pakul mała. Zahinułyja, jak i paranienyja, — studenty, zajaviła kiraŭnictva ŭniviersiteta, piša BBC.

Braŭnaŭski ŭniviersitet — adzin z najbolš prestyžnych pryvatnych univiersitetaŭ ZŠA, uvachodzić u Lihu plušču. Heta adna z najstarejšych vyšejšych navučalnych ustanoŭ krainy.

Stralanina adbyłasia ŭ aŭdytoryi na pieršym paviersie inžyniernaha fakulteta, dzie dniom pavinny byli adbycca ispyty. Adzin sa studentaŭ raskazaŭ miascovamu telekanału WJAR, što dźvie hadziny chavaŭsia pad partaj, čakajučy, pakul palicyja skončyć apieracyju.

Prezident Donald Tramp zajaviŭ, što byŭ prainfarmavany pra stralbu. «Jakaja žudasnaja padzieja. Usio, što my možam zrabić zaraz, — heta malicca za achviar. Heta hańba», — skazaŭ Tramp žurnalistam.

«Złačyniec usio jašče na svabodzie», — zajaviŭ žurnalistam mer Providensa Bret Smajli. Pavodle jaho słoŭ, kolkaść achviar moža vyraści.

Namieśnik načalnika palicyi Cimaci O'Chara skazaŭ, što asoba padazravanaha jašče nie ŭstanoŭlena.

Palicyja pry hetym ličyć, što padazravanamu kala 30 hadoŭ — jon trapiŭ na zapisy kamier nazirańniaŭ, kali vychodziŭ sa budynka.

Aficyjnyja asoby zajavili, što šukajuć mužčynu ŭ čornym adzieńni, i apublikavali videazapis z padazravanym, jaki, pavodle słoŭ O'Chary, moh być u mascy.

Pavodle danych uładaŭ, strałok źbieh paśla stralby pa studentach u inžyniernym korpusie ŭniviersiteta, dzie ŭ hety čas prachodzili ispyty. Zbroja nie znojdziena.

Braŭnaŭski ŭniviersitet uklučaje sotni budynkaŭ, u tym liku lekcyjnyja zały, łabaratoryi i internaty.

Student Čan-Chienh Čyjen raskazaŭ WJAR, što pracavaŭ u łabaratoryi z tryma inšymi navučencami, kali ŭbačyŭ paviedamleńnie pra stralbu za kvartał ad ich. Pavodle jaho słoŭ, jany čakali pad stałami kala dźviuch hadzin.

«Heta toj dzień, jakoha nikoli nie pavinna było zdarycca, ale jon zdaryŭsia», — zajaviła žurnalistam prezident Braŭnaŭskaha ŭniviersiteta Kryścina Paksan, paćvierdziŭšy, što ŭsie ci amal usie paciarpiełyja ŭ vyniku stralby byli studentami.

Pavodle danych arhanizacyi The Gun Violence Archive, sioleta ŭ ZŠA adbyłosia 389 padobnych vypadkaŭ, šeść razoŭ stralali ŭ navučalnych ustanovach. Letaś — bolš za 500 vypadkaŭ.

• 0
• 0
• 0
• 1
• 2
• 5
• 0
• 0