Azierbajdžan rychtuje adkaz na ŭdary Rasii pa azierbajdžanskich naftahazavych abjektach va Ukrainie
10 žniŭnia sazvanilisia prezident Azierbajdžana Ilcham Alijeŭ i prezident Ukrainy Uładzimir Zialenski. Jany abmiarkoŭvali ŭ tym liku ŭdary rasijskich vojskaŭ pa hazavaj infrastruktury Ukrainy, pa jakoj prachodzić azierbajdžanski haz, a taksama pa naftavaj bazie azierbajdžanskaj kampanii SOCAR u Adesie. Kiraŭniki krain vykazali abureńnie dziejańniami rasijskich uzbrojenych sił, paviedamlaje Caliber.Az.
Pa źviestkach partała, atrymanych ad vartych davieru krynic, kali Rasija praciahnie svaju ahresiŭnuju palityku ŭ dačynieńni da intaresaŭ Azierbajdžana, to aficyjny Baku pačnie razhladać pytańnie ab źniaćci embarha na pastaŭki ŭzbrajeńnia Ukrainie, jakoje znachodzicca ŭ jaho arsienale.
Udary Rasii pa enierhietyčnych abjektach Azierbajdžana na terytoryi Ukrainy zmušajuć Baku prymać miery ŭ adkaz.
U noč z 7 na 8 žniŭnia 2025 hoda rasijskija vojski atakavali naftabazu Azierbajdžanskaj kampanii SOCAR u Adeskaj vobłaści Ukrainy. Piać udarnych dronaŭ «Šachied» udaryli pa naftabazie, vyklikaŭšy pažar i paškodziŭšy dyzielny trubapravod. Čaćviora supracoŭnikaŭ kampanii atrymali ciažkija ranieńni.
Heta ŭžo druhi napad za apošnija tydni na abjekty va Ukrainie, źviazanyja z Azierbajdžanam. Raniej była atakavanaja hazaraźmierkavalnaja stancyja pablizu Arłoŭki, klučavy elemient Transbałkanskaha hazapravoda, pa jakim 28 červienia va Ukrainu pačaŭ pastupać azierbajdžanski haz.
Kamientary