Prezident Ukrainy Uładzimir Zialenski padpisaŭ zakon, jaki adnaŭlaje niezaležnaść Nacyjanalnaha antykarupcyjnaha biuro (NABU) i Śpiecyjalizavanaj antykarupcyjnaj prakuratury (SAP). Pra heta jon paviedamiŭ u svaim videazvarocie, padziakavaŭšy deputatam za padtrymku i padkreśliŭšy važnaść pryniataha rašeńnia.
Zakon byŭ raspracavany jak adkaz na skandalny zakonaprajekt № 12414, jaki pryniali 22 lipienia i jaki dazvalaŭ hienieralnamu prakuroru ŭmiešvacca ŭ spravy NABU i SAP.
Hety dakumient vyklikaŭ šyrokuju krytyku jak va Ukrainie, tak i siarod mižnarodnych partnioraŭ — u tym liku krain G7 i Jeŭrakamisii. U Kijevie i inšych haradach prajšli pratesty, a ES papiaredžvaŭ pra mahčymaść prypynieńnia finansavaj padtrymki.
24 lipienia Zialenski padaŭ u parłamient alternatyŭny zakonaprajekt № 13533, jaki całkam zachoŭvaje pracesualnuju niezaležnaść antykarupcyjnych orhanaŭ. Jon zabaraniaje hienprakuroru ŭmiešvacca ŭ ich pracu, mianiać padślednaść biez zhody kiraŭnika SAP, i harantuje, što rašeńni SAP zastajucca niezaležnymi.
Zhodna z novym zakonam, supracoŭniki NABU, jakija majuć dostup da dziaržaŭnaj tajamnicy, buduć prachodzić palihraf, ale kantrol za hetym budzie rabić nie SBU, a ŭłasnaje ŭnutranaje ŭpraŭleńnie biuro.
Zakonaprajekt atrymaŭ padtrymku 331 deputata, nichto nie prahałasavaŭ suprać abo ŭstrymaŭsia. 326 parłamientaroŭ padtrymali prapanovu pra nieadkładnaje padpisańnie dakumienta prezidentam. Pavodle słoŭ Zialenskaha, ułady ŭžo ŭ najbližejšy čas prainfarmujuć mižnarodnych partnioraŭ pra toje, što zakon ustupiŭ u siłu.
Prezident Ukrainy padkreśliŭ, što hetaje rašeńnie — śviedčańnie isnavańnia demakratyi i pavahi da hramadzianskaj supolnaści va Ukrainie.
Jeŭrasajuz skaraciŭ finansavuju dapamohu Ukrainie z-za pavolnych reformaŭ
Va Ukrainie pad upłyvam pratestaŭ viartajuć niezaležnaść antykarupcyjnym orhanam
Makron i Mierc chočuć abmierkavać ź Zialenskim baraćbu z karupcyjaj
Zialenski padparadkavaŭ antykarupcyjnyja viedamstvy prakuratury — ludzi vyjšli na pratesty
Kamientary