«Dźvie vadarodnyja i try hieksahienavyja bomby, a nastaŭnikaŭ i vučniaŭ rasstralajuć». U Minsku padletak adpomściŭ dziaŭčynie za admovu sustrakacca
U śniežni 2023 hoda 15-hadovaja minčanka Aryna paznajomiłasia z ravieśnikam Paŭłam (imiony źmienienyja). Jany pačali kantaktavać u telehramie i sustrakacca ŭ kampanijach. Paŭłu spadabałasia dziaŭčyna, i jon prapanavaŭ sustrakacca, ale atrymaŭ admovu. Padletak vyrašyŭ adpomścić, raspaviadajuć «Minsk-Naviny».
Praz paŭhoda Arynie napisaŭ nieviadomy i paviedamiŭ, što na jaje zakazany «doks» i «svatynh». Svatynh — heta falšyvy vyklik śpiecsłužbaŭ, naprykład, paviedamleńnie pra bombu ci zachop zakładnikaŭ. Doksinh — raspaŭsiudžańnie asabistaj infarmacyi biez zhody. Nieviadomy zapatrabavaŭ videa z prabačeńniami i pierasłaŭ navat hatovy tekst. Dziaŭčyna ŭspryniała heta jak žart.
Nieŭzabavie Aryna atrymała ad nieznajomca jašče adno paviedamleńnie. U im havaryłasia: u škole zakładzieny dźvie vadarodnyja i try hieksahienavyja bomby, i praz try hadziny rasstralajuć usich nastaŭnikaŭ i vučniaŭ, kali na peŭny mabilny numar nie pieraviaduć 300 tysiač rubloŭ. Aryna spałochałasia, pakolki ŭkazvaŭsia mienavita jaje abaniencki numar.
U nastupnym pasłańni paviedamlałasia ab miniravańni ŭstanovy i nieabchodnaści ŭ bližejšy čas pravieści evakuacyju. Akramia hetaha, patrabavałasia suma ŭ pamiery 20 młn rubloŭ i znoŭ ukazvalisia kantaktnyja dadzienyja Aryny.
Paśla stała viadoma, što nie mienš za vosiem takich paviedamleńniaŭ pastupili na elektronnyja adrasy staličnych ustanoŭ adukacyi, Mahiloŭskaha instytuta MUS i Minabłvykankama.
Padazravanaha zatrymali – im akazaŭsia toj samy chłopiec, jaki pakutavaŭ ad nieraździelenaha kachańnia.
U dačynieńni da Paŭła raspačali kryminalnuju spravu. Jon całkam pryznaŭ vinu. Pavodle Śledčaha kamiteta, chłopiec raniej ździajśniaŭ drobnaje chulihanstva, maci viała amaralny ład žyćcia, padletak žyŭ u prytułku.
Sud pryznaŭ Paŭła vinavatym u «zaviedama iłžyvym paviedamleńni ab niebiaśpiecy» i pryznačyŭ vychavaŭčyja miery: abmiežavańnie volnaha času na 6 miesiacaŭ (zabarona pakidać dom z 21:00 da 6:00, zabarona naviedvać masavyja mierapryjemstvy), rehistracyja ŭ milicyi. Jaho telefon kanfiskavany.
Ciapier čytajuć
«Dahetul zadajusia pytańniem, čym Pratasievič mianie začaravaŭ». Vialikaje intervju Sofji Sapiehi — častka druhaja12
Kamientary
Chacia durnych va ŭsie časy chapała. Čuŭ dzikuju historyju z 1950-ch, jak niedzie ŭ vakolicach Biarozy chłopiec svataŭsia da dziaŭčyny, jana vykaciła jamu harbuza, a jon raźjušany adkusiŭ joj končyk nosa. Nie, muža jana znajšła, kaniešnie, ale napakutvałasia z-za prydurka pa poŭnaj prahramie.