Zialenski padparadkavaŭ antykarupcyjnyja viedamstvy prakuratury — ludzi vyjšli na pratesty
Prezident Ukrainy padpisaŭ zakonaprajekt, jaki faktyčna padparadkoŭvaje niezaležnyja antykarupcyjnyja orhany Nacyjanalnaha antykarupcyjnaha biuro Ukrainy (NABU ) i Śpiecyjalizavanaj antykarupcyjnaj prakuratury (SAP) hienieralnamu prakuroru. U Viarchoŭnaj Radzie jaho padtrymali pieravažna narodnyja deputaty ad «Słuhi naroda», «APZŽ» i «Baćkaŭščyny».
Zhodna z zakonam, padpisanym Zialenskim, hienieralny prakuror zmoža: pieradavać paŭnamoctvy prakurora SAP inšym prakuroram; patrabavać materyjały lubych spraŭ i pieradavać ich inšym prakuroram; davać NABU piśmovyja ŭkazańni, abaviazkovyja da vykanańnia; pieradavać kryminalnyja spravy NABU inšym orhanam dasudovaha rasśledavańnia, piša «Ukrainskaja praŭda».
Zialenski prakamientavaŭ situacyju vakoł NABU i SAP, zajaviŭšy, što antykarupcyjnaja sistema praciahnie pracavać, ale biez rasijskaha ŭpłyvu.
Jon adznačyŭ, što sustreŭsia z kiraŭnictvam NABU, SAP i SBU, kab abmierkavać vykliki apošnich dzion. Pavodle jaho słoŭ, nieabchodna ačyścić sistemu ad rasijskaha ŭpłyvu i damahčysia bolšaj spraviadlivaści.
«Viadoma, NABU i SAP buduć pracavać. Važna, što hienieralny prakuror nastrojeny na toje, kab va Ukrainie sapraŭdy zabiaśpiečvałasia niepaźbiežnaść pakarańnia dla tych, chto idzie suprać zakona», — zajaviŭ prezident Ukrainy.
Taksama jon padkreśliŭ, što staryja spravy, uklučajučy karupcyju na miljardy i ŭciečku danych rasijanam, pavinny być rasśledavany, a biehłyja čynoŭniki — pryciahnuty da adkaznaści.
Paśla hałasavańnia ŭ bujnych ukrainskich haradach ludzi vyjšli na akcyi pratestu z zaklikam vietavać zakon.
Mitynhi prajšli i Kijevie, Lvovie, Adesie, Dniapry i navat, niahledziačy na abstreły, u Sumach.
Kamientary