U Minsku źjaviŭsia novy restaran z aryhinalnaj uschodniaj kuchniaj — «Biejrut». Jon adkryŭsia na vulicy Internacyjanalnaj, pobač z Akademijaj muzyki, i prapanuje naviedvalnikam sapraŭdnyja stravy Livana, pryhatavanyja livanskim šef-kucharam Mufidam, piša «Anłajnier».
Uładalnik — bujny biznesmien ź Livana, jaki ŭžo niekalki hadoŭ žyvie ŭ Biełarusi i vyrašyŭ stvaryć u stalicy kutok svajoj radzimy.
Restaran składajecca z troch załaŭ, dzie kožnuju detal pradumali z ulikam nacyjanalnaha kałarytu: padviesnyja ŭschodnija lampy i lustry, mazaičnyja ŭzory, fotazdymki znakamitych livanskich piejzažaŭ i artystaŭ. Muzyka taksama ŭschodniaja — jana padkreślivaje nastroj.
Asablivaj razynkaj stała aliŭkavaje dreva, pryviezienaje ź Niderłandaŭ i vysadžanaje ŭ centry adnaho z załaŭ. Aliva ŭ Livanie ličycca simvałam daŭhalećcia i kultury, tamu hetaja detal asabliva padabajecca naviedvalnikam.
Pry stvareńni interjeru padkreślili i historyju budynka: adkrytaja cahlanaja muroŭka nahadvaje vinakurniu ci stary padvalny restarančyk i nadaje pamiaškańniu atmaśfieru ciepłyni.
Na kuchni pracuje šef-kuchar Mufid — prafiesijanał, jaki raniej pracavaŭ u Livanie, ZŠA i AAE. Jon viadomy svajoj pryncypovaściu da jakaści praduktaŭ: naprykład, moža admovicca ad partyi harodniny, kali jana jamu nie padabajecca. Dla niekatorych straŭ vykarystoŭvajuć navat impartnuju bulbu ź Niderłandaŭ, bo pa svaich charaktarystykach jana bolš padobnaja da livanskaj.
U mieniu prapanujuć kłasičnyja livanskija stravy:
- chubz — tonkija pšaničnyja łavašy, jakija zamianiajuć nož i videlec;
- miezie — nabor zakusak z maleńkich straŭ, siarod jakich jość sambusiki (nievialikija piražki ź miasam, arechami i miataj), chumus, baba hanuš;
- tabule — sałata z pamidoraŭ, piatruški, bułhura, cybuli, zalitaja aliŭkavym alejem i sokam limona;
- šavarma — miasnaja strava z harnirami, jakuju tut padajuć nie tolki ŭ łavašy, ale i jak asobnuju porcyju z harodninaj i sousami;
- kiebie — smažanyja katletki z načynkaj;
- jałandžy — zakuska ź vinahradnaha lista, jakaja nahadvaje dałmu;
- supy.
Asablivaje miesca zajmajuć desierty, naprykład, chałaujet eł žebnie — strava z mannaj krupy, syru macareła, fistašak i morkvy, jakuju padajuć z kubačkam ružovaj vady dla nadańnia dalikatnaha vodaru.
Livanskija stravy adroźnivajucca ad našych zvykłych tym, što tut amal niama ciažkich sousaŭ kštałtu majanezu. Zamiest hetaha vykarystoŭvajuć šmat aliŭkavaha aleju i limonnaha soku, što robić ježu lohkaj i śviežaj, choć spačatku kiślinka moža zdavacca niezvyčajnaj.
Kamientary